Vẽnegre 4 - WẼNNAAM SEBRE 2014

Wẽnnaam paamda waoogr arzãn pʋga

¹ Dẽ poore, mam gesame, la haya! Mam yãnda kʋɩleng sẽn pak arzãn pʋga. La pipi koɛɛg ning sẽn wẽnd baorg mam sẽn da wʋm t'a gomd ne maamã yeela maam yaa: Rʋ yĩngr ka, la mam na n kɩtame tɩ fo yã bũmb nins sẽn yaa tɩlɛ tɩ wa zĩndã.

² Tao-tao bala, Sɩɩg-sõng pida maam. La ade, geer n da be arzãn pʋga, la ned n dag n zao geerã zugu.

³ Ned ning sẽn zao-a geerã zugã dag n wẽnda wa kug sẽn be yõod n boond tɩ zaspe la sardoan. La saag-gomtɩʋʋg sẽn wẽnd wa kugr sẽn boond tɩ emerood n dag n gũbg geerã.

⁴ La gɛy pisi la a naas n dag n gilg ge-kãsengã, la kãsem-dãmb pisi la a naas n zao b zutu, n yer fu-peelse, la b fõg sãnem maanf-rãmba.

⁵ Sa-yãgbo, la kelemse, la sa-kelems n yit geerẽ wã. Fɩtl-dãmb a yopoe n be geerã taoor n wit ne pãnga. Bãmb yaa Wẽnnaam sɩɩs a yopoe wã.

⁶ Geerã taoor dag n gãnega bũmb sẽn pɩnd wa vɛɛre, n tud n yaa wa kiristalle. La geerã sʋk ne sẽn gũbg geerã fãa, bõn-vɩɩs a naas n be beenẽ n pid ne nin taoor la poorẽ.

⁷ Pipi bõn-vɩɩgã wẽnda wa gɩgemde, la yiib soabã wẽnda wa nag-bila, la tãab soabã neng wẽnda wa ninsaal nenga, la naas soabã wẽnda wa panantugr sẽn yɩgda.

⁸ Bõn-vɩɩs a naasã ned kam fãa tara pɩgs a yoob sẽn pid ne nin b zĩigã fãa, la b pʋgẽ wã me. Wĩndg la yʋngo b yetame tɩ: Sõngo, sõngo, Zu-soab a Wẽnnaam sẽn Tõeyã fãa wã yaa sõngo. Bãmb da beeme la b bee moasã la b watame, n ka basdẽ ye.

⁹ La wakat ning bõn-vɩɩs a naasã sẽn pẽgd la b waoog sẽn zao-a geerã zug n vɩ zamaan woo zamaana, la b pʋʋsd-b barkã,

¹⁰ kãsem-dãmb pisi la a naasã wõgemdeda sẽn zao-a geerã zug la sẽn vɩ zamaan woo zamaana taoore, n waoogd-ba, la b lobd-b maanf-rãmbã geerã taoor la b yetẽ:

¹¹ Tõnd Zu-soab la d Wẽnnaam, yãmb n zems tɩ reeg ziiri, la waoogre, la pãnga. Bala, yãmb n naan bũmb fãa, la yaa yãmb daab yĩng la y naan-b tɩ b beẽ.