Yɩɩn‑sõamyã 108 - WẼNNAAM SEBRE 2014

Ned sẽn gũud zĩ-yẽegre

¹ A Davɩɩd yɩɩlle.

² Mam Wẽnnaam, m sũur keemame! Mam na n yɩɩlame, mam na n yɩɩla ne yʋʋm-teed n waoog yãmba!

³ Bɩ mam ruudgã ne m pɛndgã neke, bala, m dat n maana noog n nek zĩ-yẽegre.

⁴ Sẽn-Ka-Saabo, mam na n pʋʋsa yãmb bark buud toay-toayã sʋka! Mam na n yɩɩl n waooga yãmb bu-zẽmsã sʋka.

⁵ Bala, yãmb nonglmã zãntlem yɩɩda sa-gãnã, la yãmb sɩdã zẽkd n tata sawatã.

⁶ Mam Wẽnnaam, bɩ yãmb kãosengã zʋʋg saasẽ! La bɩ yãmb ziirã bui dũniyã gilli!

⁷ Fãag-y tõnd ne y nug-rɩtgo, la y leok-do, tɩ yãmb nin-nongdsã tõe n paam yolsgo!

⁸ Wẽnnaam zĩnda b ro-sõngẽ wã n yeele: «Mam na n tõogame, mam na n pʋɩɩ Sɩkɛm, la m mak Sukot tẽn-nabdrã.

⁹ Galaad ne Manaase yaa maam n so. Efrayiim yaa mam zabr pugla, la Zʋʋda yaa mam naam dasaare.

¹⁰ Moaab yaa sĩng mam sẽn tar n sood koom. Mam lobda m neoodr Edom zugu. Mam kaasda zabr kaasg n segd Filistẽ dãmbã!»

¹¹ Ãnda n na n tall maam n tɩ kẽes tẽng sẽn tar pãng pʋgẽ? Ãnda n na n tall maam n ta Edom?

¹² Mam Wẽnnaam, yãmb dag n ka bas tõnd sɩda? Yãmb dag n ka bas n ka leb n yãagd tõnd tãb-biisã sɩda?

¹³ Bɩ y sõng-do, n yols-d ne d bɛyã! Ninsaalb fãagr yaa zaalem bala.

¹⁴ Wẽnnaam sã n be ne tõndo, tõnd na n maana tʋʋm-kãsemse. Yaa bãmb n na n sãam tõnd bɛɛbã.