Yelbũna 12 - WẼNNAAM SEBRE 2014

¹ Sẽn nong-a remsg nonga bãngre, la sẽn kis-a keoogr yaa yalma.

² Nin-sõng paamda Sẽn-Ka-Saab barka, la bãmb ka basd yam-wẽng soab taal ye.

³ Wẽnem ka tõe n kɩt tɩ ned kɩ yẽg ye, la nin-tɩrg yẽgend ka na n tol n vigs ye.

⁴ Pʋg-sõng yaa a sɩd ziiri, la sẽn ningd-a sɩd yãnd yaa wa bãag sẽn dɩt a kõabã.

⁵ Nin-tɩrs tagsda tɩrlem maaneg bala, la nin-wẽng tagsgã yaa zãmb bala.

⁶ Nin-wẽnsã no-goam yaa wa bẽdg sẽn kʋʋde, la nin-tɩrsã no-goam n fãagd-ba.

⁷ Nin-wẽng sã n ki, sɛɛme. La nin-tɩrs yir na n kell n yalsame.

⁸ Ned gũus-m-meng n kɩtd tɩ b pẽgd-a, la tags-wẽns soab paamda paoogre.

⁹ B sẽn na n ka nand neda, t'a yaool n tar tʋmtʋmda, n são ned sẽn wukd a menga, n yaool n ka tar n dɩtẽ ye.

¹⁰ Nin-tɩrg geta a rũms yell neere, la nin-wẽnsã sũy pida ne toolem bala.

¹¹ Sẽn kood-a a pʋʋg na n dɩ n tɩgame, la sẽn pʋgd-a yel-yaals yaa yam-kaalg soaba.

¹² Nin-wẽns sẽn dat yaa zãmb paoongo, la nin-tɩrsã sẽn maand bũmb ningã womda biisi.

¹³ Nin-wẽng beegr goam pʋgẽ, bẽd-wẽng n be be, la nin-tɩrg põsda yel-pakre.

¹⁴ Ned no-goam n kõt-a bõn-sõama tɩ seke, la ned kam fãa sẽn tʋm bũmb ning n lebd-a.

¹⁵ Yalem tagsdame t'a yel-manesem zemsame, la sẽn deegd-a saglg tara yam.

¹⁶ Yalem wilgda a sũ-yikr tao-tao, la sẽn solgd-a a paoogr tara yam.

¹⁷ Sẽn togsd-a sɩd kɩta tɩrlem kaseto, la kaset zĩrẽ soab wata ne tudgri.

¹⁸ Gom-to-ned goam pogenda wa zabr sʋʋga, la yam soab goam wata ne maagre.

¹⁹ Sɩd goam paada wakat fãa, la zĩrẽ goam ka kaoosd ye.

²⁰ Neb nins sẽn baood n maan wẽngã sũy pida ne zãmbo, la sẽn saagd-b n baood laafɩ wã sũy pida ne sũ-noogo.

²¹ Wẽng buud ba a ye kõn paam nin-tɩrg ye, la tood na n wʋma nin-wẽnse.

²² Sẽn-Ka-Saab kisa zĩrẽ-be-nebã, la b nonga sɩd dãmbã.

²³ Yam soab solgda a bãngre, la yalembã moonda b yalemdo.

²⁴ Sẽn nong-a tʋʋmd na n sooga taoore, la kʋɩɩm na n tʋma tʋʋm-wɛgla.

²⁵ Yɩɩr sãamda sũur hal wʋsgo, la gom-noog kõta sũ-noogo.

²⁶ Nin-tɩrg wilgda a zoa so-sõngo, la nin-wẽns sor kẽesd-b-la moogo.

²⁷ Tãoos-kʋɩɩm ka tõe n paam rũng n sẽ ye, la ninsaal tʋʋm n kõt-a arzegse.

²⁸ Vɩɩm bee tɩrlem sor zugu, la wẽng sor dabda kũum zĩigẽ.