Yelbũna 7 - WẼNNAAM SEBRE 2014

Pʋg-yoodr yel-manesem

¹ M biiga, tall m goamã neere, la f ra yĩm m noyã ye.

² Bɩ f tall m noyã neer n paam vɩɩmde, la f gũus ne m zãmsgã neer wa f nin-beellã.

³ Pid bãmb f nug-biẽ, la f gʋls bãmb f sũurẽ.

⁴ Yeel yam yaa: «Fo yaa mam tão-poaka,» la f bool bãngr tɩ f roagda.

⁵ Woto, b na n gũu foom ne f to paga, la ne pʋg-sãang sẽn gomd no-noom goamã.

⁶ Mam dag n yɛsa m doog võorẽ, n lɩkdẽ n get yɩnga.

⁷ La mam yãnda kom-bɩɩsã sʋk ned a yembr sẽn yaa yam-kaalg soaba. Mam yãame tɩ ned a yembr bãmb sʋkã ka tar yam ye.

⁸ Yẽnda rag n tũuda sor sẽn yeg pʋg-yoodrã sẽn beẽ wã. Yẽnda bʋdgame n dɩk pʋg-yoodrã zak sore.

⁹ Rag n yaa zaabre, zĩ-sobd wakate. Zĩigã rag n sobgame tɩ lebg lika.

¹⁰ La ade, pag n yi n seg yẽnda, la a futã yermã yaa pʋg-yoodr fut yerem, n tar sɩlem tagsg a sũurẽ.

¹¹ A nonga goam n ka zoet yãnd ye, la a ka tõe n zĩnd zakẽ ye.

¹² A sã n ka be soayã zutu, a bee raasẽ wã, bɩ sotiisẽ n gũudẽ.

¹³ Ade, yẽnda gãda bi-bɩɩgã n moka, la a kenga a sũur n yeel bi-bɩɩgã yaa:

¹⁴ «Mam dag n pʋlmame n na maan zems-n-taar maoongo. Dẽ, yaa rũndã la mam pids pʋlen-kãnga.

¹⁵ Yaa rẽnda yĩng la m sẽn yi n na n seg foomã. Mam dag n baood-f lame la m yãnd-f lame.

¹⁶ Mam manega m gãagã n tɩʋ, yaa peen-neeb sẽn wʋg ne lamd gĩs sẽn yi Ezɩpte.

¹⁷ La mam yuga m gãagã ne parfẽ buud toor-toor sẽn tar yũ-noogo.

¹⁸ Bɩ f wa tɩ d maan nonglem ne taab tɩ beoog vẽege, la d maan nonglem sũ-noog ne taaba.

¹⁹ Bala, mam sɩdã ka be yir ye, a toga so-woko.

²⁰ A zɩɩ ligd wʋsg ne korg n looge, la a ka na n wa tɩ ka ki-peoolgã sasa ye.

²¹ A no-noomã yĩnga, a tõoga bi-bɩɩgã, la a no-minimã yĩnga, bi-bɩɩgã saka a sẽn datã.

²² Dẽ, tao-tao bala, bi-bɩɩgã wẽnemdame n pʋg-a n looge, wa naaf b sẽn tar n dabd kʋʋbo, la wa b sẽn sẽb yalem n dabd sɩbgre,

²³ hal tɩ peemd n wa kõs yẽnda n sãag t'a ki, wa luiil sẽn yɩk n tɩ lʋɩ tãoogẽ, n ka mi tɩ na n tũ ne a yõor ye.

²⁴ Dẽ wã yĩnga, m kamba, kelg-y maam neere, la y tags m goamã yell neere.

²⁵ Bɩ f ra bʋdg n tũ pag a woto buud ye, la f ra tũ soay nins a sẽn tũudã n wa menem ye.

²⁶ Bala, yẽnda kɩtame tɩ neb wʋsg lʋɩ. La neb nins yẽnda sẽn kʋ wã rag n tara pãense.

²⁷ La yẽnda zakã yaa kɩɩm-kulg sore, la yaa sor sẽn dabd kũum zĩigẽ.»