Yɩɩn‑sõamyã 112 - WẼNNAAM SEBRE 2014

Sẽn-Ka-Saab zoɛtbã tara sũ-noogo

¹ Pẽg-y Sẽn-Ka-Saabo! Bark bee sẽn zoet-a Sẽn-Ka-Saabã zugu, la sẽn nong-a Sẽn-Ka-Saab tõodã wʋsgã zugu!

² Yẽnda yagensã na n paama pãng tẽngã pʋga, Nin-tɩrsã yagens na n paama barka.

³ Nin-tɩrg zak na n pida ne laogo, la arzegse, la Sẽn-Ka-Saab na n nong-a-la wakat fãa.

⁴ Vẽenem yãgda lik pʋgẽ nin-tɩrsã yĩnga. A yãgda sẽn tar-b nonglem, ne nimbãan-zoeere, la tɩrlmã yĩnga.

⁵ Nin-sõng zoeta nimbãaneg n pengdẽ. A maanda a yɛlã fãa ne tɩrlem!

⁶ Nin-tɩrg pãng kõn tol n miim ye. B kõn tol n yĩm nin-tɩrg yell abada.

⁷ Nin-tɩrg ka zoet rabeem tɩ koe-beed na n wa wa ye. A sũur keemame, la a teega Sẽn-Ka-Saabo.

⁸ Yẽnda sũur ka kiuusdi, la a ka zoet rabeem ye. B na n ninga a bɛɛbã yãnd a nifẽ.

⁹ Yẽnda yãkda a paoong n kõt naong rãmba. Yẽnda tɩrlem paada wakat fãa. Yẽnda pãngã paasda ne ziiri.

¹⁰ Nin-wẽng nee rẽ t'a sũur puudẽ, t'a wãbd a yẽna, t'a sũur wurdẽ. Nin-wẽnsã ratem na n sãamame.