Yelbũna 9 - WẼNNAAM SEBRE 2014

Yam n boonde

¹ Yam me a roogo, n lugl a ra-lugds a yopoe,

² Yẽnda kʋ a rũng la a segl a reezẽ rãam, la a maneg a rɩɩb taabl n dɩgle.

³ Yẽnda tʋma a tʋmtʋmd-pogsã tɩ b kẽng tẽngã kunkubã zut n moondẽ n yetẽ:

⁴ «Yãmb a zɩtba, wa-y-yã!» La a yet yalembã yaa:

⁵ «Wa-y n dɩ-y m dɩɩbã, la y yũ m reezẽ rãamã m sẽn seglã.

⁶ Bas-y y yalemdã n paam n vɩɩmde. Bɩ y tũ-y bãngr sore.

⁷ Sẽn sagend-a nin-paoogdbã paamda paoogre, la sẽn keoogd-a nin-wẽng paamda tʋʋsgo.

⁸ Ra keoog nin-paoogd t'a na n kisg-f lame, bɩ f keoog yam soab t'a na n nong-f lame.

⁹ Wilg yam soaba, t'a na n paama yam n paase. Zãms nin-tɩrga, la a na n paama bãngr n paase.

¹⁰ Sẽn-Ka-Saab zoees yaa yam sɩngre, la ned sã n mi Pʋ-Peelem-Soabã, a tara bãngre.

¹¹ Bala, yaa maam n na n kɩt tɩ f rasmã sõor yɩ wʋsgo, la m kɩt tɩ f paam yõ-woko.

¹² Fo sã n tar yam, f yamã nafda f menga, la f sã n yaa nin-paoogda, yaa foom bal la na n wʋme.

¹³ Pʋg-yalem yaa fir-firi. A ka mi baa fɩ, a ka wʋmd baa fɩ.

¹⁴ Yẽnda zĩ a roogã noore, yẽnda zaoo tẽngã kunkubã zut ne a goeele,

¹⁵ n boond so-loaadbã sẽn dɩk-b sorã n loogdẽ wã n yetẽ yaa:

¹⁶ Yãmb a zɩtbã, lebg-y n wa-y ka!» La yẽnda yeta yam-kaalg rãmbã yaa:

¹⁷ «Wagdem bõn-yũudl noomame, la rɩɩb sẽn soosd n dɩtẽ me sakda velbo.»

¹⁸ La nin-bãmb ka mi tɩ b rigda kũum zĩigẽ ye. Bãmb ka mi tɩ pʋg-kãngã sẽn dag n bool-b rãmbã bee kɩɩm-kulg ye.