Yaoolem 12 - WẼNNAAM SEBRE 2014

SẼN-KA-SAAB TÕODÃ Wẽnnaam waoogr zĩ-yendã

¹ Ad no-tũudsã ne noy nins yãmb sẽn tog n maan gũusg n sak n tũ, tẽng ning Sẽn-Ka-Saab sẽn yaa yãmb yaab-rãmbã Wẽnnaamã sẽn kõ yãmb tɩ y soog y vɩɩmã tɛk dũni ka wã pʋga.

² Menes-y zĩis ninsi, wall buud nins yãmb sẽn na n tõogã sẽn pʋʋsd b wẽnnaam-dãmbã, sẽn be tãms ne kunkub zutã, la tɩɩs sẽn tar maasem tẽngrã.

³ Bɩ y siig b tẽn-kugã la y wã b kug-vigindsã la y yõog Aseera ra-lugdsã bugum. Menes-y b bõn-naands nins b sẽn pees n maan b wẽnnaam-dãmbã tɩ b yʋʋr menem zĩ-kãense.

⁴ La ne Sẽn-Ka-Saab sẽn yaa yãmb Wẽnnaamã wɛɛngẽ, ra maan-y a woto ye.

⁵ Yaa zĩig ning Sẽn-Ka-Saab sẽn yaa yãmb Wẽnnaamã sẽn na n yãk yãmb buudã sʋk n ning b yʋʋrã la y na n kẽng n tɩ waoog-ba. Yaa beenẽ bal la yãmb na n kẽnge.

⁶ Yaa beenẽ la yãmb na n tall y maand sẽn yõogd bugmã, ne y maand a taabã, la y piig pʋɩyã, ne y kũunã, la bũmb nins yãmb sẽn dag n pʋlem Wẽnnaamã, la yamleoog kũunã, ne yãmb rũm-bɛdã ne y rũm-bãoonegã kom-dẽemsã n kẽnge.

⁷ Yaa Sẽn-Ka-Saab sẽn yaa yãmb Wẽnnaamã taoor beenẽ, la y na n dɩ, tɩ yãmb ne y zagsã rãmb maan sũ-noog ne bũmb ning fãa yãmb sẽn tarã, tʋʋm nins fãa Sẽn-Ka-Saab sẽn yaa yãmb Wẽnnaamã sẽn na n ning-y bark b pʋsẽ wã.

⁸ Bɩ d ra maan wa tõnd sẽn maand rũndã wã, tɩ ned kam fãa maand wa a sẽn tagsd tɩ yaa sõama wã ye.

⁹ Bala, yãmb nan ka ta vʋʋsg tẽng ning Sẽn-Ka-Saab sẽn yaa yãmb Wẽnnaamã sẽn kõ yãmb tɩ y soogã pʋgẽ ye.

¹⁰ La yãmb sã n wa rʋʋg Zʋrdẽ kʋɩlgã n kẽ tẽng ning Sẽn-Ka-Saab sẽn yaa yãmb Wẽnnaamã sẽn kõ yãmb tɩ y soogã pʋga, la b sã n kɩt tɩ y tõog y bɛɛbã fãa sẽn gũbg yãmbã n kõ yãmb vʋʋsg ne vɩ-bãane,

¹¹ yaa zĩig ning Sẽn-Ka-Saab sẽn yaa yãmb Wẽnnaamã sẽn na n yãk n ning b yʋʋrã la y na n tall bũmb nins mam sẽn yeel yãmbã n wa: Yãmb maand nins sẽn yõogd bugmã ne y maand a taabã, la y piig pʋɩyã ne y kũunã, la bũmb nins fãa yãmb sẽn pʋlem Sẽn-Ka-Saabã.

¹² La y maan sũ-noog Sẽn-Ka-Saab sẽn yaa yãmb Wẽnnaamã taoor be, yãmb ne y kom-dibli la y kom-pugli, la y yem-daadã ne y yem-pogsã, la a Leevi buudã nebã sẽn be yãmb tẽmsã pʋsẽ wã. Bala, a Leevi buudã ned ba a yembr ka paam zĩig yãmb sʋk ye.

¹³ Gũus-y-yã, la y ra wa sak n yõog maand bugum zĩigã fãa y sẽn paam ye.

¹⁴ Yaa zĩig ning Sẽn-Ka-Saab sẽn na n yãk yãmb buud a ye sʋkã, la yãmb na n maan y maand sẽn yõogd bugmã. Yaa beenẽ la y na n maan bũmb nins fãa mam sẽn yeel yãmbã.

¹⁵ La baoosgo, wakat ning fãa yãmb sẽn data, yãmb tõe n kʋʋ rũms n wãb b nemd tẽms nins fãa yãmb sẽn be wã pʋgẽ, sẽn zems bark ning Sẽn-Ka-Saab sẽn yaa yãmb Wẽnnaamã sẽn na n kõ yãmbã. Ned sẽn yaa yɩlemd ne ned sẽn ka yɩlemd fãa tõe n dɩɩme, wa b sẽn na n wãb yãk bɩ walga.

¹⁶ La baoosgo, bɩ y ra rɩ zɩɩmã ye. Bɩ y raag zɩɩmã tẽng wa koom.

