Yelbũna 26 - WẼNNAAM SEBRE 2014

Waoogr ka tog ne yalem ye

¹ Wa sapɩlem sẽn ka tog ne tʋʋlg wẽndã, tɩ saag me ka tog ne tigsg wakatã, woto me, waoogr ka tog ne yalem ye.

² Wa luiil bɩ sɩlaall sẽn yɩkd n loogdẽ wã, woto me, ned sã n ka maan bũmb tɩ b kãab a wẽnga, yaa zaalem.

³ Sãbsg yaa weef yĩnga, wĩir yaa bõang yĩnga, la dasaar yaa yalem poor yĩnga.

⁴ Da leok yalem wa sẽn zems a yalemdã ye. Ka rẽ, fo meng wat n wẽneg-a lame.

⁵ Leok yalem wa sẽn zems a yalemdã, t'a ra wa tẽed t'a tara yam ye.

⁶ Ned sã n tʋm yalem t'a tɩ togs koɛɛga, yaa wa a sẽn fiu a nao, n bao toog n kõ a menga.

⁷ Yalem sã n wẽed yel-bũna, wẽnda wa woabg sẽn kẽnd wobendo.

⁸ Ned sã n pẽg yalma, yaa wa a sẽn dɩk kugr n sẽbg loaabgẽ.

⁹ Yalem sã n wẽed yel-bũna, wẽnda wa ned sẽn tɩg rãam n zãad gõpayãndg a nugẽ.

¹⁰ Ned sã n dɩk yalem bɩ so-loaad a tʋʋmdẽ, a wẽnda tãb-tãood sẽn tãood n pogend neb a taaba.

¹¹ Yalem lebda a yalem-tʋʋmẽ, wa baag sẽn lebd a wʋbdẽ.

¹² F sã n yãnd ned sẽn tagsd t'a tara yam, bãng tɩ yalem n são nin-kãngã.

¹³ Kʋɩɩm yetame: «Rũm-toaag n yas sorẽ wã, gɩgemd n be sorã zugu.»

¹⁴ Kʋɩleng sẽn be a lugrẽ n yilimd to-to wã, kʋɩɩm me bilimda a gãagẽ a woto.

¹⁵ Kʋɩɩm tʋmda a nug laagẽ, la a getame tɩ zẽk a nugã n wa a noorẽ wã yaa toogo.

¹⁶ Kʋɩɩm tagsdame tɩ yẽnda tara yam, n yɩɩd neb a yopoe sẽn mi tɩ leok ne yam.

Yel-bũn a taaba

¹⁷ So-loaad sẽn kẽed zabr sẽn ka a zabre, wẽnda wa ned sẽn yã baag n baood n gãd a tʋba.

^18-19 Ned sã n tudg a to n yaool n yetẽ t'a reemdame, a wẽnda wa gãeeng sẽn wʋkd bugum n lobd yaare, la a tãood pe-zẽnem sẽn tõe n kʋ.

²⁰ Raad sã n kae, bugum kiidame. Tẽn-kãn-ned me sã n ka be, zabr sɛtame.

²¹ Bug-saal bɩ ra-giis sẽn paasd bugum pãng to-to wã, zab-pirs me yãngda zabr a woto.

²² Tẽn-kãn-ned goam yaa wa rɩ-noodo, tɩ f sã n dɩt-a bɩ a sigd n tat hal f pʋgẽ.

²³ Ned sã n gomd gom-nood t'a sũurã yaool n yaa wẽnga, a wẽnda wa b sẽn dɩk wanzuri sẽn ka yɩlge, n bolg tãnd laaga.

²⁴ Sẽn kis-a a to solgda a meng ne no-noom goamã, t'a sũurã yaool n pid ne zãmbo.

²⁵ Baa yẽnda sã n wa bʋk a koɛɛg n gomda, bɩ f ra tẽ-a ye. Bala, tags-beed wʋsg n be a sũurẽ wã.

²⁶ Yẽnda tõe n maana sɩlem n lud a kisgrã, la baoosgo, a wẽnemã na n wa puka nebã fãa nifẽ.

²⁷ Ned sã n tu bok n bẽd neda, a na n wẽneg n lʋɩ a pʋgẽ, la ned sã n bilg kugr tɩ zãb neda, kugrã na n lebg n zãb-a lame.

²⁸ Ned sã n yagd zĩrẽ, a kisa a sẽn dõt-b rãmbã, la no-noom goam wata ne wãabo.