Yelbũna 18 - WẼNNAAM SEBRE 2014

¹ Sẽn vɩ-a a yembr maanda a sẽn date, la saglg buud fãa puugda a sũuri.

² Ka bãngr la yalem dat ye. A rat n wilga a meng tagsg bala.

³ Nin-wẽng sẽn beẽ, paoogr bee be. La tʋʋm-yood sẽn beẽ, yãnd bee be.

⁴ Ninsaal noor goam yaa ko-zulums ne ko-zoetem, la a yaa yam bulga.

⁵ Ka sõma tɩ b kõ nin-wẽng bʋʋm, n mong nin-tɩrg bʋʋm bʋʋd zĩigẽ ye.

⁶ Yalem no-goam wata ne zaba, a no-goamã n wat ne pãb-taaba.

⁷ Yalem no-goam n wãad-a, la a mengã no-goam n yõkd-a wa bẽdgo.

⁸ Tẽn-kãn-ned goam yaa wa rɩ-noodo, f sã n dɩt-a, a kẽedame n ta hal f pʋgẽ.

⁹ Ned sẽn basd a tʋʋmd n ka tʋmdẽ, ne sẽn sãamd-a yaa ba-biisi.

¹⁰ Sẽn-Ka-Saab yʋʋrã yaa gãsg sẽn tar pãnga, nin-tɩrg sã n zoe n tɩ kẽ be, yell kõn paam-a ye.

¹¹ Arzɛk soab arzɛk n yaa a pãnga. Yẽnda tagsdame t'a arzɛkã yaa wa lalg sẽn zãnte.

¹² Ned sã n zẽkd a menga, lʋɩɩs n pʋgde, la ned sã n sikd a menga, ziir n pʋgde.

¹³ Ned sã n ka kelg n tɩg n yaool n leoke, a wilgda a yalemdo, la a na n paama yãnde.

¹⁴ Ninsaal pɛl-kɛgeng n tebended-a a bãag wakate, la a sã n kong raoodo, ãnda n na n sõng-a t'a yiki?

¹⁵ Sẽn tar-a yam paamda bãngre, la yam soab kelgd n baooda bãngre.

¹⁶ Ned kũun n pagsd a soayã, n kɩtdẽ t'a tõe n kẽng nin-kãsems taoore.

¹⁷ Sẽn deng-a a yell togsg kõta a meng bʋʋm, la a zabd-n-taagã sã n wa, lebga kɩɩs-taaba.

¹⁸ Poeer sɛɛsda zaba, la a welgda pãens-rãmbã yɛl ne taaba.

¹⁹ F sã n paoog f ba-biiga, a kolgr yaa toog n yɩɩd tẽng sẽn tar pãnga. Zabr pagda sũur wa na-yir dignoy-pagdse.

²⁰ Ninsaal noor goam n kõt-a rɩɩbo, la yaa a zelemdã n kɩtd t'a pʋg pitẽ.

²¹ Zelemd n tõe tɩ ned vɩɩmde, zelemd n tõe tɩ ned ki. La sẽn nong-a goam na n dɩ a goamã biisi.

²² Ned sã n paam paga, a paama sũ-noogo, yẽnda paama kũun Sẽn-Ka-Saab nengẽ.

²³ Naong soab gomdame n wẽed kãntɩɩga, la arzɛk soab leokda ne gãgse.

²⁴ Fo zo-rãmb kẽer tõe n waa ne toog f zugu, la f zoa ning tõe n nong-f lame n yɩɩd f ma-biiga.