Vẽnegre 6 - WẼNNAAM SEBRE 2014

Sogds a yoobã sogsgo

¹ Pe-bilã sẽn sok soagdg a yembr sogds a yopoe wã sʋkã, mam gesame, la mam wʋma bõn-vɩɩs a naasã ned a yembr sẽn gom ne koɛɛg sẽn wẽnd wa sa-kɛleng n yeel yaa: Wa!

² Mam gesame, la mam yãnda wed-moaag sẽn yaa pɛɛlga. Sẽn zao-a weefã ra zãada tãpo, la b kõo yẽnda maanfo. La a kẽnga wa tõaagda, n na n tõoge.

³ Pe-bilã sẽn sok soagdg a yiibẽ soabã, mam wʋma bõn-vɩɩg a yiib soabã sẽn yeel yaa: Wa!

⁴ La wed-moaag a to kõbg sẽn yaa miuug wa bugum yiime. La b kõo sẽn da zao-a yẽnda wã pãn-tõog t'a yiis dũni laafɩ, tɩ nebã kood taaba. La b kõo yẽnda zabr sʋ-kãsenga.

⁵ La bãmb sẽn sok soagdg a tãabẽ soabã, mam wʋma bõn-vɩɩg a tãabẽ soabã sẽn yeel yaa: Wa! Mam gesame, la mam yãnda wed-moaag sẽn yaa sablga. Sẽn zao-a yẽnda wã dag n zãada balãns a nugẽ.

⁶ La mam wʋma bũmb sẽn wẽnd wa koɛɛg bõn-vɩɩs a naasã sʋka. A da yetame yaa: Bɩle bɛɛl ne wũmbl na n koosa hal deniye a yembre. Oorz ne wũmbl a tãab na n koosa deniye. La sã n yaa kaamã la reezẽ rãamã, ra sɩɩs-b ye.

⁷ Pe-bilã sẽn sok soagdg a naasẽ soabã, mam wʋma bõn-vɩɩg a naas-n-soaba koɛɛg sẽn yeel yaa: Wa!

⁸ Mam gesame la mam yãnda wed-moaag t'a kõbgã yaa kẽeg-kẽega. Sẽn dag n zao-a yẽnda wã yʋʋr boondame t'a kũum, la kɩɩm-kulg rag n pʋgda yẽnda. La b kõo bãmb pãn-tõog tɩ b tõog dũniyã ned a yembr neb a naas fãa sʋk n kʋ-b ne zabr sʋʋga, la kom, la bãase, la ne dũniyã we-rũmsi.

⁹ Pe-bilã sẽn sok soagdg a nu soabã, mam yãnda b sẽn dag n kʋ neb nins Wẽnnaam koɛɛgã poorẽ, la b sẽn kɩs kasetã yĩngã sɩɩs sẽn be tẽn-kugrã tẽngre.

¹⁰ Bãmb zẽka b koees ne pãng n yeel yaa: «Zu-soben-sõng la sɩd soaba, yãmb na n gũume hal tɩ ta dabʋr tɩ y yaool n kao dũniyã nebã bʋʋdo, la y rok y sũur tõnd zɩɩmã raagr yĩnga?»

¹¹ B kõo bãmb ned kam fãa fu-pɛɛlga, la b yeel-b tɩ b kell n vʋʋs wakat bilf yɛsa, hal tɩ bãmb tʋmd-n-taasã ne b ba-biisã b sẽn na n kʋ wa b sẽn kʋ bãmbã sõor pidi.

¹² Pe-bilã sẽn sok soagdg a yoobẽ soabã, mam gesame. Tẽn-digimdg kãseng n zĩndi. Wĩndgã lebga sablg diga wa bot sẽn wʋg ne rũm-sablg kõbdo, la kiuugã zãng lebga wa zɩɩm,

¹³ la yĩngr ãdsã sʋʋga tẽngã zug wa kankang sob-kãseng sẽn wẽ t'a kankam yorge.

¹⁴ Sa-gãongã looga wa sebr b sẽn pili. La tãmsã fãa ne tẽms nins koomã sẽn gũbgã sersa b zĩisẽ.

¹⁵ Dũni rĩm-dãmbã la nin-kãsemsã, la a sodaas nanambsã, la a arzegs rãmbã, la a pãens rãmbã, la a yembsã, ne burkĩmbã fãa, kẽng n tɩ soonda tãms bogdẽ la tãms pĩis sʋka.

¹⁶ La b rag n yeta tãmsã ne pĩisã yaa: «Lʋɩ n põd-y tõnd n solg tõnd tɩ d zãag ne sẽn zao-a geerã zugã gesgo la ne pe-bilã sũ-puugri.

¹⁷ Bala, Wẽnnaam ne pe-bilã sũ-puugrã ra-kãsengã taame, la ãndã n na n tõog n põse?»