Yaoolem 9 - WẼNNAAM SEBRE 2014

B tẽegda Israyɛll nebã kongrã

¹ Israyɛll nebã, kelg-y-yã! Dũndã, yãmb na n dʋʋga Zʋrdẽ kʋɩlgã n tɩ deeg soolem sẽn yɩɩd yãmb tɩ b pãng yɩɩd yãmb n deeg b tẽngã n sooge. Yaa tẽn-kãsems sẽn tar lal-bɛd sẽn zẽk n tat saasẽ.

² Bãmb buudã yaa bu-kãsenga, n yaa nin-wobdo. Yaa Anak nebã yãmb sẽn mi wã, la y sẽn wʋm tɩ b gomd b yell n yetẽ: «Ãnda n tõe n yals Anak yagensã taoore?»

³ Dẽ wã, bãng-y rũndã tɩ Sẽn-Ka-Saab sẽn yaa yãmb Wẽnnaamã meng lʋɩta yãmb taoor wa bugum sẽn dɩta, la yaa bãmb meng n na n sãam-ba. Yaa bãmb n na n kɩt tɩ b paam yãnd yãmb taoore. La yãmb na n diga bãmb n menes-b tao-tao wa Sẽn-Ka-Saab sẽn yeel yãmbã.

⁴ Sẽn-Ka-Saab sã n wa rig bãmb n zãag ne yãmba, ra-y yeel-y tɩ: «Yaa tõnd tɩrlem yĩng la Sẽn-Ka-Saab kɩt tɩ tõnd na n soog tẽngã.» Bala, yaa bu-kãens sẽn yaa wẽnsã yĩng la Sẽn-Ka-Saab rigd bãmb n yiisd yãmb taoore.

⁵ Ka yãmb tɩrlmã ne y pʋ-peelmã yĩng n kɩt tɩ y na n deeg b tẽngã n soog ye. Yaa bu-kãens sẽn yaa wẽnsã yĩng la Sẽn-Ka-Saab sẽn yaa yãmb Wẽnnaamã rig bãmb n yiis yãmb taoore, sẽn na n yɩlẽ n pids wẽeneg ning bãmb sẽn dag n wẽen ne y yaab-rãmb a Abrahaam ne a Izaak la a Zakoobã.

⁶ Bãng-y tɩ ka yãmb tɩrlem yĩng n kɩt tɩ Sẽn-Ka-Saab kõ yãmb tẽn-sõngã tɩ y soog ye. Bala, yãmb yaa buud sẽn yaa tõatba.

Sãnem nag-bilã

⁷ Tẽeg-y-yã, ra-y yĩm-y yãmb sẽn dag n maan bũmb ning n yik Sẽn-Ka-Saab sũur we-raoogã pʋgẽ wã yell ye. Sẽn sɩng ne daar ning yãmb sẽn yi Ezɩpt hal n wa ta zĩ-kãngã wã, yãmb kɩɩsa Sẽn-Ka-Saabo.

⁸ Horɛɛb tãngã zugu, yãmb yika Sẽn-Ka-Saab sũur hal tɩ b rag n dat n sãam yãmba.

⁹ Mam dag n dʋʋ tãngã n na n tɩ reeg Sẽn-Ka-Saab sẽn maan kaool nins ne yãmbã kug-walse. Mam paa tãngã zug n kaoos rasem pis-naase, wĩntoog ne yʋngo, n ka rɩ rɩɩbo, la m ka yũ koom ye.

¹⁰ La Sẽn-Ka-Saab kõo maam kug-wals a yiibã b sẽn gʋls ne b mengã nug-bilã, wa sẽn zems goam nins bãmb sẽn dag n gom ne yãmb tãngã zug bugmã pʋgẽ wã, wakat ning Israyɛll nebã sẽn dag n tigmã.

¹¹ Yaa rasem pis-naasã ne yʋnd pis-naasã sẽn wa n ta, la Sẽn-Ka-Saab yaool n kõ maam kug-wals a yiibã sẽn tar bãmb kaoolã.

¹² Sẽn-Ka-Saab yeela maam yaa: «Yik n yi tãngã zug n sig tao-tao, tɩ fo nebã fo sẽn yiis Ezɩpt tẽngã maana wẽnga. Bãmb bʋdga tao-tao n bas sor ning mam sẽn wilg bãmb tɩ b tũ wã. Bãmb yẽnega kut n maan bõn-naandg b mensã yĩnga.»

¹³ Sẽn-Ka-Saab leb n goma ne maam n yeele: «Mam yãnda nin-bãmbã. Yaa buud sẽn yaa tõata.

