Yɩɩn‑sõamyã 105 - WẼNNAAM SEBRE 2014

Bõn-bãn Sẽn-Ka-Saab sẽn maane

¹ Bɩ y waoog Sẽn-Ka-Saabo, la y zẽk bãmb yʋʋrã! Kɩt-y tɩ nebã bãng bãmb tʋʋm-kãsemsã!

² Yɩɩl-y bãmb yĩnga, pʋd-y yɩɩl bãmb yĩnga! Tags-y bãmb tʋʋm-kãsemsã fãa yelle!

³ Maan-y sũ-noog bãmb yʋ-sõngã yĩnga! Bɩ sẽn baood-b Sẽn-Ka-Saabã maan sũ-noogo!

⁴ Bao-y Sẽn-Ka-Saabo, bao-y bãmb pãngã, bao-y bãmb wakat fãa!

^5-6 Yãmb sẽn yaa bãmb tʋmtʋmd a Abrahaam yagensã, yãmb sẽn yaa a Zakoob yagense, n yaa bãmb nin-tũusdsã! Tẽeg-y bõn-yɛɛsds nins bãmb sẽn maanã yelle, tẽeg-y bõn-kãsemsã ne b bʋ-kaoorã yelle!

⁷ Bãmb yaa Sẽn-Ka-Saabo, n yaa tõnd Wẽnnaam. Bãmb yaa dũniyã gill fãa bʋ-kaooda.

⁸ Bãmb tẽra b kaoolã yell wakat fãa, la b tẽr b gomdã b sẽn yeel zamaan tusr yĩngã yelle.

⁹ Bãmb tẽra kaool ning b sẽn maan ne a Abrahaamã yelle, la wẽeneg ning bãmb sẽn wẽen ne a Izakã yelle.

¹⁰ Bãmb vigla kaool-kãng tɩ yɩ noor a Zakoob yagensã yĩnga, la kaool Israyɛll nebã yĩng wakat fãa

¹¹ n yeele: «Mam na n kõo foom Kana tẽngã tɩ yɩ yãmb pʋɩɩre.»

¹² Bãmb sõorã rag n ka waoog ye, bãmb dag n yaa neb bilf bala. Bãmb dag n yaa sãamb beenẽ.

¹³ Bãmb dag n yita buud a to sʋka, n kẽng buud a to sʋka, la b yit soolem a to n kẽng neb a taab nengẽ.

¹⁴ La Sẽn-Ka-Saab ka bas tɩ ninsaal ba a yembr nams-b ye. Bãmb lenga rĩm-dãmb bãmb yĩnga, n yeele:

¹⁵ «Da saag-y n sɩɩs-y mam nin-tũusdsã ye, la y ra maan mam no-rɛɛsdbã wẽng ye!»

¹⁶ Bãmb kɩtame tɩ kom kẽ tẽngã, n kɩt tɩ rɩɩb buug ka leb n beẽ ye.

¹⁷ B tʋma ned t'a reng bãmb taoore, a Zozɛf b sẽn koos t'a yɩ yambã.

¹⁸ B balga yẽnda naoã ne bãense, la b sog a yublã ne kutu,

¹⁹ hal n tãag daar ning Sẽn-Ka-Saab gomdã sẽn pidsã, hal tɩ ta wakat ning Sẽn-Ka-Saab gomdã sẽn wilg t'a ka tar yellã.

²⁰ Rĩma kõo noor tɩ b baag a Zozɛf bãensã, soolmã nebã naab kɩtame tɩ b yiis-a n base.

²¹ Rĩmã kɩtame t'a Zozɛf lebg yẽnda zakã zu-soaba, la a yɩ yẽnda bũmbã fãa soaala.

²² La a kɩtame t'a nanambsã sakd a Zozɛfe, t'a Zozɛf zãms a kãsem-dãmbã yam.

²³ Dẽ, Israyɛll nebã waa Ezɩpt tẽnga, la a Zakoob tɩ zĩnda sãand weoog a Sam tẽnga.

