Yaoolem 16 - WẼNNAAM SEBRE 2014

Pak tigri

¹ Maan-y Pak tigrã bõn-bɩʋʋng kiuugã pʋgẽ Sẽn-Ka-Saab sẽn yaa yãmb Wẽnnaamã yĩnga. Bala, Sẽn-Ka-Saab sẽn yaa yãmb Wẽnnaamã yiisa yãmb Ezɩpt tẽngã pʋgẽ ne yʋngo, bõn-bɩʋʋng kiuugã pʋgẽ.

² Bɩ y yãk rũm-bãooneg ne rũm-bɛd n maan Pak tigrã Sẽn-Ka-Saab sẽn yaa yãmb Wẽnnaamã yĩnga, zĩig ning Sẽn-Ka-Saab sẽn yaa yãmb Wẽnnaamã sẽn na n yãk n ning b yʋʋrã.

³ Tigrã rasem a yopoe wã fãa pʋga, yãmb ka tog n dɩ bũmb sẽn ning rãbɩll ye. Yãmb tog n dɩta bur sẽn ka ning rãbɩll rasem a yopoe wã fãa. Yaa namsg buri, bala, yãmb yii Ezɩpt ne yãgbo. Yaa sẽn na n tẽegd yãmb daar ning yãmb sẽn yi Ezɩpt tẽngã y yõor tɛka.

⁴ Rasem a yopoe wã pʋgẽ, bɩ y ra bas tɩ rãbɩll zĩnd y soolmã pʋgẽ ye. La ra bas-y maoong ning sẽn kʋʋd pipi daarã zaabrã nemd baa bilf tɩ kell n vẽeg beoog ye.

⁵ Yãmb ka tõe n kʋ Pak tigrã maoong tẽms nins fãa Sẽn-Ka-Saab sẽn yaa yãmb Wẽnnaamã sẽn kõ yãmb tɩ y zĩndã pʋgẽ ye.

⁶ Yaa zĩig ning Sẽn-Ka-Saab sẽn yaa yãmb Wẽnnaamã sẽn na n yãk n ning b yʋʋrã la yãmb tog n kʋ Pak tigrã maoong zaabre, wĩndgã kõom wakate, sẽn zems wakat ning yãmb sẽn yi Ezɩpt tẽngã.

⁷ Rʋg-y-yã-a n dɩ zĩig ning Sẽn-Ka-Saab sẽn yaa yãmb Wẽnnaamã sẽn na n yãkã. La beoog sã n vẽege, bɩ y lebg n leb y fu-rotẽ wã.

⁸ Rɩ-y bur sẽn ka rãbɩll rasem a yoobe. La rasem a yopoe wã daar na n yɩɩ tiging raar Sẽn-Ka-Saab sẽn yaa yãmb Wẽnnaamã waoogr yĩnga. Ra tʋm-y badaar ye.

Rasem a yopoepoe naoor a yopoe tigri

⁹ Fo na n sõda rasem a yopoepoe naoor a yopoe, sẽn sɩng ne wakat ning b sẽn na n dɩk goeoogã n na wʋr bɩle wã.

¹⁰ Maan-y rasem a yopoepoe naoor a yopoe wã tigrã Sẽn-Ka-Saab sẽn yaa yãmb Wẽnnaamã yĩnga, bɩ y kõ yamleoog kũunã wa sẽn zems bark ning Sẽn-Ka-Saab sẽn yaa yãmb Wẽnnaamã sẽn kõ yãmbã.

¹¹ Maan-y sũ-noog Sẽn-Ka-Saab sẽn yaa yãmb Wẽnnaamã yĩnga, bɩ yãmb ne y kom-dibli wã la y kom-pugli wã ne y yem-daadã, la y yem-pogsã ne a Leevi buudã neb nins sẽn be yãmb tẽmsã pʋsẽ wã, la sãambã ne kɩɩbsã la pʋg-kõap nins sẽn be yãmb sʋkã, maan sũ-noog Sẽn-Ka-Saab sẽn yaa yãmb Wẽnnaamã taoore, zĩig ning bãmb sẽn na n yãk n ning b yʋʋrã.

¹² Tẽeg-y tɩ yãmb me yɩɩ yembs Ezɩpt tẽnga, dẽ, sak-y no-tũud-kãensã fãa, la y ning-b b nao-kẽndr zugu.

Zãn tigri

¹³ Yãmb sã n wʋk y bõn-koaadlã zeesẽ wã n sɛ, la y wẽk y reezẽ biis koom n sɛ, bɩ y maan zãn tigr rasem a yopoe.

¹⁴ Bɩ yãmb ne y kom-dibli wã, la y kom-pugli wã, ne y yem-daadã, la y yem-pogsã, ne a Leevi buudã nebã, la sãambã ne kɩɩbsã, ne pʋg-kõapã sẽn be yãmb tẽmsã pʋsẽ wã maan sũ-noog tig-kãng wakate.

¹⁵ Maan-y tigrã rasem a yopoe Sẽn-Ka-Saab sẽn yaa yãmb Wẽnnaamã waoogr yĩnga, zĩig ning Sẽn-Ka-Saab sẽn yaa yãmb Wẽnnaamã sẽn na n yãkã pʋga. Bala, Sẽn-Ka-Saab sẽn yaa yãmb Wẽnnaamã na n ninga yãmb bark tɩ y paam koodo, la b ning yãmb nus tʋʋmã fãa barka, tɩ y maan sũ-noog wʋsg ne y sũur fãa.

¹⁶ Yʋʋmd fãa, yãmb daopã fãa tog n wa yalsa Sẽn-Ka-Saab sẽn yaa yãmb Wẽnnaamã taoor naoor a tãabo, zĩig ning bãmb sẽn na n yãkã pʋga: Yaa bur sẽn ka rãbɩll tigrã wakate, la rasem a yopoepoe naoor a yopoe wã tigr wakate, la zãnã tigr wakate. Ned ka tog n wa Sẽn-Ka-Saab taoor nug-zaal ye.

¹⁷ Ned kam fãa na n kõo wa a sẽn tõe, wa sẽn zems bark ning Sẽn-Ka-Saab sẽn yaa yãmb Wẽnnaamã sẽn kõ yẽnda wã.

Bʋ-kaoodb yãkre

¹⁸ Yãmb na n yãka bʋ-kaoodb la seb-gʋndba, n ning-b tẽms nins Sẽn-Ka-Saab sẽn yaa yãmb Wẽnnaamã sẽn kõ yãmbã pʋsẽ wã dignoyẽ, wa sẽn zems y buudã fãa sõore, tɩ b bʋ nebã bʋʋd ne tɩrlem.

¹⁹ Bɩ y ra bʋ bʋʋdã kɛg ye, la y ra tũus neb ye. Bɩ y ra reeg kũun ye. Bala, kũun luta yam dãmb nini, la a golemd nin-tɩrs goamã.

²⁰ Kell-y n maan-y tɩrlem, n tõog n vɩɩmd n soog tẽng ning Sẽn-Ka-Saab sẽn yaa yãmb Wẽnnaamã sẽn kõ yãmbã.

Wẽnnaam-dãmb a taab pʋʋsgo

²¹ Ra vigl-y tɩɩg ba a yembr daoog Aseera yʋʋr yĩng n yegl Sẽn-Ka-Saab sẽn yaa yãmb Wẽnnaamã tẽn-kugrã, yãmb sẽn na n maan y meng yĩngã ye.

²² Ra vigl-y kug-viginds n pʋʋs ye. Bala, Sẽn-Ka-Saab sẽn yaa yãmb Wẽnnaamã kisa bõn-kãense.