Yelbũna 25 - WẼNNAAM SEBRE 2014

A Salmo yel-bũna

¹ Ad a Salmo yel-bũn a taaba, Zʋʋda rĩm a Ezekɩyaas nebã sẽn tigsi.

² Wẽnnaam waoogrã yaa b sẽn solgd b yɛlã. La rĩm waoogr yaa a sẽn veesd n bãng yɛlã n yaool n tʋma.

³ Ned sẽn ka tõe n bãng yaa yĩngr zãntlmã, tẽngã zulum sẽn yaa to-to, la bũmb ning sẽn be rĩm sũurẽ.

⁴ Bɩ b yiis wanzuri rẽgdo, la yõak na yõg laok sẽn yaa neere.

⁵ Bɩ rĩm yiis nin-wẽng a taoore, la tɩrlem na kɩt t'a zaoorã paam pãnga.

⁶ Da pẽg f meng rĩm taoore, la f ra ning f meng nin-bɛd zĩigẽ ye.

⁷ Bala, b sẽn na n yeel foom yaa: «Wa rʋ ka,» n são b sẽn na n sik foom naabã taoore.

⁸ Da yãg ne f to boolg bʋʋd zĩigẽ ye. Bala, a sã n gom n lub-fu, f na n maana a wãna?

⁹ Fo sã n tar yell ne f to bɩ f bʋ ne-a, la f ra luk ned a to bãong ye.

¹⁰ Ka rẽ, a na n wa wʋmame n tʋʋd-fo, tɩ f ka leb n tõe n lebs f zelemd poorẽ ye.

¹¹ Gomd sẽn gom a wakat yaa wa b sẽn dõog sãnem tɩ-biis wanzuri zugu.

¹² Yam soab saglg tara yõod ne ned ning sẽn deegd-a n yɩɩd sãnem zũuri, la sãnem halaal yãndo.

¹³ Koe-toagsd sẽn togsd sɩd kengda a soaal pɛlga. Yẽnda wẽnda pems-maasg sẽn wẽed ned tigsg wakate.

¹⁴ Ned sã n wukd a meng n pʋlemdẽ t'a na n kõo kũun n yaool n ka pidsdẽ, a wẽnda wa sawat la sobg sẽn yikdi, tɩ saag yaool n ka niid ye.

¹⁵ Sũ-mar tõe naaba, la gomd sẽn gom ne sũ-mar wãada kõaba.

¹⁶ F sã n yãnd sɩɩdo, bɩ f yãk sẽn na n sek f rɩɩbo, la f gũus n da wa rɩ tɩ loog-f tɩ f wa wʋbdẽ ye.

¹⁷ Da nong n kẽnd f to zakẽ wakat fãa ye. Sã n ka rẽ, a yamã wat n yi-f lame t'a kisg-fu.

¹⁸ Ned sã n kɩt kaset zĩrẽ a to zugu, a wẽnda wa guug bɩ sʋʋga, wall peemd b sẽn sɩlse.

¹⁹ Ned sã n teeg zãmb soab yel-pakr wakate, wẽnda wa ned sẽn dat n wãb ne yẽnd sẽn vigsdi, wall ned sẽn dat n tik kar-kɩɩng n kẽne.

²⁰ Ned sã n yɩɩnd sũ-sãang soab taoore, wẽnda wa a sẽn pilg a fuug waood wẽnde, la wa b sẽn dɩk zẽem n kalem miisim.

²¹ Kom sã n tar f bɛ bɩ f kõ-arɩɩb t'a rɩ, la ko-yũud sã n tar-a bɩ f kõ-a koom t'a yũ.

²² Fo sã n maan a woto, yaa wa fo sẽn dɩk bug-saall n dogl a zugu, la Sẽn-Ka-Saab na n dola foom.

²³ Nug-rɩtg sobg wata ne saaga, la zĩrẽ-beed wata ne nen-gãnenga.

²⁴ F sẽn na n gãe bɛoong zugu, n são f sẽn na n gãe ro-yɛng pʋg ne pʋg-zab-zabda.

²⁵ Kiba-noog sẽn yi tẽn-zãrgẽ n wa, wẽnda wa ned sẽn yɛ tɩ b kõ-a ko-maasg t'a yũ.

²⁶ Nin-tɩrg sã n zoe nin-wẽng nif n tũ-a, wẽnda wa bãk koom sẽn bendge, wall bulg koom sẽn põoge.

²⁷ Ka sõama tɩ ned rɩ sɩɩd wʋsg tɩ loog ye, la ka sõama me tɩ ned bao a meng waoogr ye.

²⁸ Ned sẽn ka tar yõk-m-meng wẽnda tẽng lalg sẽn lʋɩ n bas-a.