Yɩɩn‑sõamyã 109 - WẼNNAAM SEBRE 2014

Ned sẽn kot Wẽnnaam sõngre

1 A Davɩɩd yɩɩlle, yɩɩlã naab yĩnga.

¹ A Davɩɩd yɩɩlle, yɩɩlã naab yĩnga. Yãmb a Wẽnnaam la m pẽgda, ra-y sĩnd-y y noor ye.

² Bala, nin-wẽnsã ne zãmb rãmbã rõta maam. Bãmb saad n yagda maam zĩrẽ.

³ Bãmb kisgrã goam gũbga maam. Bãmb zabda ne maam zaalem.

⁴ Baa ne mam sẽn nong-bã, b baas n dõta maam. Mam ka maand bũmb tɩ ka pʋʋsg ye.

⁵ Mam maand-b-la neer tɩ b lebsd maam wẽnga. Mam nong-b lame, la bãmb kisa maam.

⁶ Bãmb yẽsda ne taab n yetẽ: «Bɩ d bao nin-wẽng t'a ges a yelle, la d kɩt tɩ rõat yals a rɩtgo!

⁷ Bɩ b mong-a bʋʋm, a bʋʋdã kaoob wakate. La bɩ b geelg a pʋʋsgã wa yel-wẽnde!

⁸ Bɩ b kɩt t'a yõor yɩ koɛɛga, tɩ ned a to reeg a zĩiga!

⁹ Bɩ a kambã lebg kɩɩbse, t'a pagã lebg pʋg-kõore!

¹⁰ Bɩ a kambã lebg yɛɛbdba, la bõasdba. Bɩ b zãag ne b ba-yirã sẽn lebg raboogã n tɩ bõose!

¹¹ Bɩ a sam-soabã yõk-a n dees a sẽn tarã fãa, tɩ nin-sãams fã a laogã fãa!

¹² Bɩ ned ra leb n maan-a neer ye, la bɩ ned da zoe a kɩɩbsã nimbãaneg ye.

¹³ Bɩ b menes a yagensã zãnga, la bɩ b yẽes b yʋyã zamaan ning sẽn watã sʋka!

¹⁴ Bɩ Sẽn-Ka-Saab kell n tẽeg a yaab-rãmbã kongrã yelle, la bɩ b ra yĩm a ma wã yel-wẽnã ye!

¹⁵ Bɩ Sẽn-Ka-Saab tẽeg b beegrã fãa yelle, n kɩt tɩ b yĩm b yell dũniyã zugu,

¹⁶ Bala, nin-kãngã ka tẽeg n maan neer ye. Yẽnda namsa naong soaba, la nimbãan-neda, hal n tol n kʋ sũ-sãang soaba!

¹⁷ Yẽnda rag n nong n kãabda beedo. Bɩ yẽnda kãab-beedã lebg n dɩ-a! Yẽnda sẽn dag n ka nong n ningd barkã, bɩ barkã zãag ne-a!

¹⁸ Bɩ yẽnda yeelg kãab-beedã wa fuugu, bɩ kãab-beedã sig a pʋgẽ wa koom, n kẽ n tãag a kõabã wa kaam!

¹⁹ Bɩ kãab-beedã pil-a wa fu-goabga, la a mobg-a wa kur-wĩir wakat fãa!»

²⁰ Yaa woto la Sẽn-Ka-Saab na n yao neb nins sẽn dõt-b maamã, la sẽn gomd-b maam wẽngã!

²¹ La yãmb a Sẽn-Ka-Saab sẽn yaa mam Zu-soaba, bɩ y maan maam neer y yʋʋrã yĩnga, bala, yãmb nonglmã yaa sõama. Bɩ y fãag maam!

²² Mam yaa naong soab la nimbãan-neda, Mam sũur bondga m pʋgẽ.

²³ Mam loogda wa maasem sẽn loogdã. B pĩnga maam wa kalwaare.

²⁴ No-loeerã komsa mam dũmã, la mam mengã yɛɛme, m sẽn faagã yĩnga.

²⁵ Mam lebga bãmb bõn-yaandga, bãmb geta maam n gõmsd b zutu.

²⁶ Sẽn-Ka-Saab sẽn yaa mam Wẽnnaam, sõng-y-ma! Yãmb nonglmã yĩng bɩ y fãag-ma,

²⁷ tɩ b bãng tɩ yaa yãmb a Sẽn-Ka-Saab nugã n maan bõn-kãnga!

²⁸ Bãmb kãabda beedo, la yãmb ningda barka. B sã n baood n zab ne maam, b na n paama yãnde, la mam sẽn yaa yãmb tʋmtʋmdã na n maana sũ-noogo.

²⁹ Bɩ y kɩt tɩ sẽn dõt-b maamã paam yãnde. Bɩ b yeelg yãndã wa fuugu!

³⁰ Mam na n zẽka m koɛɛg n pẽg Sẽn-Ka-Saabo. Neb kʋʋngã sʋka, mam na n pʋʋsa Sẽn-Ka-Saab barka.

³¹ Bala, Sẽn-Ka-Saab bee nimbãan-ned rɩtgo, n dat n fãag-a ne sẽn bʋʋd-b ne yẽnda wã.