Vẽnegre 10 - WẼNNAAM SEBRE 2014

Malɛɛk sẽn zãad seb-bil sẽn lake

¹ Mam yãnda malɛɛk a to sẽn tar pãng n yer sawadgo, t'a yi arzãn n sigda, la saag-gomtɩʋʋg n dag n be yẽnda zugẽ wã. A nengã rag n yaa wa wĩntoogo, la a naoã rag n yaa wa bugum.

² Yẽnda rag n zãada seb-bil sẽn lake. A tilga a rɩtg naoorã ko-kãsengã zugu, la a tilg a goabg naoorã tẽngã zugu.

³ A zẽka a koɛɛg n tãs ne pãng wa gɩgemd sẽn kelemde. Malɛɛkã sẽn kelmã, sa-kelems a yopoe wã gomame tɩ nebã wʋme.

⁴ Sa-kelems a yopoe wã sẽn gomã, mam dag n na n gʋlsame, la mam wʋma koɛɛg sẽn yi arzãn n yeel yaa: «Solg bũmb nins sa-kelems a yopoe wã sẽn togsã, la f ra gʋls-b ye.»

⁵ La malɛɛk ning mam sẽn da yã t'a yas ko-kãsenga ne tẽngã zugã zẽka a nug‑rɩtg n tees yĩngri,

⁶ la a wẽena ne soab ning sẽn vɩ-a zamaan woo zamaanã, sẽn naan-a yĩngr ne bũmb nins sẽn be beenẽ wã, la dũniyã ne bũmb nins sẽn be beenẽ wã, la ko-kãsengã ne bũmb nins sẽn be a pʋgẽ wã, n wẽen n yeel tɩ wakatã ka na n leb n kaoos yɛs ye.

⁷ La daar ning malɛɛk a yopoe soabã sẽn wat n segl n na n peeb baorgã, wakat-kãng la Wẽnnaam yel-solemdã na n paam pidsg wa b sẽn dag n togs b tʋmtʋmdbã sẽn yaa bãmb no-rɛɛsdbã koe-noogã.

⁸ La koɛɛg ning sẽn yi arzãn tɩ mam wʋmã leb n goma ne maam n yeel yaa: Kẽng n tɩ reeg seb-bilã sẽn lakã, malɛɛk ning sẽn yas-a ko-kãsengã ne tẽngã zugã nugẽ.

⁹ Mam kẽnga malɛɛkã nengẽ n yeel-a t'a kõ maam seb-bilã. La a yeela maam yaa: Reeg-a n vele. A na n pidsa fo pʋgã ne toolem liga, la fo noorẽ wã, a na n yɩɩ noog wa sɩɩdo.

¹⁰ Mam deega seb-bilã malɛɛkã nugẽ n vele. A yɩɩ noog wa sɩɩd mam noorẽ wã, la mam sẽn vel-a wã, mam pʋgã pida ne toolem.

¹¹ Dẽ poore, b yeela maam yaa: Yaa tɩlɛ tɩ fo leb n togs bãngr goam yɛs n gom neb wʋsg yelle, la buud wʋsg yelle, la goam buud wʋsg yelle, la rĩm-dãmb wʋsg yelle.