Tʋʋma 9 - WẼNNAAM SEBRE 2014

¹ Baoosgo, a Soll sẽn dag n ket n namsd Zu-soabã karen-biis n dat kʋ-bã, a kẽnga maan-kʋʋdbã kãsem nengẽ

² n tɩ kos-a t'a gʋls sɛb n tʋm karen-dot nins sẽn be Damaasã tɩ yẽnda sã n tɩ yãnd neb beenẽ sẽn tũud Zu-soabã sore, sã n yaa raop wala pagba, bɩ yẽnda yõg-b n tall n wa Zeruzalɛm.

³ La yẽnda sẽn wa n be sorẽ n kolg Damaase, tao-tao bala, vẽenem n yi arzãn n yãg n gũbg yẽnda.

⁴ La a Soll lʋɩɩ tẽnga. La a wʋma koɛɛg sẽn yet yẽnda yaa: Solle, Solle, yaa bõe tɩ fo namsd maam?

⁵ A Soll leokame tɩ Zu-soaba, yãmb yaa ãnda: La Zu-soabã yeelame yaa: Mam yaa a Zeezi fo sẽn namsd a soabã. [Na n yɩɩ toog ne foom, fo sẽn kɩɩsdã yĩnga. La yẽnda ra yɛɛsame n digd n sok Zu-soabã tɩ bãmb datame tɩ yẽ maan bõe. Dẽ Zu-soabã yeela yẽnda]

⁶ Yik n kẽ tẽngã pʋgẽ, la beenẽ b na n yeela foom bũmb ning f sẽn tog n maane.

⁷ La raop nins sẽn da tũud a Sollã yɛɛsame n yas n ka tõe n gom ye. B dag n wʋmda koɛɛgã la b ka ne ned ye.

⁸ A Soll yikame, la baa yẽnda ninã sẽn pukã, a ra ka tõe n yãnd baa fʋɩ. B gãda a nug n tɛ-a n kẽng Damaase.

⁹ Yẽnda maana rasem a tãab n ka tõe n yãnd ye. La a ka rɩ wala a yũ bũmb ye.

¹⁰ Karen-biig a ye n dag n be Damaas t'a yʋʋr boond t'a Hananiyaase. Zu-soabã puka b meng ne yẽnda vẽnegr pʋgẽ n yeel-a tɩ Hananiyaas! T'a leok yaa: Ad maam Zu-soaba.

¹¹ Zu-soabã yeela a Hananiyaas yaa: Yik n kẽng sor ning sẽn boond tɩ tɩrgã n ta a Zʋdaas zakẽ n bao ned a yembr sẽn yit Tars t'a yʋʋr boond t'a Solle.

¹² Bala, yẽnda yãnda vẽnegr pʋgẽ tɩ ned a yembr yʋʋr sẽn boond t'a Hananiyaas n wa n tik yẽnda ne a nus t'a leb n paam a nini.

¹³ A Hananiyaas leokame n yeel yaa: Zu-soaba, mam wʋma neb wʋsg sẽn gomd rao-kãngã sẽn maan yãmb nebã sẽn be Zeruzalɛmã wẽng wʋsgã yelle.

¹⁴ La maan-kʋʋdbã kãsem-dãmb kõo yẽnda noor t'a wa ka n yõg neb nins fãa sẽn pʋʋsd ne yãmb yʋʋrã.

¹⁵ La Zu-soabã yeela a Hananiyaas yaa: Kẽnge. Bala, mam yãka rao-kãngã n na n kɩt t'a tall mam yʋʋrã n wilg bu-zẽmsã la rĩm-dãmbã, la Israyɛll nebã.

¹⁶ La mam meng n na n wilg yẽnda namsg nins fãa yẽ sẽn tog n nams mam yʋʋrã yĩngã.

¹⁷ La a Hananiyaas kẽngame. La yẽnda taa n kẽe roogẽ wã n tik a Soll ne a nus n yeel-a yaa: Ba-biig a Solle, Zu-soab a Zeezi sẽn puk b meng ne yãmb y sẽn wa n be sorã zug n watẽ wã tʋma maam tɩ m wa tɩ y tõe n leb n paam y nini, la y pid ne Sɩɩg-sõngo.

¹⁸ La tao-tao bala, bũmb sẽn wẽnd wa nod-pags yii a Soll nini wã n lʋɩ. La yẽnda leb n paama a nini. La yẽ yikame n deeg koom lisgu.

¹⁹ Dẽ, a Soll deega rɩɩb n dɩ la a pãnga leb n waame.

A Soll moona Koe-noog Damaas

²⁰ La a Soll paa ne karen-biisã sẽn be Damaasã rasem bilfu. La tao-tao bala, yẽnda sɩngame n moond koɛɛgã karen-dotã pʋsẽ n yetẽ t'a Zeezi yaa Wẽnnaam Bi-ribla.

²¹ Neb nins fãa sẽn wʋm yẽnda wã yɛɛsame n sokdẽ tɩ rao-kãngã n dag n namsd neb nins sẽn be Zeruzalɛm n pʋʋsd ne a Zeezi yʋʋrã wɛ! Tɩ la yẽnda ka wa ka n na n yõg neb nins sẽn pʋʋsd ne a Zeezi yʋʋrã n tall-b n kẽng n tɩ kõ maan-kʋʋdbã kãsem-dãmbã wɛ?

²² La a Soll koe-moonegã pãng ra paasdame. Daar fãa yẽ ra tõogda Zʋɩf-rãmbã sẽn be Damaasã n wilgd-b t'a Zeezi sɩd yaa Kirisã.

A Soll põsa Zʋɩf-rãmbã nusẽ

²³ La sẽn kaoos bilfu, Zʋɩf-rãmbã naaga taab n yãk yam n dat n kʋ a Solle.

²⁴ La a Soll bãnga b yam-wẽngã. Bãmb dag n gũusda tẽngã noyã wĩndg la yʋngo, sẽn na n yɩl n kɩt tɩ b kʋ a Solle.

²⁵ Dẽ, karen-biisã kẽesa a Soll peoogẽ ne yʋng n gãndg n sik yẽnda lalgã poore.

A Soll bee Zeruzalɛm

²⁶ A Soll sẽn ta Zeruzalɛm, yẽnda makame n dat n lagem ne karen-biisã, la bãmb fãa ra zoeta a Solle. Bala, b ra ka tẽed t'a Soll sɩd lebga a Zeezi karen-biig ye.

²⁷ Dẽ, a Barnabaas peega a Soll n tall-a n kẽng tẽn‑tʋmdbã nengẽ, n togs bãmb a Soll sẽn yã Zu-soabã sorã zugã, la Zu-soabã sẽn gom ne-a to-to wã. La yẽ togsa bãmb a Soll sẽn moon koɛɛgã ne pɛl-kɛgeng Damaas tẽngã pʋgẽ ne a Zeezi yʋʋrã.

²⁸ La a Soll dag n tũuda bãmb n gõod la a wat Zeruzalɛm la a moond koɛɛga ne Zu-soabã yʋʋr ne raoodo.

²⁹ A Soll ra gomda ne Zʋɩf-rãmb nins sẽn gomd Gɛrk goamã la a wẽed nokoɛɛm ne-ba. La b ra baood n na n kɩtame tɩ b kʋ a Solle.

³⁰ La ba-biisã sẽn bãng bõn-kãnga, b talla a Soll n ta Sezaare n kɩt t'a kẽng Tarse:

³¹ A Zeezi tẽedbã sẽn be Zʋʋde la Galɩle ne Samaari wã fãa dag n bee laafɩ, b pãnga ra paasdame la b ra sakda Zu-soabã, la Sɩɩg-sõng ra sõngd-b lame tɩ b lebgd wʋsgo.

A Ene paama maagre

³² A Pɩyɛɛr sẽn da saagd zĩigã fãa n get nin-tũusdsã, a kẽnga a Zeezi tẽedbã sẽn dag n be Lida wã nengẽ.

³³ La yẽnda yãnda rao a yembr beenẽ t'a yʋʋr boondẽ t'a Ene n yaa ki-bogre, n gãe gãag zug hal yʋʋm a nii.

³⁴ A Pɩyɛɛr yeel-a lame yaa: Ene, a Zeezi maagda foom, yik n maneg f gãagã f toore. La tao-tao bala a Ene yikame.

³⁵ Lida ne Saaron tẽngã nebã fãa yãnda a Ene la b saka Zu-soabã.

A Dorkaas vʋʋgame

³⁶ Tẽed-poak a ye n da be Zope t'a yʋʋr boond t'a Tabita sẽn dat n togs tɩ Dorkaas ne Gɛrk goamã. A yʋʋrã võor yaa yãka: Pʋg-kãng ra maanda tʋʋm-sõamyã wʋsgo, la a sõngd naong rãmba.

³⁷ Ra-kãense, a Dorkaas lʋɩɩ bãag n ki. La b sẽn so yẽ koom n sɛ, b rɩk-a lame n gãneg yĩngr doog pʋgẽ.

³⁸ La Lida dag n ka zãr ne Zope ye. Dẽ, karen-biisã sẽn wʋm t'a Pɩyɛɛr bee Lida, b tʋma raop a yiib yẽ nengẽ tɩ b tɩ bõos-a t'a wa bãmb nengẽ n da kaoos ye.

³⁹ La a Pɩyɛɛr yikame n tũ-b n looge. La a Pɩyɛɛr sẽn ta be, b tall-a lame n dʋ yĩngr doogã pʋgẽ. La pʋg‑kõapã fãa kolga yẽnda n yãbd la b wilgd yẽndã fu-yerd ninsi, la fut nins a Dorkaas sