Yelbũna 2 - WẼNNAAM SEBRE 2014

Yam yõodo

¹ M biiga, fo sã n sak n deeg mam goamã, la f sã n bĩng m tõodã f sũurẽ,

² fo sã n yok f tʋbr n kelg yam zãmsgã neere, la f sak n bao tɩ wʋm a võore,

³ n yẽe! Fo sã n bao bãngre, la fo sã n zẽk f koɛɛg n bao yam-sõngo,

⁴ fo sã n bao-a wa f sẽn baood wanzuri to-to wã, la f sã n maag f yĩng n bao-a wa f sẽn baood arzegsã,

⁵ woto, f na wʋm Sẽn-Ka-Saab zoees võore, la f bãng Wẽnnaam.

⁶ Bala, yaa Sẽn-Ka-Saab n kõt yam, la bãngr ne yam-sõng yita bãmb noorẽ.

⁷ Bãmb tara sõngr nin-tɩrsã yĩnga. La bãmb yaa gãong burkĩmbã yĩnga.

⁸ Bãmb kogenda neb nins sẽn kẽnd zemsgã soay zutã, la b gũud pʋ-peelem dãmbã.

⁹ Woto la f na n bãng zemsgo, ne sɩd la tɩrlem võore, sẽn dat n togs tɩ soay nins fãa sẽn dabd naar zĩigẽ wã.

¹⁰ Bala, fo na n paama yam, la bãngrã na n kõo foom sũ-noogo.

¹¹ Tagsgã na n kogla foom, la bãngrã na n gũ-f-lame,

¹² n fãag foom so-wẽngã zugu, la ne ned ning sẽn gomd gom-yoodo,

¹³ la ne neb nins sẽn basd-b tɩrlem soayã, n kẽnd soay sẽn yaa lik pʋgẽ wã.

¹⁴ Nin-bãmb maanda sũ-noog ne wẽngã maanego, la b kɩdemd b tʋʋm-yoodã maaneg yĩnga.

¹⁵ Nin-bãmb yel-manesmã yaa kɛga, la b tʋʋmã fãa yaa goalmã.

¹⁶ Rẽndã n na n fãag foom ne pʋg-yoodre, la a fãag-f ne pʋg-sãang sẽn gomd no-noom goamã.

¹⁷ Sẽn bas-a a bi-bɩɩlem wakatẽ sɩdã, la a yĩm yẽnda ne a Wẽnnaamã kaoolã.

¹⁸ Ade, yẽnda yel-manesmã rabda ne-a kũum zĩigẽ, la a soayã tar-a lame n dabd kɩɩm-kulgu.

¹⁹ Neb nins fãa sẽn kẽnd-b yẽnda nengẽ wã ka lebgd ye. Bãmb ka leb n tõe n yãnd vɩɩm sor n tũ ye.

²⁰ Dẽ wã yĩnga, bɩ f rɩk nin-sõamyã mamsgo, la f rɩk nin-tɩrsã mamsgo.

²¹ Bala, yaa nin-tɩrsã n na n vɩɩmd dũni zugu, La yaa burkĩmbã n na n pa be n vɩɩmde.

²² B na n menesa nin-wẽnsã tẽngã pʋga. La b võ zãmb dãmbã wa mood n yiis tẽngã.