²⁴ Sẽn-Ka-Saab kɩtame tɩ Israyɛll buudã fɩɩge, n kɩt tɩ b paam pãng n yɩɩd b bɛɛbã.

²⁵ Sẽn-Ka-Saab wẽnemda Ezɩpt nebã sũyã, n kɩt tɩ b kisg Israyɛll sẽn yaa bãmb nebã, n maan bãmb tʋmtʋmdbã zãmbo.

²⁶ Sẽn-Ka-Saab tʋma bãmb tʋmtʋmd a Moyiis ne a Aarõ bãmb sẽn yãkã,

²⁷ n kɩt tɩ b maan bãn Ezɩpt nebã sʋka, la bõn-bãn a Sam tẽngã pʋga.

²⁸ Sẽn-Ka-Saab tʋma lika, tɩ zĩigã fãa lebg lik bida. La nebã ka kɩɩs Sẽn-Ka-Saab goamã ye.

²⁹ Sẽn-Ka-Saab teka Ezɩpt tẽngã koomã tɩ lebg zɩɩm tɩ b zĩmã ki.

³⁰ La b kɩt tɩ loms wa pid tẽngã, lomsã tol n kẽe Ezɩpt rĩm-dãmbã ro-gãasẽ.

³¹ Wẽnnaam gomame, la kɛooda waame, la b kɩtame tɩ rũm-pigli wa pid b soolmã zãnga.

³² Sẽn-Ka-Saab kɩtame tɩ sapɩlem ni, la b kɩt tɩ bug-witim sig Ezɩpt tẽngã zugu.

³³ B sãama bãmb reezẽ tɩɩsã ne b kankamsã, Ezɩpt soolmã tɩɩsã fãa kaoome.

³⁴ Bãmb leb n gomame, la kalwaar ne kitrzĩgnis sẽn ka tar sõor waame.

³⁵ Bãmb wa n dɩɩ b tẽngã moodã zãnga, la b rɩ tẽngã bõn-koaadl zãnga.

³⁶ Sẽn-Ka-Saab kʋʋ Ezɩpt tẽngã kom-dibl-rẽemsã fãa, kom-dibl-rẽemsã sẽn yaa bãmb buudã pãng sɩngrã.

³⁷ Sẽn-Ka-Saab kɩtame tɩ Israyɛll nebã loog ne wanzuri la sãnem, Israyɛll buudã pʋga, la bãmb ned ba a yembr ka pa poorẽ ye.

³⁸ Israyɛll nebã loogr kõo Ezɩpt nebã sũ-noogo, bala, Israyɛll nebã rabeem rag n tar-b lame.

³⁹ Sẽn-Ka-Saab yɛdga sawadg n lud Israyɛll nebã, la yʋngo, sawadgã wita bugum n kõt vẽenem.

⁴⁰ Israyɛll nebã kosgã yĩnga, Sẽn-Ka-Saab waa ne kodense, la b kɩt tɩ rɩɩb yi yĩngr n sigi, tɩ Israyɛll nebã rɩ n tɩge.

⁴¹ Sẽn-Ka-Saab kɩtame tɩ pĩig pusg tɩ koom zoe. Koomã zoeeme n yɛdg tẽn-koɛɛngã zug wa kʋɩlga.

⁴² Bala, bãmb tẽega b gom-sõng ning b sẽn dag n gom ne b tʋmtʋmd a Abrahaamã.

⁴³ Sẽn-Ka-Saab kɩtame tɩ b nebã yi n loog ne kɩdengo. Bãmb kɩtame tɩ b nin-tũusdsã loog ne sũ-noog kaasgo.

⁴⁴ Sẽn-Ka-Saab reesa bu-zẽms tẽms n kõ bãmba. Buud a taabã tʋmame tɩ Israyɛll nebã tɩ rɩ a yõodo,

⁴⁵ sẽn na n yɩlẽ tɩ b tũ bãmb noyã, la b sak bãmb tõodã. Pẽg-y Sẽn-Ka-Saabo!