Vẽnegre 22 - WẼNNAAM SEBRE 2014

Arzãn soolem

¹ Malɛɛkã wilga maam vɩɩm koomã kʋɩlga, kʋɩlg sẽn pɩnd wa vɛɛre, la a yita Wẽnnaam ne pe-bilã geerẽ wã.

² Vɩɩm tɩɩgã bee tẽngã sʋka la kʋɩlgã kɩrems a yiibẽ wã. A womda naoor piig la a yiibu, a womda a biisã kiuug fãa. Tɩɩgã vãad tar n maagda soolem toay-toayã neb bãase.

³ Wẽnnaam sẽn kãab bũmb wẽng kõn leb n zĩnd be ye. Wẽnnaam ne pe-bilã geer na n zĩnda tẽngã pʋga. Bãmb tʋmtʋmdbã na n waooga bãmba,

⁴ b na n yãnda Wẽnnaam nenga, la Wẽnnaam yʋʋrã na n zĩnda bãmb dĩyẽ wã.

⁵ Yʋng kõn leb n zĩnd ye, la nebã kõn dat fɩtl vẽenem wall wĩntoog vẽenem ye. Bala, Zu-soab a Wẽnnaam n na n yɩ bãmb vẽenem. La bãmb na n dɩɩ naam zamaan woo zamaana.

A Zeezi waoong kolgame

⁶ Malɛɛkã yeela maam yaa: Sãmbg ka be gom-kãens pʋgẽ ye, la b yaa sɩda. Zu-soabã sẽn yaa no-rɛɛsdbã sɩɩs Wẽnnaamã tʋma b malɛɛk t'a wilg bãmb tʋmtʋmdbã bũmb nins sẽn tog n zĩnd bilf sã n paase.

⁷ La a Zeezi yeelame: Gese, bilf sã n paas bala, mam na n waame. Bark bee ned ning sẽn sakd seb-kãngã bãngr goamã zugu.

⁸ Yaa maam a Zã n wʋm bõn-kãense la m yãnd-ba. La mam sẽn wʋm bõn-kãens la m yãnd-bã, mam wõgemda malɛɛk ning sẽn da wilgd maam bõn-kãensã taoor n na n waoog-a.

⁹ La a yeela maam yaa: Ra saag n maan a woto ye! Mam yaa fo tʋmd-n-taaga, la Wẽnnaam no-rɛɛsdbã sẽn yaa fo ba-biisã tʋmd-n-taaga, la neb nins sẽn sakd seb-kãngã goamã tʋmd-n-taaga. Waoog Wẽnnaam!

¹⁰ Dẽ poore malɛɛkã yeela maam yaa: Da solg seb-kãngã pĩnd-n-bãngr goamã ye! Bala, b pidsgã wakat kolgame.

¹¹ Bɩ ned ning sẽn yaa ka-tɩrlem soab kell n paas a ka-tɩrlmã, tɩ ned ning sẽn yaa tʋʋm-dẽgd soab kell n dẽgem a meng n paase, tɩ ned ning sẽn yaa tɩrg kell n maan tɩrlem n paase, tɩ ned ning sẽn yaa yolgemd kell n yɩ yolgemd n paase!

¹² A Zeezi yeelame: Gese, bilf bal sã n paase, mam na n waame, la mam zãada keoor n watẽ n na n keo ned kam fãa wa sẽn zems a tʋʋmde.

¹³ Maam la Alfa la Omega, dẽenem la yaoolem, Sɩngre la Sɛɛbo.

¹⁴ Bark bee neb nins sẽn pegsd‑b futu, sẽn na n yɩl la b paam noor tɩ rɩ vɩɩm tɩɩgã biisi, la b tũ tẽngã noy n kẽ tẽngã pʋgẽ wã zutu.

¹⁵ Ninsaan-baasã, tɩ-rɩtbã, nin-yoaadbã, nin-kʋʋdbã, wẽnd-naands pʋʋsdbã, la ned ning fãa sẽn nong zĩrẽ la sẽn yagd zĩrẽ paada yɩnga, n ka kẽ tẽngã pʋg ye.

¹⁶ Maam a Zeezi n tʋm m malɛɛk t'a wa n kɩs yãmb bõn-kãens kaset wẽnd-dotã pʋse. Mam yaa a Davɩɩd tɩ-tobeng la a yagenga, la yibeoog ãd-yãgdga.

¹⁷ Sɩɩg-sõng ne pʋg-paalã yetame yaa: Wa-y-yã! Bɩ ned ning sẽn wʋmd-a yeel tɩ: Wa-y-yã! Bɩ ko-yũud sẽn tar‑a soab wa, la sẽn dat-a bɩ a reeg vɩɩm koom zaalem!

¹⁸ Mam yeta ned ning fãa sẽn wʋmd seb-kãngã bãngr goamã tɩ ned sã n paas bũmb be, Wẽnnaam na n paasa tood nins b sẽn bils seb-kãngã pʋgẽ wã yẽnda sɩbgrã zugu.

¹⁹ La ned sã n boog bãngr gom-kãensã sebrã goamã, Wẽnnaam na n deega pʋɩɩr ning yẽnda sẽn da na n paam ne vɩɩm tɩɩgã la tẽn-sõngã b sẽn bilg seb-kãngã pʋgẽ wã n bas-a.

²⁰ Ned ning sẽn kɩt-a bõn-kãensã kasetã yetame yaa: «N-yẽe, sã n yɩ bilf bala, mam na n waame.» Ãmina! Zu-soab a Zeezi, wa-y-yã!

²¹ Bɩ Zu-soab a Zeezi barkã zĩnd ne yãmb fãa.