Yelbũna 21 - WẼNNAAM SEBRE 2014

¹ Rĩm sũur bee Sẽn-Ka-Saab nugẽ wa ko-sore. Bãmb wẽnemded-a lame n teesd b sẽn datẽ.

² Ninsaal tagsdame t'a yel-manesmã fãa zemsame, la yaa Sẽn-Ka-Saab bal n feesd ninsaalbã sũyã.

³ Ned sã n kẽnd ne tɩrlem la a maand sẽn zemse, nooma Sẽn-Ka-Saab sũuri, n yɩɩd maando.

⁴ Nin-wẽns geta ne tɩtaam, la b wukd b mense, la b sẽn maandã fãa yaa yel-wẽna.

⁵ Ned sã n mag n yaool n tʋme, a paamda yõodo, la ned sã n tʋmd ne yãgbo, naong n na n yõk-a.

⁶ Yag zĩrẽ n paam arzegs yaa bũmb sẽn ka tar yõodo, la yaa sẽn baood-b kũumã n maand a woto.

⁷ Nin-wẽnsã wẽnemã n na n loog ne-ba. Bala, bãmb ka rat n maan sẽn zems ye.

⁸ Nin-wẽng sor yaa golengo, la pʋ-peen-ned manesem yaa tɩrga.

⁹ F sẽn na n gãe bɛoong zug n são f sẽn na n gãe ro-yɛng pʋg ne pʋg-zab-zabda.

¹⁰ Nin-wẽng ratmã fãa yaa wẽng maaneg bala, la a ka zoet ba a zoa nimbãaneg ye.

¹¹ B sã n sɩbg nin-paoogda, yam-kaalg soab rɩkda yam. La b sã n zãms yam soaba, a paamda bãngr n paase.

¹² Nin-tɩrg gũusd n geta nin-wẽns zags sẽn yaa a soaba, la yẽnda tusd-b lame n kẽesd toog pʋgẽ.

¹³ Ned sã n yẽt a tʋb n ka kelgd nimbãan-ned kɛlenga, yẽnda me na n wa kelemdame tɩ ned ka leokd-a ye.

¹⁴ Kũun sẽn solg n kõ maagda sũuri. Kũun sẽn deeg n sui sigsda sũ-puugri.

¹⁵ Bʋʋd sã n kaood tɩrga, nin-tɩrg tara sũ-noogo, la nin-wẽng yɛɛsdame.

¹⁶ Ned sẽn zãagd a meng ne yam sor na n zĩnda kɩɩms sʋka.

¹⁷ Sẽn nong-a yõ-noogr na n zĩnda ne naongo. Sẽn nong-a reezẽ rãam ne rɩ-nood kõn tol n paam arzɛk ye.

¹⁸ Nin-wẽng na n deega toog nin-tɩrg zĩigẽ, la zãmb soab na n deega toog pʋ-peelem soab zĩigẽ.

¹⁹ F sẽn na n be we-raoogẽ, n são f sẽn na n zĩ ne pʋg-zab-zabd sẽn yaa sũ-tʋʋl-neda.

²⁰ Paoong sẽn tar yõodo, ne naar bee yam soab yiri, la yalem dɩta a paoong zãnga.

²¹ Ned sã n baood tɩrlem la maan-neere, a na n paama vɩɩm ne tɩrlem, la waoogre.

²² Yam soab tõe n kẽe gãndaad tẽngẽ n sãam pãng ning b sẽn dag n teegã.

²³ Ned sã n tõe a noor la a gũusd ne a no-goam, a kogenda a meng ne yel-pakre.

²⁴ B boonda ned sẽn yaa tɩta-ned la wuk-m-meng soaba, tɩ nin-paoogda. Yẽnda tʋʋmã fãa pida ne tɩtaam.

²⁵ Kʋɩɩm datmã n kʋʋd-a, bala, a nusã zãgsa tʋʋmde.

²⁶ Wakat fãa, kʋɩɩm tara ratem, la nin-tɩrg kõtame n ka mi beed ye.

²⁷ Nin-wẽns maoong yaa yel-beedo. Sẽn yɩɩd fãa, yaa b sã n wat ne yam-wẽnga.

²⁸ Kaset zĩrẽ soab na n sãamame, la sẽn mi-a tɩ sĩnd n kelge, b na n kelg-a lame.

²⁹ Nin-wẽng maanda gãndaalem la nin-tɩrg manegda a soay tɩ yaa sõma.

³⁰ Ninsaal yam ne a bãngre, la a saglg yaa zaalem Sẽn-Ka-Saab taoore.

³¹ B segenda weef zabr daar yĩnga, la yaa Sẽn-Ka-Saab n kõt tõogre.