Yelbũna 1 - WẼNNAAM SEBRE 2014

A Salmo yel-bũna

¹ A Davɩɩd biig a Salmo sẽn yaa Israyɛll dĩmã yel-bũna.

² Yel-bõn-kãensã yaa sẽn na n yɩlẽ tɩ ninsaal tõe n paam yam, la remsgo, n tõog n wʋm yam goam võore.

³ La a paam yam vẽnegr zãmsg sẽn yaa: zemsgo, sɩda, la tɩrlem.

⁴ La sẽn na n yɩl n kõ zɩtbã minim, la kom-bɩɩsã yam la bãngre.

⁵ Yam soab sã n kelge, a na paam yam n paase, la sẽn tar-a bãngr me sã n kelge, a na tõog n tɛ neb a taaba.

⁶ La a tõog n wʋm yel-bũnã ne yel-soalmã võyã, la yam dãmbã goamã ne b yel-solgdsã.

⁷ Sẽn-Ka-Saab zoees yaa bãngr sɩngre. La yalembã kisa yam la remsgo.

Keoogr kom-wẽnsã yĩnga

⁸ M biiga, sak f ba remsgo, la f ra kɩɩs f ma zãmsg ye.

⁹ Bãmb na n yɩɩ maanf sẽn yaa neer sẽn be f zugẽ, la kĩndi sẽn be f loorẽ.

¹⁰ M biiga, yel-wẽn-maandb sã n dat n belg foom tɩ f maan wẽnga, bɩ f ra sak ye.

¹¹ Bãmb sã n yeel foom: «Wa tɩ d bao zĩig n soond n paam ned zɩɩm n daage. Wa tɩ d bẽd neb sẽn ka tar b toorẽ yell zaalem yĩng bala,

¹² n vel bãmb vɩɩs wa kɩɩm-kulg sẽn vend kũum to-to wã. D vel-b mum wa neb sẽn sigd yaoogẽ.

¹³ Woto, tõnd na n paama laog buud toor-toore, n pids d dotã ne paoongo.

¹⁴ Bɩ f wa tɩ fo me na n paama f pʋɩɩr ne tõndo, La d laogã na n naaga taab zĩ-yende.»

¹⁵ M biiga, ra tũ bãmb ye, zãag f meng ne sor ning nin-bãmbã sẽn tũudã.

¹⁶ Bala, bãmb zoetame n na n tɩ maan wẽnga, la bãmb yãgd n na n tɩ raaga zɩɩm.

¹⁷ Bõn-yɩgdr kõn yã tãoog bẽdb tɩ leb n yõk-a ye.

¹⁸ La nin-bãmbã wẽnegd n bẽta b mense, n daagd b mens zɩɩm.

¹⁹ Fãad yel-manesem yaa a woto. Yẽnda bẽta a menga, la a vɩɩmã na n sãamame.

Yam boaala

²⁰ Yam bee soay zut n kelemdẽ, n zẽkda a koɛɛg n gomd daasẽ.

²¹ La a bee kʋʋng sʋk n zẽkd a koɛɛg n kelemdẽ, la a be tẽngã noor n yetẽ:

²² «Zɩtba, yãmb na n pa y zɩɩlmã pʋgẽ hal tɩ ta dabʋre? La yãmb a nin-paoogdbã, y na n kell n paooga y taab hal tɩ ta dabʋre? La yãmb a yalembã, dabʋr la y na n bao bãngre?

²³ Reeg-y m saglsã, la m na pʋdg m sɩɩgã y zutu, n kɩt tɩ y bãng m goamã.

²⁴ Mam sẽn bool yãmb tɩ y zãgsã yĩnga, la m tud m nug tɩ ned ba a yembr ka tol n gesã,

²⁵ la y sẽn zãgs m saglsã, n ka geelg m keoogrã baa bilfã,

²⁶ yãmb me sã n wa n be toog pʋgẽ, mam me na n la-y lame. La rabeem sã n wa yõk-y tɩ y rigda, mam na n yaal-y lame.

²⁷ Rabeemã sã n wa kẽ yãmb wa saag sebgo, tɩ sãoongã wa y zut wa sɩlmande, yel-pakrã ne sũ-sãangã sã n wa wa y zutu,

²⁸ wakat-kãnga, y na n boola maam, la m ka na n leok-y ye. Y na n bao maam la y ka na n yãnd-m ye.

²⁹ Bala, yãmb kisga bãngre, la yãmb ka yãk yam n na n zoe Sẽn-Ka-Saab ye.

³⁰ Yãmb sẽn dag n ka reeg m saglsã, la y sẽn kisg m keoogrã fãa wã yĩngã,

³¹ y na n dɩ y tʋʋmã biisi, la y na n tɩga ne y mens saglse.

³² Bala, zɩt kõn deeg yellã n na n kʋ-a, la yalembã sẽn ka tagsdã n menesd-ba.

³³ La sẽn kelgd-a maam zĩi ne bãane. Yẽnda na n vɩɩmda ne bãane, n ka tol n yɛɛsdẽ tɩ yel-beed na n wa paam-a ye.»