Yɩɩn‑sõamyã 106 - WẼNNAAM SEBRE 2014

Israyɛll kɩɩsgo

¹ Pẽg-y Sẽn-Ka-Saabo! Pẽg-y Sẽn-Ka-Saab tɩ b yaa sõngo. Bala, bãmb nonglmã paada wakat fãa!

² Ãnda n tõe n togs Sẽn-Ka-Saab pãng tʋʋmã n sɛ? Ãnda n na n wilg Sẽn-Ka-Saab waoogrã?

³ Bark bee neb nins sẽn kẽnd zemsg pʋga, la b maand tɩrlem wakat fãa wã zutu!

⁴ Sẽn-Ka-Saabo, tẽeg-y m yelle, yãmb sẽn maand y nebã neerã pʋga! Wa-y n sõng-y maam n fãag-ma,

⁵ n sõng-m tɩ m yãnd y nin-tũusdsã sũ-noogã, la m kɩdem y nebã sũ-noog yĩnga, la m naag neb nins sẽn yaa yãmb dẽndã n pẽg-yã!

⁶ Tõnd me beega wa d yaab-rãmbã, tõnd wẽnemdame n maan wẽnga, tõnd beegame.

⁷ Tõnd yaab-rãmbã sẽn zĩnd Ezɩpt tẽngã, b ka wʋm yãmb bõn-bãnã võor ye. Bãmb ka tẽeg yãmb nonglem-kãsengã yell ye. Rudum ko-kãsengã noore, b kɩɩsa yãmba.

⁸ La Sẽn-Ka-Saab baas n fãaga bãmba, b mengã yʋʋr waoogr yĩnga, tɩ nebã tõe n yãnd bãmb pãngã.

⁹ Sẽn-Ka-Saab tãsa rudum ko-kãsengã, la a kʋɩɩme, n kɩt tɩ d yaab-rãmbã pɩʋʋg kʋɩl-waokã koɛɛng wa we-raoogo.

¹⁰ Sẽn-Ka-Saab fãaga bãmb b kisgdbã nugẽ, la bɛɛbã ka tõog n maan-b bũmb ye.

¹¹ Koomã rɩɩ bãmb zabd-n-taasã zãnga, tɩ b ned ba a yembr ka põs ye.

¹² Bãmb tẽe Sẽn-Ka-Saab goamã, n yɩɩl n pẽg bãmba.

¹³ La b yĩma Sẽn-Ka-Saab tʋʋmã yell tao-tao, n ka yals n gũ tɩ Sẽn-Ka-Saab pids b saagrã ye.

¹⁴ We-raoogã pʋga, velem yõka bãmba. Bãmb maka Wẽnnaam zĩ-peen-daagẽ wã.

¹⁵ Wẽnnaam kõo bãmb b sẽn kosã, la b tʋm bãag n kɩt tɩ b faage.

¹⁶ Sik zĩigẽ wã, tõnd yaab-rãmbã maana sũ-kiir ne a Moyiisi, la ne a Aarõ, Sẽn-Ka-Saab sẽn welg-a soab toorã.

¹⁷ Tẽn-gãongã yaaga a noor n vel a Datã, tẽn-gãongã munumsa a Abiram poorẽ dãmbã.

¹⁸ Bugum dɩɩ bãmb nebã. Bug-witim dɩɩ nin-wẽnsã.

¹⁹ Horɛɛb tãngã zugu, bãmb maana nag-bila, n wõgemd kutã b sẽn yõgã taoore.

²⁰ Bãmb dɩka Wẽnnaam ziirã, n tek ne naaf sẽn wãbd yamdã.

²¹ Bãmb yĩma Wẽnnaam sẽn yaa b fãagdã sẽn dag n maan bõn-kãsems Ezɩpt tẽngã yelle.

²² Wẽnnaamã maana bõn-bãn a Sam tẽngẽ wã, la b maan tʋʋm-yɛɛsds rudum ko-kãsengẽ wã.

²³ Wẽnnaam yeelame tɩ b na n menes-b lame, la b nin-tũusdg a Moyiis bal n na n põse. A Moyiis yõka Wẽnnaam sɛɛga, n na n kos-b tɩ b sik b sũuri, la b ra sãam nebã ye.

