Yɩɩn‑sõamyã 103 - WẼNNAAM SEBRE 2014

Sẽn-Ka-Saab maanda bõn-neeba

1 A Davɩɩd yɩɩlle.

¹ A Davɩɩd yɩɩlle. Mam na n pẽga Sẽn-Ka-Saabo! Bɩ bũmb nins fãa sẽn be mam pʋgẽ wã pẽg bãmb yʋ-sõngã!

² Mam na n pẽga Sẽn-Ka-Saabo, la m kõn tol n yĩm bãmb maan-neer ba a yembr yell ye!

³ Bãmb n kõt maam sugr m beegrã fãa yĩnga, bãmb n maagd mam bãasã fãa.

⁴ Bãmb n fãagd maam ne yaoogo, la b wilgd maam b nonglem ne b nimbãan-zoeere.

⁵ Bãmb n tɩgsd mam vɩɩmã ne sõmblem, n kɩtdẽ tɩ m todemd wa pa-nand-tugri.

⁶ Sẽn-Ka-Saab kaooda bʋʋd ne tɩrlem, bãmb sõngda b sẽn namsd-b rãmbã fãa.

⁷ Bãmb wilga a Moyiis b soayã, la b wilg Israyɛll nebã bãmb tʋʋm-kãsemsã.

⁸ Sẽn-Ka-Saab yaa nimbãan-zoeer soaba, la maan-neer soaba, bãmb tara sũ-maasem, la b nonglem yaa kãsenga.

⁹ Bãmb ka zabd ne ned n zãage, la b ka yikd b sũur n ka basdẽ ye.

¹⁰ B ka sɩbgd tõnd wa sẽn zems d yel-wẽnã ye. B ka lebsd tõnd wa sẽn zems d kongrã ye.

¹¹ Sẽn-Ka-Saab nonglmã b zoɛtbã yĩngã zãntlem yaa wa yĩngrã ne tẽngã sẽn zãnt ne taab to-to wã.

¹² Yaang ne nin-taoor sẽn zãr ne taab to-to wã, Sẽn-Ka-Saab zãagda tõnd ne d beegrã me a woto.

¹³ Ba sẽn zoet a kamb nimbãaneg to-to wã, Sẽn-Ka-Saab zoeta sẽn zoet-b bãmbã nimbãaneg me a woto.

¹⁴ Bãmb mengã mi b sẽn tall bũmb ning n naan tõndo. Bãmb tẽrame tɩ tõnd yaa tẽng tom.

¹⁵ Ninsaal vɩɩmã wẽnda wa moodo, a ningda puud wa weoog tɩ-puudu.

¹⁶ La sobg sã n wẽ-a bilfu, a menemdame, tɩ b ka leb n mi a sẽn dag n beẽ wã ye.

¹⁷ La Sẽn-Ka-Saab nonglmã ne neb nins sẽn zoet bãmbã paada zamaan woo zamaane. Bãmb tɩrlmã yaa b zoɛtbã yagens yĩnga,

¹⁸ la neb nins sẽn ka basd-b bãmb kaoolã, la b tẽr b no-tũudsã, n sakd-bã yĩnga.

¹⁹ Sẽn-Ka-Saab vigla b naam geer saasẽ, la bũmb fãa yaa bãmb n so.

²⁰ Yãmb fãa sẽn yaa Sẽn-Ka-Saab malegse, n yaa gãndaad n tar pãnga, n kelgd bãmb goamã la y sakd-bã, pẽg-y Sẽn-Ka-Saabo!

²¹ Yãmb fãa sẽn yaa bãmb saasẽ tãb-biisi, la bãmb tʋmtʋmdb n maand bãmb daabã, pẽg-y Sẽn-Ka-Saabo!

²² Yãmb fãa sẽn yaa Sẽn-Ka-Saab sẽn naane, n be zĩig fãa bãmb soolmã pʋgã, pẽg-y Sẽn-Ka-Saabo! Mam na n pẽga Sẽn-Ka-Saabo!