Yɩɩn‑sõamyã 102 - WẼNNAAM SEBRE 2014

Ned sẽn pʋʋsd a toog pʋga

¹ Nimbãan-ned pãng sẽn sɛ, t'a be Sẽn-Ka-Saab taoor n pʋʋsd n kot sõngre.

² Sẽn-Ka-Saabo, kelg-y mam pʋʋsgã, bɩ m sẽn kelemd n kot-y sõngrã lʋɩ y tʋbrẽ.

³ Mam yel-pakrã wakate, bɩ y ra solg y nengã ne-m ye! Kɩll-y y tʋbr n kelg maam wakat ning m sẽn boond-y yã! Bɩ y leok maam tao-tao.

⁴ Bala, mam dasmã loogda wa bug-zõose, tɩ mam kõabã yõogd wa bug-saala.

⁵ Mam sũurã bõdmame n kʋɩ wa moodo. Mam tol n yĩmda m dɩɩb yelle.

⁶ Mam sidgame hal tɩ m yĩn-gãongã tabend m kõabã.

⁷ Mam wẽnda bakaorg sẽn be we-raoogẽ, mam wẽnda wa we-yũug sẽn be raboodẽ.

⁸ Gõeem ka tol n leb n be m ninẽ ye. Mam wẽnda luiil sẽn zao roog zug a yembre.

⁹ Mam bɛɛbã tʋʋda maam daar fãa. Neb nins sũy sẽn puud ne maamã kãabda neb a taabã n yetẽ tɩ Wẽnd na kɩt tɩ b yɩ wa maam.

¹⁰ Tompeglem n lebg m dɩɩbo, mam nintãm kalemda m ko-yũudum,

¹¹ yãmb sũ-puugrã ne y sũ-kãbrã yĩnga. Bala, yãmb dɩka maam n lobg yɩɩga.

¹² Mam vɩɩmã loogda wa maasem, mam kʋɩta wa moodo.

¹³ La yãmb a Sẽn-Ka-Saab rɩta naam wakat sẽn kõn sa, la b na n tẽra yãmb yell zamaan woo zamaane.

¹⁴ Yãmb na n yikame n zoe Sɩyõ nimbãanega. Bala, wakat taame tɩ y tog n paam nimbãan-zoeer a yĩnga, wakat ning yãmb sẽn yãkã taame.

¹⁵ Bala, tõnd sẽn yaa yãmb tʋmtʋmdbã nonga Sɩyõ kugã. Sɩyõ tomã nimbãaneg tara tõndo.

¹⁶ Buudã fãa na n zoee Sẽn-Ka-Saab yʋʋrã. Dũniyã rĩm-dãmb fãa na n pẽga yãmb ziirã.

¹⁷ Bala, Sẽn-Ka-Saab lebs n mee Sɩyõ. Sɩyõ ziirã leb n pukdame.

¹⁸ Bãmb na n leoka nimbãan-nebã pʋʋsgo, la b na n sak n deega b kosgã.

¹⁹ Bɩ b gʋls bõn-kãng n bĩng zamaan sẽn watã yĩnga! La b sẽn na n lebs n naan neb ninsã na n pẽga Sẽn-Ka-Saabo!

²⁰ Sẽn-Ka-Saab be b zĩ-sõngẽ wã saasẽ, n sulg n get dũniyã.

²¹ Bãmb kelgda sẽn be-b bi-bees roogã sidgri. Bãmb dat n fãaga b sẽn dat n kʋ-b rãmbã,

²² tɩ b tõe n moon Sẽn-Ka-Saab yʋʋrã Sɩyõ pʋgẽ, la b kɩt tɩ bãmb pẽgrã saag Zeruzalɛm pʋgẽ,

²³ daar ning buud toay-toayã ne soolem toay-toayã sẽn na n naag taab n waoog Sẽn-Ka-Saabã.

²⁴ Sẽn-Ka-Saab booga mam pãngã m vɩɩmã wakate, bãmb kʋʋga mam yʋʋmã sõore.

²⁵ Rẽ n kɩt tɩ m yeele: «Mam Wẽnnaam, yãmb vɩɩ zamaan woo zamaane! Dẽ wã, bɩ y ra reeg m vɩɩmã a sẽn wat n be a pʋɩ-sʋkã ye.»

²⁶ Yãmb n naan dũniyã hal sɩngr wẽndẽ, la saasẽ yaa yãmb nus tʋʋmã.

²⁷ Bãmb loogdame, la yãmb paadame. Bãmb fãa na n kʋdga wa fuugu. Yãmb na n teka bãmb wa fuugu, la b na n tekame.

²⁸ La yãmb a Sẽn-Ka-Saab ka tekd ye. Yãmb yʋʋmã ka sɛt ye.

²⁹ Yãmb tʋmtʋmdbã kamb na n paama zĩiga, la b yagensã na n paama pãng yãmb taoore.