²⁴ Tõnd yaab-rãmbã zãgsa tẽn-noogã. Bãmb ka tẽ Sẽn-Ka-Saab gomdã ye.

²⁵ Bãmb pa b fu-rotẽ wã n yẽgme, n ka kelg Sẽn-Ka-Saab koɛɛgã ye.

²⁶ La Sẽn-Ka-Saab zẽka b nug n wẽen n yeel tɩ b na n kɩtame tɩ bãmb pa we-raoogã pʋga.

²⁷ La b fẽrg bãmb yagensã bu-zẽmsã sʋka, n kɩt tɩ b sãeeg tẽmsã fãa pʋse.

²⁸ Bãmb yam loee ne Baall-Pewoore, la b wãba maand b sẽn kʋ kɩɩms yĩng nemdo.

²⁹ Bãmb manesmã puugã Sẽn-Ka-Saab sũuri, tɩ b kɩt tɩ bã-loangdg yõk-ba.

³⁰ La a Fineyaas yikame n maneg yellã, n kɩt tɩ bã-loangdgã yalse.

³¹ Dẽ, b geelga a Fineyaas manesmã wa tɩrlem, zamaan woo zamaane, la wakat fãa yĩnga.

³² Bãmb sẽn wa n be Meriba koomã noorã, b yika Sẽn-Ka-Saab sũurã. La bãmb manesmã waa ne yell a Moyiis zugu.

³³ Bala, bãmb maaname t'a Moyiis sũurã yiki, t'a gom n ka yals n tags ye.

³⁴ Bãmb ka sãam buud nins Sẽn-Ka-Saab sẽn dag n yeel tɩ b sãamã ye.

³⁵ Bãmb rɩka b meng n fãoog ne bu-zẽmsã, n zãms tɩ maan wa bãmba.

³⁶ Bãmb waooga bu-zẽmsã wẽn-naandsã, tɩ rẽ lebg bẽdg b yĩnga.

³⁷ Bãmb dɩka b kom-dibli la b kom-pugli n maan maand n kõ zĩn-dãmba.

³⁸ Bãmb daaga neb sẽn ka tar yell zɩɩm, yaa b kom-dibli wã ne b kom-pugli wã zɩɩm. Bãmb dag n dɩkda bãmb n maand maoong n kõt Kana tẽng wẽn-naandsã, n kɩt tɩ tẽngã rẽgem zɩɩmã raagr yĩnga.

³⁹ Bãmb maana tʋʋm-dẽgd n dẽgem b mense. Bãmb manesmã yaa wa yoobo.

⁴⁰ Sẽn-Ka-Saab sũur yika ne b nebã, tɩ b kisg neb nins sẽn yaa bãmb dẽndã.

⁴¹ Sẽn-Ka-Saab bas-b lame tɩ bu-zẽms tõog-ba. Bãmb kisgdbã sooga bãmba.

⁴² Bãmb bɛɛbã namsa bãmba, n kɩt tɩ b paam paoogre.

⁴³ La naoor wʋsgo, Sẽn-Ka-Saab fãaga d yaab-rãmbã. La bãmb kell n kɩɩsame, n sud b yel-wẽnã pʋga.

⁴⁴ Sẽn-Ka-Saab sẽn wʋm bãmb kelemsã, b yãnda b yel-pakrã.

⁴⁵ Sẽn-Ka-Saab tagsa b kaoolã b sẽn maan ne bãmbã yelle, la bãmb nonglem-kãsengã pʋga, b zoee bãmb nimbãanega.

⁴⁶ Sẽn-Ka-Saab kɩtame tɩ neb nins fãa sẽn kẽes bãmb yembdã zoe bãmb nimbãanega.

⁴⁷ Sẽn-Ka-Saab sẽn yaa tõnd Wẽnnaam, fãag-y-do! Yiis-y tõnd bu-zẽmsã sʋka, n lebs n tigim-du, tɩ d tõe n balem yãmb yʋ-sõngã, tɩ tõnd zu-zẽkrã yɩ yãmb waoogr yĩnga!

⁴⁸ Bɩ Sẽn-Ka-Saab sẽn yaa Israyɛll Wẽnnaamã paam pẽgr wakat fãa, la wakat sẽn kõn sɛ yĩnga! Bɩ nebã fãa yeel yaa: «Ãmina! Pẽg-y Sẽn-Ka-Saabo!»