Yelbũna 29 - WẼNNAAM SEBRE 2014

¹ B sã n keoogd ned t'a nakd a kãare, sãoong n na n wa ling-a tɩ sẽn maand kae ye.

² Nin-tɩrs sã n lebgd wʋsg tẽngẽ, ninbuiidã maanda sũ-noogo. La nin-wẽns sã n dɩt naam, ninbuiidã yãbdame.

³ Sẽn nong-a yam kõt-a ba sũ-noogo, la sẽn pʋgd-a pʋg-yoaadb sãamda a paoongo.

⁴ Rĩm sã n maand sẽn yaa tɩrga, a paasda tẽngã paoongo, la a sã n nong n deegd kũun wʋsgo, a sãamda tẽnga.

⁵ Ned sã n belgd a to ne no-noom goamã, yaa bẽdg la a ningd a meng nao tẽngre.

⁶ Nin-wẽns yel-wẽnã yaa bẽdg b mens yĩnga, la nin-tɩrsã kaasda ne sũ-noogo.

⁷ Nin-tɩrg tẽegda naong rãmb yelle, la nin-wẽng toog ka be ne-b ye.

⁸ Nin-paoogdb rãmbda tẽnga, la yam soab sigsda sũuri.

⁹ Yam soab sã n bʋʋd ne yalma, a gãnema a neng woo, a laadame woo, laafɩ kõn tol n zĩnd ye.

¹⁰ Nin-kʋʋdb kisa pʋ-peen-neda, la nin-tɩrsã gũuda b vɩɩmã.

¹¹ Yalem wilgda a sũ-yikr zãnga, la yam soab gũusda a menga, n ka rat t'a rẽnd puk ye.

¹² Naab sã n kelgd zĩrẽ goamã, a poorẽ dãmbã fãa lebgda nin-wẽnse.

¹³ Naong soab ne sẽn maand-a neb pãng tara bũmb sẽn wẽnd taaba: Sẽn-Ka-Saab n kõt b yiibã fãa vɩɩm.

¹⁴ Rĩm sã n bʋʋd naong rãmb bʋʋd ne sɩda, a na n paasa a naamã pãng wakat fãa yĩnga.

¹⁵ Wẽed ne keoogr kõta biig yam, la biig sẽn ka yã wubr ningda a ma yãnde.

¹⁶ Nin-wẽns sã n lebgd wʋsgo, yel-kɛgã me paasdame. La nin-tɩrsã na n yãnda bãmb lʋɩɩse.

¹⁷ Rems f biiga, t'a na n kɩtame tɩ f paam vɩ-bãane, la a kõ-f sũ-noogo.

¹⁸ Vẽnegr sã n ka tẽngẽ, ned kam fãa maanda a sẽn date. La bark bee ned ning sẽn sakd zãmsgã zugu.

¹⁹ Ka ne goam la b sagend yamb ye, bala, ba a sã n wʋmdẽ me, a ka sakd ye.

²⁰ Ned sã n ka tagsd n yaool n gome, b sẽn kelgd yalem n são.

²¹ Fo sã n põneg f yamb t'a paoodẽ, a wat n yɩɩ kʋɩɩma.

²² Sũ-pu-ned wata ne zaba, la Sũ-tʋʋn-ned maanda yel-wẽn wʋsgo.

²³ Waoog-m-meng wata ne paoogre, la sik-m-meng wata ne waoogre.

²⁴ Sẽn sõngd-a wagdr kis-a a menga, bala, yẽnda wʋmda kãab-wẽngã la a sĩnda.

²⁵ Ninsaal zoees wata ne yelle, la yell kõn paam sẽn teeg-a Wẽnnaam ye.

²⁶ Neb wʋsg baooda sõm ne nanambse, la yaa Sẽn-Ka-Saab n kaood ned kam fãa bʋʋd wa sẽn zemse.

²⁷ Nin-tɩrs sẽn kis n yɩɩd fãa yaa nin-wẽnse. La nin-wẽng me sẽn kis n yɩɩd fãa yaa nin-tɩrse.