Vẽnegre 3 - WẼNNAAM SEBRE 2014

Koɛɛg Sard Kiris tẽedbã yĩnga

¹ Gʋls Sard wẽnd doogã gũud n yeel-a yaa: Ad soab ning sẽn tar Wẽnnaam sɩɩs a yopoe la ãds a yopoe wã sẽn yeta: «Mam bãnga yãmb tʋʋmã. Yãmb yʋʋr yiime tɩ y vɩɩme la y yaool n yaa kũum.

² Maan gũusgu, la f kɩt tɩ sẽn be fo pʋgẽ n nan ka ki wã leb n yẽege. Bala, mam mikame tɩ yãmb tʋʋmã ka zems mam Wẽnnaamã taoor ye.

³ Dẽ wã, bɩ y tẽeg yãmb sẽn deeg koɛɛgã la y wʋm-a to-to wã, tall-y-yã-a la y kos sugri. Yãmb sã n ka gũusi, mam na n waa yãmb nengẽ wa wagdre, la yãmb ka na n bãng sẽn yaa wakat ning la mam na n wa n ling yãmbã ye.

⁴ Baoosgo, yãmb tara neb kẽer Sard sẽn ka rẽgem b fut ye. Bãmb na n kẽna ne maam ne fu-peelse, bãmb sẽn zems tɩ kẽn ne maamã yĩnga.

⁵ Ned ning sẽn na n tõogã na n yeelga fu-peels a woto. Mam ka na n yẽes yẽnda yʋʋrã vɩɩm sebrã pʋgẽ ye, la mam na n boola yẽnda yʋʋrã m ba la malegsã taoore.»

⁶ Bɩ ned ning sẽn tar-a tʋb kelg bũmb ning Sɩɩg-sõng sẽn togsd wẽnd-dotã.

Koɛɛg Filadɛlfi Kiris tẽedbã yĩnga

⁷ Gʋls Filadɛlfi wẽnd doogã gũud n yeel-a yaa: Ad bũmb sõmblem soabã, sɩd soabã, sẽn tar-a a Davɩɩd kʋɩlen-bilã, soab ning sẽn pakd tɩ ned ka tõe n pagã, soab ning sẽn pagd tɩ ned ka tõe n pakã sẽn yeta:

⁸ «Mam bãnga yãmb tʋʋmã. Gese, mam ninga kʋɩleng sẽn pak yãmb taoor tɩ ned ka tõe n pag-a ye, tɩ bala yãmb pãngã paoodame, la yãmb talla mam koɛɛgã, la y ka kɩɩs mam yʋʋrã ye.

⁹ Ade, mam na n ninga neb nins sẽn yaa a Sʋtãan tũudbã yãmb nugẽ. Bãmb yagda zĩrẽ n boond b mens tɩ Zʋɩf-rãmba, tɩ yaool n ka sɩd ye. Gese, mam na n kɩtame tɩ b wa n wõgemd yãmb taoore, la b bãng tɩ mam nonga yãmba.

¹⁰ Yãmb sẽn tall mam koɛɛg ning sẽn kɩt tɩ yãmb nangd pãng mam pʋgẽ wã yĩnga, mam me na n kogla yãmb wakat ning makrã sẽn na n wa dũniyã tɛk fãa n mak nebã sẽn be a zugã.

¹¹ Mam wata tao-tao. Gãd-y bũmb nins yãmb sẽn tarã kãenkãe, tɩ ned da reeg yãmb maanfã ye.

¹² Mam na n kɩtame tɩ ned ning sẽn tõog-a wã lebg ra-luk mam Wẽnnaamã roog pʋga, la yẽnda kõn leb n yi be ye. Mam na n gʋlsa mam Wẽnnaamã yʋʋre, la m Wẽnnaamã tẽng sẽn ya Zeruzalɛm paalg sẽn yit mam Wẽnnaamã nengẽ arzãn n sigdã yʋʋr yẽnda zugu, la m gʋls mam yʋ-paalgã yẽnda zugu.»

¹³ Bɩ ned ning sẽn tar tʋb kelg bũmb nins Sɩɩg-sõng sẽn yet wẽnd-dotã.

Koɛɛg Laodiise Kiris tẽedbã yĩnga

¹⁴ Gʋls Laodiise wẽnd doogã gũud n yeel-a yaa: Ad bũmb ning sẽn yaa-a Ãmina, la kaset soab sẽn yaa tɩrga, la sɩd soabã, sẽn naan-a Wẽnnaam bõn-naandsã sẽn yeta:

¹⁵ «Mam bãnga yãmb tʋʋmã. Yãmb ka maasga la y ka tʋʋlg me ye. Mam nongẽ‑la yãmb sẽn dag n na n yaẽ tʋʋlga, wall maasga.

¹⁶ Woto, yãmb sẽn yaa zalzal n ka maasg la y ka tʋʋlgã yĩnga, mam na n wʋka yãmb m noorẽ.

¹⁷ Yãmb yetame: «Tõnd yaa arzegs rãmba, tõnd paama arzegse la tõnd ka leb n baood baa fʋɩ», n yaool n ka mi tɩ y yaa nimbãan-dãmba, n be namsg pʋgẽ, la y ya naong rãmba, zoense, la bɛɛl ye,

¹⁸ mam sagenda yãmb tɩ y ra sãnem sẽn yɩlg ne bugum mam nengẽ, tɩ y tõe n lebg arzegs rãmba, la y ra fu-peels mam nengẽ, tɩ y tõe n paam n yeelge, n lud y yãnd n da yɩ y zaal ye, la y ra nin kaam mam nengẽ n sõog y ninã tɩ y tõe n yã.

¹⁹ Mam lengda neb nins fãa mam sẽn nonge, la m sɩbgd-ba. Dẽ wã, bɩ y nang pãng la y tek yam n kos sugri.

²⁰ Ade, mam yasa rignoorẽ n kabsdẽ. Ned sã n wʋm mam koɛɛgã n pak kʋɩlengã, mam na n kẽe yẽnda roogẽ n dɩ ne yẽnda la yẽnda na n dɩɩ ne maam.

²¹ Mam na n kɩtame tɩ ned ning sẽn tõogã zĩnd ne maam mam geerã zug wa mam sẽn tõoge, n zao ne m ba b geerã zugã.»

²² Bɩ ned ning sẽn tar tʋb kelg bũmb ning Sɩɩg-sõng sẽn yet wẽnd-dotã.