¹⁷ Yãmb ka tõe n dɩ y koodã, ne y reezẽ rãamã, la y kaamã piig pʋɩɩrã ne y rũm-dẽemsã, ne bũmb nins yãmb sẽn pʋlem Wẽnnaamã, la yãmb yamleoog kũunã, ne y kũun a taabã y sẽn kɩtã, y tẽmsã pʋsẽ ye.

¹⁸ La yaa Sẽn-Ka-Saab sẽn yaa yãmb Wẽnnaamã taoor bala, zĩig ning Sẽn-Ka-Saab sẽn yaa yãmb Wẽnnaamã sẽn yãkã, la yãmb ne y bi-ribla, la y bi-pugla, ne y yem-daadã, la y yem-pogsã, ne Leevi buudã ned sẽn be yãmb tẽmsã pʋsã na n dɩ Sẽn-Ka-Saab sẽn yaa yãmb Wẽnnaamã taoore, n maan sũ-noog ne bũmb ning yãmb sẽn tarã.

¹⁹ Gũus-y y mens y yõor tɛka, n da wa mong Leevi ned bũmb y tẽmsã pʋsẽ ye.

²⁰ Sẽn-Ka-Saab sẽn yaa yãmb Wẽnnaamã sã n yalg yãmb soolmã wa b sẽn dag n yeel yãmbã, tɩ nemd velem wa yõk yãmb tɩ y yeele: «Tõnd nongẽ lame n paam nemd n wãbe!» Bɩ y bao nemd n wãb wa y sẽn date.

²¹ Zĩig ning Sẽn-Ka-Saab sẽn yaa yãmb Wẽnnaamã sẽn yãk n ning b yʋʋrã sã n zãr ne yãmba, yãmb tõe n yãka y rũm-bɛdã ne y rũm-bãoonegã Sẽn-Ka-Saab sẽn kõ yãmbã n kʋ wa mam sẽn yeel yãmbã. La yãmb tõe n dɩ-a-la y tẽmsã pʋsẽ wa y sẽn data.

²² Yãmb tõe n wãba yõwã wa b sẽn wãbd walg bɩ yãk nemdo. Ned sẽn yaa rẽgd ne ned sẽn yaa yɩlemd fãa tõe n dɩɩme.

²³ Bũmb sẽn be bala, gũus-y y mens n da rɩ zɩɩm ye. Bala, zɩɩm yaa vɩɩm. Da lagm-y vɩɩm ne nemd n dɩ ye.

²⁴ Da rɩ-y-yã-a ye, raag-y-yã-a tẽng wa koom.

²⁵ Da rɩ-y-yã-a ye, tɩ yãmb ne y kamba la y yagensã vɩɩm tõe n yɩ noogo, yãmb sẽn maand sẽn noom Sẽn-Ka-Saabã yĩnga.

²⁶ Tall-y bũmb nins sẽn welg toor Sẽn-Ka-Saab yĩngã, ne bũmb nins yãmb sẽn pʋlem Sẽn-Ka-Saabã, n kẽng zĩig ning Sẽn-Ka-Saab sẽn yãkã pʋgẽ.

²⁷ Rɩk-y maand nins sẽn yõogd bugmã nemdã ne a zɩɩmã n ning Sẽn-Ka-Saab sẽn yaa yãmb Wẽnnaamã tẽn-kugrã zugu. La y sã n maand maand a taabã, bɩ y rɩk b zɩɩmã n daag Sẽn-Ka-Saab sẽn yaa yãmb Wẽnnaamã tẽn-kugr zugu, la y wãb b nemdã.

²⁸ Gũus-y y mense, n kelg la y sak bũmb nins fãa mam sẽn yet yãmb dũndã wã, tɩ yãmb ne y kambã la y yagensã vɩɩm tõe n yɩ noog wakat fãa, yãmb sẽn maand sẽn noom Sẽn-Ka-Saab sẽn yaa yãmb Wẽnnaamã yĩnga.

Sɩbgr Kana-rãmbã wẽn-naandsã yĩnga

²⁹ Sẽn-Ka-Saab sẽn yaa yãmb Wẽnnaamã sã n sãam buud nins yãmb sẽn na n deeg b tẽngã, y sã n wa reeg b tẽngã n kẽ n zĩndi,

³⁰ gũus-y n da lʋɩ-y b bẽdgã pʋgẽ, tɩ y sẽn sãam-bã, bɩ y leb n yik n maand wa bãmb ye. Gũus-y n da wa sok n na n bãng b wẽn-naandsã yelle, n wa sokd y mens n yetẽ: «Bu-bãmbã rag n tũuda b wẽn-naandsã wãn-wãna? Mam me na n maana wa bãmba!»

³¹ Ra maan-y-yã a woto Sẽn-Ka-Saab sẽn yaa yãmb Wẽnnaamã nifẽ ye. Bala, nin-bãmb dag n maanda yel-beed buud toor-toor nins Sẽn-Ka-Saab sẽn kisã b wẽnnaam-dãmbã yĩnga. Bãmb tol n dag n dɩkda b kom-dibli la b kom-pugli n yõogd bugum n kõt b wẽnnaam-dãmbã.