Yaoolem 6 - WẼNNAAM SEBRE 2014

Nong-y Sẽn-Ka-Saabo

¹ Ad tõodã la no-tũudsã la ne noy nins Sẽn-Ka-Saab sẽn yaa yãmb Wẽnnaamã sẽn yeel maam tɩ m zãms yãmb tɩ y sak bãmb tẽng ning yãmb sẽn na n tɩ kẽ n soogã pʋgẽ.

² Yaa sẽn na n yɩlẽ tɩ yãmb vɩɩmã tɛka, bɩ yãmb ne y kambã la y yagensã zoe Sẽn-Ka-Saab sẽn yaa yãmb Wẽnnaamã n sak bãmb no-tũudsã la b tõodã fãa mam sẽn vigl yãmb yĩngã, tɩ y tõe n paam yõ-woko.

³ Woto yĩnga, Israyɛll nebã, kelg-y la y gũusi, la y sak bãmba, n tõog n paam sũ-noog n lebg wʋsg tẽng ning sẽn pid ne bĩisim la sɩɩd wʋsgã pʋgẽ, wa Sẽn-Ka-Saab sẽn yaa yãmb yaab-rãmbã Wẽnnaamã sẽn dag n yeel yãmbã.

⁴ Israyɛll nebã, kelg-y-yã, Sẽn-Ka-Saab yaa tõnd Wẽnnaam, Sẽn-Ka-Saab yaa b yembr bal tãa.

⁵ Bɩ y nong Sẽn-Ka-Saab sẽn yaa yãmb Wẽnnaamã ne y sũur fãa, la ne y yalẽ fãa la ne y pãngã fãa.

⁶ Gom-kãensã mam sẽn gomd ne yãmb rũndã wã na n paa yãmb sũyã pʋse.

⁷ Yãmb na n dɩk-a lame n zãms y kambã. Yãmb sã n zĩ y zakẽ, bɩ y gomd a yelle, la y sã n kẽnd sor zug me, bɩ y gomd a yelle. Gom-y-yã-a yell y gãandg la y yikr wakate.

⁸ Yãmb na n loee bãmb y nugẽ, tɩ b yɩ wa bãnde, la y teeg-a y rĩirẽ, y ninã sʋka.

⁹ Gʋls-y bãmb y lugã zutu, la y tẽngã kʋɩlems zutu.

Israyɛll tog n tẽega a Wẽnnaamã yelle

¹⁰ Sẽn-Ka-Saab sẽn yaa yãmb Wẽnnaamã sã n wa kɩt tɩ yãmb kẽ tẽng ning bãmb sẽn dag n wẽen n yeel y yaab-rãmbã, a Abrahaam ne a Izaak la a Zakoob tɩ b na n kõo yãmbã, tẽng ning sẽn tar tẽn-bɛd sẽn yaa tẽn-neeb yãmb sẽn ka me wã pʋgẽ,

¹¹ la rot sẽn pid ne bõn-sõama buud toor-toor yãmb sẽn ka bĩngi, la buls yãmb sẽn ka tu, la reezẽ ne oliiv tɩɩs yãmb sẽn ka sele, yãmb sã n wa rɩ n tɩge,

¹² bɩ y gũus y mens n da wa yĩm Sẽn-Ka-Saab sẽn yiis yãmb Ezɩpt tẽngã y sẽn wa n be yembd pʋgẽ wã yell ye.

¹³ Zoe-y Sẽn-Ka-Saab sẽn yaa yãmb Wẽnnaamã n sak bãmb bala, la y wẽen ne bãmb yʋʋre.

¹⁴ Ra tũ-y wẽnnaam-dãmb a taab sẽn be buud a taabã sẽn gũbg yãmbã wẽnnaam-dãmbã sʋk ye.

¹⁵ Bala, Sẽn-Ka-Saab sẽn yaa yãmb Wẽnnaamã sẽn be yãmb sʋkã ka rat tɩ b rɩk b waoogrã n kõ ned a to ye. Bãmb sũurã na n puuga ne yãmb tɩ b kɩt tɩ y menem tẽngã zugu.

¹⁶ Ra mak-y Sẽn-Ka-Saab sẽn yaa yãmb Wẽnnaamã, wa y sẽn dag n maan Masa wã ye.

¹⁷ Gũus-y y mens n sak Sẽn-Ka-Saab sẽn yaa yãmb Wẽnnaamã goamã ne b zãmsgã la tõod nins bãmb sẽn kõ yãmbã.

¹⁸ Maan-y sẽn zemse, la sẽn noom Sẽn-Ka-Saabo, tɩ y vɩɩm yɩ noogo, la y tõog n kẽ tẽn-noog ning Sẽn-Ka-Saab sẽn dag n kãab y yaab-rãmbã tɩ b soogã.

¹⁹ Yãmb na n diga y bɛɛbã fãa wa Sẽn-Ka-Saab sẽn yeelã.

²⁰ Yãmb kambã sã n wa sok yãmb zãmsgã ne tõodã la minind nins Sẽn-Ka-Saab sẽn yaa yãmb Wẽnnaamã sẽn kõ yãmbã võore,

²¹ bɩ y yeel-ba: «Tõnd dag n yaa Faarõ yembs Ezɩpte, la Sẽn-Ka-Saab yiisa tõnd be ne pãn-kãsenga.

²² La Sẽn-Ka-Saab sẽn yaa tõnd Wẽnnaam kɩtame tɩ d yãnd bãn ne bõn-bãn-kãsemse, la tood nins bãmb sẽn maan Ezɩpt nebã ne Faarõ ne a yir dãmbã fãa wã.

²³ Bãmb yiisa tõnd be n tall tõnd n wa kẽes tẽng ning bãmb sẽn dag n yeel d yaab-rãmbã tɩ b na n kõo tõndã.

²⁴ Sẽn-Ka-Saab yeela tõnd tɩ d sak tõ-kãensã fãa la d zoe Sẽn-Ka-Saab sẽn yaa tõnd Wẽnnaamã, n tõog n paam sũ-noog daar fãa n kell n vɩɩmd wa tõnd sẽn yaa bũmb ning rũndã wã.»

²⁵ Tõnd sã n gũus d mens n sak tõ-kãensã fãa wa bãmb sẽn yeel tõndã, Sẽn-Ka-Saab sẽn yaa tõnd Wẽnnaamã na n gesa tõnd wa nin-tɩrse.