¹⁴ Bas tɩ m sãam-ba, n yẽes b yʋʋrã tẽng zugu, la m kɩt tɩ fo lebg bu-kãseng sẽn tar pãng n yɩɩd bãmba, tɩ b sõorã me yɩɩd-ba.

¹⁵ Dẽ, mam yii tãngã zug n lebg n sigi, tɩ kaoolã kug-wals a yiibã be mam nusẽ. Tãngã zãng rag n wita bugum.

¹⁶ La gese, mam yãndame, tɩ yãmb maana yel-wẽnd n beeg Sẽn-Ka-Saab sẽn yaa yãmb Wẽnnaamã, n maan sãnem nag-bil y mensã yĩnga. Yãmb bʋdga tao-tao n bas sor ning Sẽn-Ka-Saab sẽn wilg yãmb tɩ y tũ wã.

¹⁷ Mam dɩka kug-wals a yiibã ne m nus a yiib n lobe, la mam wãa bãmb yãmb nifẽ.

¹⁸ Mam wõgemda Sẽn-Ka-Saab taoor dasem pis-naase, wĩntoog ne yʋng wa m sẽn dag n maan pĩndã. Mam ka rɩ la m ka yũ, yel-wẽn nins fãa yãmb sẽn maanã yĩnga. Bala, yãmb kɩɩsa Sẽn-Ka-Saab n maan sẽn ka noom bãmba.

¹⁹ La rabeem dag n tara maam, Sẽn-Ka-Saab sũ-kãbrã, ne b sũurã sẽn yik ne yãmb wʋsg hal tɩ b rat n sãam yãmbã yĩnga. La Sẽn-Ka-Saab leb n kelga maam wakat-kãng me.

²⁰ Sẽn-Ka-Saab sũurã yika wʋsg ne a Aarõ hal tɩ b rag n dat n sãam-a, la mam yõka sɛɛg wakat-kãng me a Aarõ yĩnga.

²¹ Mam dɩka nag-bil ning yãmb sẽn dag n maan n wa ne kongrã, n yõog bugum, n wese, la m neem-a t'a lebg zom, la m yaool n dɩk-a zomã n lob ko-soog ning sẽn yit tãngã zug n sigdã pʋga.

²² Yãmb leb n kɩtame tɩ Sẽn-Ka-Saab sũur yik ne yãmb Tabeera ne Masa la Kibrot-Taava me.

²³ Sẽn-Ka-Saab sẽn wa n kɩt tɩ yãmb yi Kadɛɛs-Barneya wã, bãmb yeela yãmb yaa: «Yik-y n kẽng-y tẽng ning mam sẽn kõ yãmbã n tɩ zab n deeg-a n sooge.» La yãmb kɩɩsa Sẽn-Ka-Saab sẽn yaa yãmb Wẽnnaamã noore, yãmb ka tẽ bãmba, la y ka sak bãmb koɛɛgã ye.

²⁴ Mam sẽn mi yãmbã tɛka, yãmb tõdgda Sẽn-Ka-Saabo.

²⁵ Dẽ, mam wõgemda Sẽn-Ka-Saab taoor dasem pis-naase, la yʋnd pis-naase, Sẽn-Ka-Saab sẽn dag n yeel tɩ b na n sãama yãmbã yĩnga.

²⁶ Mam yõka Sẽn-Ka-Saab sɛɛg n yeele: «Wẽnnaam Sẽn-Ka-Saabo, da-y sãam-y y nebã sẽn yaa yãmb soolmã y sẽn fãag y kãosengã pʋgẽ, n yiis-b Ezɩpt tẽngã ne pãngã ye.

²⁷ Tẽeg-y yãmb tʋmtʋmdb a Abrahaam ne a Izaak la a Zakoob yelle. Da-y ges-y nin-kãensã tõdgrã ne b yel-wẽnã la b kongrã ye.

²⁸ Sẽn na yɩlẽ tɩ neb nins sẽn be tẽng ning yãmb sẽn dag n yiis tõndã ra wa yeele: «Yaa Sẽn-Ka-Saab sẽn ka tõe n tall bãmb n taas tẽng ning b sẽn kãab bãmbã pʋgã yĩnga, la yaa b sẽn ka nong bãmbã yĩnga, la b yiis bãmb n tɩ kʋ we-raoogã pʋgẽ.»

²⁹ Bãmb yaa yãmb mengã nebã, n yaa yãmb soolem y sẽn yiis Ezɩpt tẽng ne y pãn-kãsenga, la ne yãmb nugã sẽn tẽegã pãnga.