Yelbũna 3 - WẼNNAAM SEBRE 2014

Yam la Sẽn-Ka-Saab zoeese

¹ M biiga, ra yĩm m zãmsgã ye, tall m noyã neer f sũur pʋgẽ.

² Tɩ woto n na n kõ-f yõ-woko, n kɩt tɩ f vɩɩmd n zĩnd ne bãane.

³ Ra sak n bas maan-sɩd la pʋ-peelem ye, pid bãmb f loorẽ, la f gʋls bãmb f sũur pʋgẽ.

⁴ Woto, Wẽnnaam ne nebã na n pẽga foom, la b sũur na n yɩɩ noog ne-fo.

⁵ Bɩ f teeg Sẽn-Ka-Saab ne f sũur fãa, la f ra teeg f meng bãngr ye.

⁶ Bɩ f tẽeg Sẽn-Ka-Saab yelle, bũmb nins fãa f sẽn maandã pʋgẽ, la bãmb n na n manega f soayã.

⁷ Ra tags tɩ f tara yam tɩ sek ye. Zoe Sẽn-Ka-Saabo, la zãag f meng ne wẽnga.

⁸ Bõn-kãng n na n kõ f yĩnsã laafɩ, la a kõ f kõabã keelem.

⁹ Waoog Sẽn-Ka-Saab ne f paoongo, la f koodã dẽenem biisi.

¹⁰ Woto, f baoã na n pida ne koodo, la f sĩmsã fãa na n pida ne reezẽ rãam.

¹¹ M biiga, ra kɩɩs Sẽn-Ka-Saab remsgã ye, la f ra kisg bãmb keoogrã ye.

¹² Bala, Sẽn-Ka-Saab keoogda b sẽn nong-a soaba, wa ba sẽn keoogd a bi-nongr to-to wã.

Yam wata ne barka

¹³ Bark bee ned ning sẽn tar-a yamã zugu. Bark bee ned ning sẽn paam-a bãngr zugu.

¹⁴ Bala, yam tara yõod n yɩɩd wanzuri, la a tara nafr n yɩɩd sãnem.

¹⁵ Yam tara yõod n yɩɩd kĩndi halaale. La bõn-neebã fãa ka tõe n dɩk n mak ne-a ye.

¹⁶ Yõ-wok bee yam dɩtgo, tɩ arzegs ne ziir be a goabga.

¹⁷ Yẽnda soayã yaa neeba, la a so-bugsã fãa yaa vɩ-bãane.

¹⁸ Yam yaa vɩɩm tɩɩg ned ning sẽn tar-a wã yĩnga, la ned sã n tar yam, a tara sũ-noogo.

¹⁹ Yaa ne yam la Sẽn-Ka-Saab yẽbg dũniyã, la yaa ne bãngr la b lugl sa-gãongã.

²⁰ Yaa ne b bãngrã la b kɩt tɩ koom bund n yit tẽngã zugu, la b kɩt tɩ sawatã sikd sa-koom.

²¹ M biiga, gãd yam ne bãngr neere, la f ra bas-b tɩ b zãag ne-f ye.

²² Bala, b na n kõ-f-la vɩɩm, la b na n gũu foom.

²³ Woto, fo na n kẽndame n ka yɛɛsdẽ ye, la f naoor me kõn lak bũmb ye.

²⁴ Fo sã n kẽ gãaga, rabeem kõn yõk-f ye, la f sã n gãe, f gõeem na n yɩ-f-la noogo.

²⁵ Da zoe rabeem ne yell na n wa ling-f ye, wall nin-wẽns sẽn na n wa rat n zab ne foom ye.

²⁶ Bala, Sẽn-Ka-Saab na n yɩɩ fo sõangda, la b na n gũu foom tɩ f ra lʋɩ bẽdg pʋgẽ ye.

²⁷ Fo sã n tar pãn-tõog tɩ sõnge, bɩ f ra zãgs tɩ sõng neb nins sẽn tog ne sõngrã ye.

²⁸ Fo sã n tar n tõe n kõ ned dũndã, bɩ f ra yeel a soab t'a kẽng la a wa beoog ye.

²⁹ Ned sã n vɩ bãan ne foom, bɩ f ra bao tɩ maan-a wẽng ye.

³⁰ Ra zab ne ned zaalem, t'a yaool n ka maan-f bũmb ye.

³¹ Ra maan sũ-kiir ne nin-wẽnga, la f ra togs a manesmã ye.

³² Bala, Sẽn-Ka-Saab kisa nin-wẽnga, la b yaa nin-tɩrsã zoa.

³³ Sẽn-Ka-Saab kãab-wẽng bee nin-wẽng yirẽ, la bãmb ningda nin-tɩrg soolem barka.

³⁴ Sẽn-Ka-Saab paoogda nin-paoogdbã, la bãmb maanda sik-m-mens rãmbã neere.

³⁵ Yam dãmbã na n paama waoogr tɩ yɩ b pʋɩɩre, la yalembã na n paama paoogre.