Yɩɩn‑sõamyã 10 - WẼNNAAM SEBRE 2014

Ka-pãng soab pʋʋsgo

¹ Sẽn-Ka-Saabo, yaa bõe tɩ y zãagd y meng ne-ma? Bõe yĩng tɩ y solgd y meng ne maam m yel-pakr wakate?

² Nin-wẽnsã wuk-m-mengã pʋga, b namsda naong rãmba, bãmb sɩlem-wẽngã n wẽnegd n lubd-ba.

³ Bala, nin-wẽng pẽgda a meng a sũur datem yĩnga. A zãmb paoongã yĩnga, a tʋʋsda Sẽn-Ka-Saab n paoogd-ba.

⁴ Nin-wẽng wukda a meng n yetẽ: «Wẽnnaam ka sokd ned a sẽn maan ye!» Yẽnda tagsgã fãa pʋgẽ, a yetame: «Wẽnnaam ka be ye.»

⁵ Nin-wẽng paamda tõogr wakat fãa. La Wẽnnaam bʋ-kaoorã zãra ne a wʋmbo. Yẽnda pursda a bɛɛbã fãa.

⁶ Yẽnda tagsda a sũurẽ n yetẽ: «Bũmb kõn tol n miim maam ye. Zamaan woo zamaane, yel-beed kõn tol n paam maam ye.»

⁷ Yẽnda noorã pida ne kãab-wẽnga, la zĩrẽ yagbo. Yẽnda maanda neb a taab pãnga. Yẽnda zelemdã yiisda pʋ-toog ne wẽnem.

⁸ Yẽnda kẽnd n soondeda tẽn-bãoonegẽ, n yit n kʋʋd neb sẽn ka tar yelle. Yẽnda nin gũusda ka-pãens-rãmbã.

⁹ Yẽnda wũga a soondgã zĩigẽ, wa gɩgemd sẽn be tʋgrẽ, yẽnda sorame n dat n ling naong soab n yõke. Yẽnda lingda nimbãan-ned n yõk-a ne a gãmbrã.

¹⁰ Yẽnda wõgemdame n vũnumdẽ, n na n yɩk n yẽeg ka-pãens rãmbã.

¹¹ Yẽnda yeta a sũur pʋgẽ: «Wẽnnaam yĩmdame, bãmb wẽnemdeda b neng n ka tol n getẽ ye.»

¹² Sẽn-Ka-Saab sẽn yaa mam Wẽnnaam, yik-y-yã! Zẽk-y y nugu! Da-y yĩm-y nimbãan-nebã yell ye.

¹³ Bõe yĩng tɩ nin-wẽng tar Wẽnnaam n paoogdẽ? Yẽnda yeta a sũurẽ: «Wẽnnaam ka na n sɩbg-m ye.»

¹⁴ Sẽn-Ka-Saabo, yãmb nee nimbãan-nedã toogã ne a namsgã, yãmb get-a lame n dat n deeg a yellã n manege. Nimbãan-nedã basda a yellã ne yãmba, Yãmb n yaa kɩɩbs sõangda.

¹⁵ Kao-y nin-wẽngã ne tʋʋm-wẽns maandã kamse, sɩbg-y-ba, tɩ y sã n wa baood b wẽnemã, bɩ y ra tol n yãnd-a ye!

¹⁶ Sẽn-Ka-Saab yaa rĩm daar fãa, la wakat sẽn kõn sa. Bu-zẽmsã menema b soolmẽ wã.

¹⁷ Sẽn-Ka-Saabo, yãmb wʋmda nimbãan-dãmbã ratem! Yãmb kengda bãmb pelse, la y kɩllda y tʋbr n kelgd-ba,

¹⁸ n na n kao kɩɩbs ne sẽn namsdbã bʋʋd tɩrga, Sẽn na n yɩlẽ tɩ ninsaal buud fãa sẽn be dũniyã ra leb n kẽes a to rabeem ye.