Yelbũna 31 - WẼNNAAM SEBRE 2014

Saglg rĩm yĩnga

¹ Woto yaa sagls rĩm a Lemuwɛll ma sẽn sagl-a.

² M biiga, m na n yeela foom tɩ bõe? Mam meng bi-nongre, m na n yeela foom tɩ bõe? Mam pʋleng biiga, m na n yeela foom tɩ bõe?

³ Da sɛɛs f pãng ne pagb ye, la f ra rɩk f meng n kõ sẽn wãad-a rĩm-dãmb ye.

⁴ Lemuwɛlle, ka segd tɩ rĩm yũ rãam, la ka segd me tɩ nanambs me yũ rã-toos ye.

⁵ B sã n yũ, b tõe n wa yĩma no-tũuds nins b sẽn viglã, n ka zoe naong rãmb nimbãaneg ye.

⁶ Bɩ b bao rã-toos n kõ sẽn dɩk-b kũum sore, la b kõ sẽn zĩ-a ne sũ-toogã reezẽ rãam,

⁷ tɩ bãmb yũ n yĩm b naongã, la b ra leb n tẽeg b sũ-sãangã yell ye.

⁸ Yaag-f noor n gom n sõng muka, la sẽn ka tar-a sõangda.

⁹ Yaag-f noor n kao bʋʋd tɩrga, n sõng ka-pãens rãmbã ne naong rãmbã.

Pʋg-sõng pẽgre

¹⁰ Pʋg-sõng yɩɩda sãnem, la a ka paamd naana ye.

¹¹ A sɩdã kɩsa sɩd ne-a, la a na n dɩ a yõodo.

¹² A ka maand a sɩdã wẽng ye, A vɩɩmã fãa tɛka, a maanda a sɩdã neere.

¹³ Yẽnda baooda pe-kõbd ne lamdo, n wĩid ne sũ-noogo.

¹⁴ Yẽnda yaa wa toandb koom kogendo, a kɩtdame tɩ b talld rɩɩb n yit zĩ-zãrsẽ n watẽ.

¹⁵ Yẽnda yikdame tɩ zĩig nan ka yẽeg ye, n kõt a zak rãmb dɩɩbo, n wilgd tʋmtʋmd-pogsã b tʋʋmde.

¹⁶ Yẽnda sã n yãnd pʋʋg sẽn ta a yam, a raad-a lame. A yiisda a meng ligd n kɩtẽ tɩ b sel reezẽ tɩɩse.

¹⁷ Yẽnda sẽbgda a kalle, n tʋmd a tʋʋma.

¹⁸ A neeme t'a tʋʋmdã tara nafre, la yẽnda ka kiisd a fɩtl yʋng ye.

¹⁹ Yẽnda rɩkda a gendre, n sɩng wĩibu.

²⁰ Yẽnda sõngda naong rãmba, la a kõt nimbãan-dãmba.

²¹ Yẽnda ka yɛɛsd tɩ waood na n wa yõk a zak rãmb ye, bala, a zakã ned kam fãa yera fu-tagdo.

²² Yẽnda wʋgda fu-gobs a meng yĩnga, yẽnda yera fut sẽn wʋg ne peen-neeba, la ne gĩsg sẽn yaa miuugu.

²³ A sɩdã sã n yi tẽngã rignoorẽ, n be kãsem-dãmbã sʋka, a tara waoogre.

²⁴ Yẽnda wʋgda fut n koosdẽ, la lɛɛbdbã wat n tonda sɛɛg sẽbds a nengẽ.

²⁵ Yẽnda tara pãng la ziiri, la a ka maand dabeem ne beoog yell ye.

²⁶ Yẽnda gomda yam goamã, la a zãmsd nebã ne sõmblem.

²⁷ A geta a zakã yell neere, la a ka rɩt kʋɩʋʋng rɩɩb ye.

²⁸ A kambã gomda a yelle, n yetẽ t'a tara barka, la a sɩdã pẽgd-a lame n yetẽ:

²⁹ «Pagb wʋsg beeme n tar yel-manesem-sõamyã, la foom yẽe, m noanga, fo yɩɩda b fãa gilli!»

³⁰ Nagem tudgdame, la neerem yaa zaalem, la yaa pag ning sẽn zoet-a Sẽn-Ka-Saabã la b na n pẽge.

³¹ Bɩ b kõ-a tʋʋmã biis yõodo, la bɩ a tʋʋmã kɩt t'a paam pẽgr tẽngã rignoorẽ.