Yɩɩn‑sõamyã 107 - WẼNNAAM SEBRE 2014

Bark pʋʋsg yɩɩlle

¹ Pʋʋs-y Sẽn-Ka-Saab bark tɩ b yaa sõngo, bala, bãmb nonglmã paada wakat fãa!

² Bɩ Sẽn-Ka-Saab sẽn fãag-b rãmbã yeel a woto. Bɩ Sẽn-Ka-Saab sẽn fãag neb nins b zabd-n-taasã nugẽ wã yeel a woto.

³ Yaa neb nins Sẽn-Ka-Saab sẽn yiis tẽms toor-toor n wa tigmã, b yiis-b-la dũniyã kɩrems a naasã fãa!

⁴ Bãmb dag n yeebda we-raoogẽ wã, n pãrgd zĩ-peen-daagã, la b rag n ka ne sor sẽn dabd tẽng b sẽn tõe n tɩ kẽ ye.

⁵ Kom ne ko-yũud dag n namsd-b lame, la b pãngã rag n sɛtame.

⁶ Bãmb yel-pakrã pʋga, b kelem n boola Sẽn-Ka-Saabo, la b fãag-b-la b yel-pakrã pʋga.

⁷ Sẽn-Ka-Saab kɩtame tɩ b rɩk sor sẽn yaa tɩrga, sor sẽn dabd tẽng b sẽn tõe n tɩ kẽ.

⁸ Bɩ b pʋʋs Sẽn-Ka-Saab bark b nonglmã yĩnga, ne bõn-bãn nins b sẽn maan ninsaalbã yĩngã yĩnga!

⁹ Bala, bãmb kõo ko-yũud sẽn dag n kʋʋd-b rãmbã koom tɩ b yũ, la b kõ kom sẽn dag n tar-b rãmbã rɩɩb tɩ b rɩ n tɩge.

¹⁰ Kẽer dag n bee lik ne kũum maasmẽ, la namsgo, ne bãens balgr pʋga.

¹¹ Bala, bãmb dag n kɩɩsa Wẽnnaam goamã, bãmb dag n paooga Sẽn-Ka-To saglgã.

¹² Wẽnnaam kɩtame tɩ b paam toog n yaool n sake. Bãmb lakame tɩ ned ka be n sõngd-b ye.

¹³ Bãmb yel-pakrã pʋga, b kelem n boola Sẽn-Ka-Saabo, la b fãag-b-la b yel-pakrã pʋga.

¹⁴ Sẽn-Ka-Saab yiis-b-la likã ne kũumã maasmẽ, n kao b balgrã.

¹⁵ Bɩ b pʋʋs Sẽn-Ka-Saab bark b nonglmã yĩnga, ne bõn-bãn nins b sẽn maan ninsaalbã yĩngã yĩnga!

¹⁶ Bala, bãmb kaoo zũud kʋɩlemsã, la b kao kut kʋɩlen-kuyã.

¹⁷ Kẽer maana yalemdo, n kẽes b mens namsg pʋga, b kɩɩsgã ne b yel-wẽnã yĩnga.

¹⁸ Bãmb yam yii rɩɩb buud fãa. Bãmb dag n pẽnega kũum dignoorẽ.

¹⁹ Bãmb yel-pakrã pʋga, b kelem n boola Sẽn-Ka-Saabo, la b fãag-b-la b yel-pakrã pʋga.

²⁰ Sẽn-Ka-Saab tʋma b gomdã t'a wa maag-ba. Sẽn-Ka-Saab fãag-b-la ne kũumã.

²¹ Bɩ b pʋʋs Sẽn-Ka-Saab bark b nonglmã yĩnga, ne bõn-bãn nins b sẽn maan ninsaalbã yĩngã yĩnga!

²² Bɩ b maan bark pʋʋsg maando, la b kaas ne sũ-noog n moon bãmb tʋʋmã!

²³ Neb nins sẽn dag n kẽed koom kogl-bɛd n togd soayã, la b tʋmd b tʋʋmã ko-kãsemsã zutã,

²⁴ yãnda Sẽn-Ka-Saab tʋʋmã, ne b bõn-bãnã ko-zulumsã pʋse.

²⁵ Sẽn-Ka-Saab gomame n kɩt tɩ sob-kãseng yik n zẽkd ko-pɛmã.

²⁶ Ko-pɛmã rag n zẽkda bãmb n kuiis yĩngri, n lebgd n sigd ne bãmb zĩ-zulumsẽ wã. La bãmb pelens yɩkame tɩ b yamã bondge.

²⁷ Bãmb nensã yilmame tɩ b tuumd wa rã-yũuda, la bãmb bãngrã fãa sɛɛme.

²⁸ Bãmb yel-pakrã pʋga, b kelem n boola Sẽn-Ka-Saabo, la b yiis-b-la b yel-pakrã pʋga.

²⁹ Sẽn-Ka-Saab kɩtame tɩ sob-kãsengã yõke, la b kɩt tɩ ko-pɛmã bas bʋrgo.

³⁰ Bãmb sũur yɩɩ noogo, sebgã ne ko-pɛmã sẽn yalsã yĩnga. La Sẽn-Ka-Saab tall-b lame n kẽng zĩig ning b sẽn dag n datã.

³¹ Bɩ b pʋʋs Sẽn-Ka-Saab bark b nonglmã yĩnga, ne bõn-bãn nins b sẽn maan ninsaalbã yĩngã yĩnga!

³² Bɩ b pẽg Sẽn-Ka-Saab nebã sʋka, la b waoog bãmb kãsem-dãmbã tiging pʋga.

³³ Sẽn-Ka-Saab n tõe tɩ kʋɩls lebg we-raoogo, la b tõe tɩ ko-bundum zĩis lebg tẽn-koɛɛnga.

³⁴ Bãmb n leb n tõe tɩ zĩig ning sẽn sakd bɩle lebg ware, b tẽngã nebã wẽnemã yĩnga.

³⁵ Sẽn-Ka-Saab tõe n teka we-raoogã t'a lebg ko-kãsenga, la b tõeeme tɩ zĩ-koeemsã lebg ko-bundum zĩisi,

³⁶ n kɩt tɩ kom sẽn tar-b rãmbã kẽng be, n tɩ me tẽng n kẽ.

³⁷ Bãmb na n bʋda pʋto, la b sel reezẽ tɩɩs sẽn na n wom wʋsgo.

³⁸ Sẽn-Ka-Saab na n ning-b-la barka, n kɩt tɩ b sõorã lebg wʋsgo, la b ka na n sak tɩ b rũmsã sõor boog ye.

³⁹ Neb a taab sõor boogdame n lebg bilfu, b sẽn be toog ne namsg pʋgẽ wã yĩnga.

⁴⁰ Sẽn-Ka-Saab n tõe n ning nin-kãsems yãnde, la b kɩt tɩ b yeebd weoogẽ n ka tar sor n tũudẽ ye.

⁴¹ Sẽn-Ka-Saab n yiisd naong soab a nimbãaneg pʋga, la b kɩtdẽ tɩ buudã fɩɩgd wa rũm-kʋʋngo.

⁴² Nin-tɩrsã na n yãnda bõn-kãng n kɩdem ne sũ-noogo, la gom-yood rãmbã na n muma b noyã.

⁴³ Bɩ sẽn tar-a yam gũus ne bõn-kãens fãa, n wʋm Sẽn-Ka-Saab nonglmã võore.