Yelbũna 4 - WẼNNAAM SEBRE 2014

Yam nafre

¹ M kamba, sak-y y ba remsgo, Kelg-y neer n paam bãngre.

² Bala, mam kõo yãmb zãms-sõngo, dẽ, bɩ y ra bas-y m zãmsgã ye.

³ Sɩdã, mam me rag n yaa biig tɩ m ba so-ma, la m yɩɩ m ma bi-yend a sẽn dag n nonge.

⁴ La m ba rag n sagenda maam n yetẽ: «Bĩng m noyã neer f sũurẽ. Tall m tõodã n paam n vɩɩmde.

⁵ Bao yam ne bãngre, ra yĩm mam goamã, la f ra wẽnemd n bas-b ye.

⁶ Bɩ f ra bas yam t'a na n gũ-f lame. Nong-a t'a na n kogl-f lame.

⁷ Fo sã n dat n yɩ yam soaba, bɩ f bao yam. La f maan f sẽn tõe tɛk fãa n bao bãngre.

⁸ Waoog-a t'a na n kɩtame tɩ f yɩ nin-kãsenga. Fo sã n gãd-a neere, a na n kõ-f-la ziiri.

⁹ A na n fõgna f zugã ne sõmblem maanfo, la a fõgen f zugã ne maanf sẽn tar ziiri.

Ra maan wa nin-wẽnsã ye

¹⁰ M biiga, kelg la f reeg m goamã, n paam yõ-woko.

¹¹ Mam zãmsa foom yam sore, Mam tall-f lame n tɩ kẽes tɩrlem soay zutu.

¹² Woto, bũmb kõn gɩdg f kẽnd ye, la f sã n zoetẽ, f kõn lak bũmb ye.

¹³ Sak m demsgã neere, n da bas-a ye. Tall-a t'a na n kõ-f-la vɩɩm.

¹⁴ Ra maan wa nin-wẽnsã ye, la f ra rɩk tʋʋm-wẽns maandbã sor ye.

¹⁵ Gil-a, la f ra tũ-a ye, loog la f bas-a!

¹⁶ Bala, bãmb ka gãanded n gũs tɩ b ka reng n maan wẽng ye. Bãmb sã n ka maan ned pʋ-toogo, b ka tõe n gũs ye.

¹⁷ Bala, wẽng maaneg yaa bãmb dɩɩbo, la pʋ-toogã yaa bãmb bõn-yũudla.

¹⁸ La nin-tɩrsã sor wẽnda wa sõor sẽn pukdi, t'a vẽenemã paasdẽ, hal n wa ta wĩnto-sʋka.

¹⁹ La nin-wẽnsã sor yaa wa yʋngo, bãmb ka mi bũmb ning sẽn na n lub bãmbã ye.

Yel-manesem-sõngo

²⁰ M biiga, kelg m goamã neere, la f yok f tʋb n kelg m saglsã,

²¹ Ra tol n yĩm m saglsã ye, tall bãmb f sũurã pʋgẽ kãenkãe.

²² Bala, b kõta neb nins fãa sẽn deegd bãmbã vɩɩm, la b kõt yĩnsã fãa laafɩ.

²³ Maan gũusg ne f sũurã tagsg n yɩɩd bũmb fãa, bala, ninsaal vɩɩm yita a sũur pʋgẽ.

²⁴ Da sak tɩ f noor gom zĩrẽ goam ye, la bɩ f zãag f noorã ne zãmb goamã.

²⁵ Bɩ f ninã ges f taoore, la bɩ f gesgã tees tɩrg f taoore.

²⁶ Maneg sor ning fo sẽn tũudã, tɩ f soayã fãa tõe n yɩ sõama.

²⁷ Ra bʋdg n leb goabg bɩ rɩtg ye, zãag f meng ne wẽnga.