Yelbũna 28 - WẼNNAAM SEBRE 2014

¹ Nin-wẽng zoetame tɩ ned yaool n ka rigd-a ye, la nin-tɩrs pɛlg kegma ne b mens wa gɩgem-polle.

² Tẽng neb sã n ka sakd b naaba, nanambsã lebgda wʋsgo. La tẽng naab sã n tar yam la bãngre, tẽngã zĩndida bãan n kaoose.

³ Naong soab sã n namsd ka-pãens rãmba, wẽnda wa sa-kẽeng sẽn niid n sãam koodo.

⁴ Sẽn kɩɩsd-b zãmsg pẽgda nin-wẽnse, la sẽn sakd-b zãmsg zabda ne nin-wẽnse.

⁵ Nin-wẽns ka wʋmd no-tũudr võor ye. La sẽn baood-b Sẽn-Ka-Saabã wʋmda a fãa võore.

⁶ Naong soab sẽn kẽnd ne burkĩndlim, n são arzɛk soab sẽn tũud so-golemse.

⁷ Biig sẽn sakd wilgr tara yam, la sẽn tũud-a yão-be-neb ningda a ba yãnde.

⁸ Ned sã n dɩkd a ligd n pengd n baood yõodo, a baood n bĩngda sẽn zoet-a naong rãmb nimbãanega.

⁹ Ned sã n yẽd a tʋb n ka rat n kelg zãmsgo, a pʋʋsgã meng yaa yel-beedo.

¹⁰ Ned sã n tudg nin-tɩrg n kɩt t'a rɩk so-wẽnga, a na n wẽneg n lʋɩɩ bok ning a sẽn tu wã pʋgẽ. La burkĩmbã na n paama naar tɩ yɩ b pʋɩɩre.

¹¹ Arzɛk soab tagsdame t'a tara yam, la naong soab sẽn tar yam mii a yamã tɛka.

¹² Nin-tɩrs sã n paam tõogre, yaa waoogr meng-menga. La nin-wẽns sã n deeg naam, ned fãa zoet n baooda a menga.

¹³ Sẽn solgd-a a kongr ka na n paam tõogr ye. La ned sã n vẽneg n togs a kongr n bas-a, a paamda nimbãan-zoeere.

¹⁴ Sẽn zoet-a Wẽnnaam wakat fãa tara barka! La sẽn kengd-a a sũur na n paama toogo.

¹⁵ Na-wẽng sã n maand nimbãan-dãmb pãnga, wẽnda wa gɩgemd sẽn kelemde, wa rigd-n-yĩidg sẽn yɩk n na n bir bũmbu.

¹⁶ Naab sẽn ka tar yam dɩkda weer bal tɩ yaa nebã fãabo. La sẽn kis-a zãmb paoong na n paama yõ-woko.

¹⁷ Nin-kʋʋd zoetame n na n tɩ lʋɩ bokẽ. Bɩ ned da gɩdg-a ye.

¹⁸ Sẽn kẽnd-a ne burkĩnd na n paama fãagre, la sẽn tũud-a so-golems na n wa lʋɩ a yembr zugu.

¹⁹ Sẽn kood-a a pʋʋg na rɩ n tɩge, la naong na sek sẽn pʋgd-a yel-yaalse.

²⁰ Sẽn maand-a sɩd paamda barka, la sẽn dat-a n lebg arzɛk soab tao-tao na n wa paama sɩbgre.

²¹ A ka neer tɩ b tũus neb ye, la neb n be n maand wẽng rɩɩb bilf yĩnga.

²² Sũ-ki-ned zoet n pʋgda arzegse, la a ka mi tɩ pɛt n na n yõk-a ye.

²³ Sẽn keoogd-a ned paamda bark n yɩɩd no-noom goam soaba.

²⁴ Ned sã n zu a ba bɩ a ma, la a bas n yetẽ tɩ rẽ ka yel-wẽnde, yẽnda soab yaa sãamd tũud-n-taaga.

²⁵ Rat-wʋsg soab wata ne zaba, la sẽn teeg-a Sẽn-Ka-Saab bee naar pʋga.

²⁶ Ned tõe n tagsdame t'a rɩka so-sõngo, n mik yaool n yaa sor sẽn dabd ne-a kũum zĩigẽ.

²⁷ Sẽn kõt-a naong rãmb kõn kong bũmb ye, la sẽn yãt-a naong soab n mumd a nin n loogdẽ na n paama kãab-wẽnga.

²⁸ Nin-wẽns sã n soog tẽnga, nebã fãa zoet n baooda b mense. La b sã n wa ki, nin-tɩrsã lebgda wʋsgo.