Yaoolem 33 - WẼNNAAM SEBRE 2014

A Moyiis ninga Israyɛll buudã barka

¹ Ad bark ning Wẽnnaam dao a Moyiis sẽn ning Israyɛll nebã, sẽn deng a kũumã.

² A Moyiis yeelame: Sẽn-Ka-Saab yii Sinayi n wa. Bãmb waa Seyɩɩr wa sõ-pukri, n yãg Paarã tãngã zugu. Bãmb waa b nebã sʋk ne malɛgs tus-kẽemã. Bãmb tʋm-b-la b tõogã bugum ne b nug-rɩtgo.

³ N-yẽe, bãmb nonga nebã. Bãmb pʋ-peelem dãmbã fãa bee bãmb nugẽ. Bãmb yalsa yãmb sɛɛgẽ, bãmb yaa yãmb koe-taasda.

⁴ A Moyiis kõo tõnd tõodã, tɩ yaa a Zakoob yagensã pʋɩɩre.

⁵ Sẽn-Ka-Saab rag n yaa Israyɛll dĩm wakat ning buudã nanambsã sẽn tigimd ne Israyɛll nebã fãa.

⁶ Wẽnd na kaoos a Rubɛn buudã, t'a vɩɩmd n da ki ye. Bɩ a nebã sõor kell n yɩ bilfu!

⁷ Ad bũmb ning yẽnda sẽn yeel a Zʋʋda buudã neb wɛɛngẽ: «Sẽn-Ka-Saabo, kelg-y Zʋʋda buudã, n lebg n tall-a n wa a nebẽ wã. Tɩ b nusã zab n sõng-ba, wa-y n sõng-y-ba, la y fãag-b b bɛɛbã nugẽ.»

⁸ Yẽnda goma a Leevi buudã wɛɛngẽ n yeele: «Bãmb kõo yãmb Tumimã ne Urimã ned ning sẽn maanã sɩd ne yãmbã. Yaa yẽnda la yãmb mak Masa, n bao zabr ne a Meriba koomã zĩigẽ.

⁹ A Leevi goma a ba wã ne a ma wã wɛɛngẽ n yeele: «Mam ka get bãmb ye!» Yẽnda ka leb n mi a ba-biiga, a ka leb n mi a kamb ye. Bala, bãmb sakda yãmb goamã n zãad yãmb kaoolã.

¹⁰ Bãmb zãmsda a Zakoob yagensã yãmb minindu, la b zãmsd Israyɛll nebã yãmb tõodo. Bãmb yõogda tɩdar t'a yũug kẽ yãmba, la b yõogd maand y tẽn-kugrã zugu.

¹¹ Sẽn-Ka-Saabo, ning-y bãmb pãngã barka. Reeg-y bãmb nus tʋʋmã. Kao-y bãmb zabd-n-taasã, ne neb nins sẽn kis bãmbã sees tɩ b ra leb n yik ye.»

¹² Yẽnda goma a Benzame buudã wɛɛngẽ n yeel yaa: Bãmb yaa Sẽn-Ka-Saab nin-nongds sẽn paad bãmb nengẽ ne bãane. Sẽn-Ka-Saab gũuda bãmb daar fãa. Bãmb zaoo Sẽn-Ka-Saab bãgdẽ n vʋʋsdẽ.

¹³ Yẽnda goma a Zozɛf buudã wɛɛngẽ n yeel yaa: «Sẽn-Ka-Saab ninga bãmb tẽngã barka, t'a paam kũun sẽn yit yĩngri, t'a paam meenem sẽn yaa sõama, ne ko-bundum sẽn yit zĩ-zulums pʋsẽ,

¹⁴ la a paam wĩndgã sẽn bɩɩsd koodã, ne bũmb nins fãa sẽn bund n yit kiuug fãa wã,

¹⁵ la a paam bi-sõama nins kʋdem-wẽndẽ tãmsã sẽn kõtã, kʋdem-wẽndẽ kunkubã sẽn kõt bi-sõamã ninsã,

¹⁶ la a paam bũmb nins sẽn yit tẽn-gãongã zug n womd bi-sõama wã. Bɩ sẽn zĩnd-a tuugã pʋgẽ wã bark zĩnd a Zozɛf b sẽn welg toor a ba-biisã sʋkã zugu.

¹⁷ Yẽnda yaa wa nag-sadg bi-rẽeng sẽn yaa lull n tar ziiri, t'a yɩɩlã yaa wa we-naaf yɩɩla. Yaa ne yɩɩn-bãmb la a tar n tãad buud a taabã fãa sẽn be zĩigã fãa tẽng zugã. A Efrayiim nebã tus-kẽemã yaa woto. La a Manaase nebã tus-kẽemã wã me yaa woto.»

¹⁸ Yẽnda goma Zabulõ buudã wɛɛngẽ n yeel yaa: «Zabulõ nebã, maan-y sũ-noog y yiib wakate! Izakaar nebã, maan-y sũ-noog y fu-rotã pʋse!

¹⁹ Bãmb na n boola buud a taabã tɩ b wa tãngã zugu. Yaa beenẽ la b na n maan tɩrlem maando. Bala, bãmb na n dɩɩ bõn-sõama nins sẽn be ko-kãsemsã pʋgẽ wã yõodo, la b na n sooga laog ning sẽn solg bĩisrẽ wã.»

²⁰ Yẽnda goma a Gaad buudã wɛɛngẽ n yeel yaa: «Bɩ sẽn sõng-a a Gaad buudã paam pẽgre. A Gaad wũunduda wa gɩgem-yãanga, n zendemd kangã ne zugã.

²¹ Yaa bãmb n yãk tẽngã zĩig sẽn welg toor n kõ b mense, bala, b yãka zĩig beenẽ tãb-biis naab yĩnga. Yẽnda n lʋɩ Israyɛll nebã taoore, yẽnda maana sẽn zems Sẽn-Ka-Saab tɩrlmã, a maana wa sẽn zemse, Israyɛll nebã yĩnga.»

²² Yẽnda goma a Dan buudã wɛɛngẽ n yeel yaa: «A Dan yaa wa gɩgem-poll sẽn fõt n yit Basan tẽngã n watẽ.»

²³ Yẽnda goma a Neftali buudã wɛɛngẽ n yeel yaa: «Sẽn-Ka-Saab tɩgsa a Neftali ne kũuni, b ning-a-la bark hal tɩ seke. Yẽnda reega nin-taoor la nug-goabg soolmã n sooge.»

²⁴ Yẽnda goma a Azɛɛr buudã wɛɛngẽ n yeel yaa: «Bɩ a Azɛɛr paam bark n yɩɩd a Israyɛll kamb a taabã fãa. Bɩ a ba-biisã sũy yɩ noog ne-a, la bɩ a sagla a nao kaamẽ.

²⁵ Bɩ fo kʋɩlemsã yɩ kut la zũudu. La bɩ fo pãng sek foom f yõor tɛka.

²⁶ Israyɛll nebã, ned ka be n yɩɩd Wẽnnaam sẽn zao saasẽ n pɩʋʋgd yĩngr ne naamã, n wat n na n sõng yãmbã ye.

²⁷ Hal kʋdem-wẽndẽ, Wẽnnaam yaa yãmb zĩ-soalgdga, bãmb n dig y bɛɛbã n yetẽ: ‹Sãam-y-a.›

²⁸ Israyɛll nebã zĩi b zĩigẽ ne bãane. A Zakoob ko-bundgã bee toore, tẽng sẽn tar kood ne reezẽ rãam pʋgẽ. N-yẽe! Meenem yita yĩngri, n sigd yẽnda zugu.

²⁹ Israyɛll nebã, yãmb tara sũ-noogo. Ãnda n yaa wa yãmba? Buud Sẽn-Ka-Saab sẽn fãage, bãmb yaa yãmb sõngr gãongo. Bãmb yaa yãmb naam zabr sʋʋg sẽn tõogde. Yãmb bɛɛbã na n wõgemda yãmb taoore, la yãmb na n taba b maoong kʋʋb zĩisã.»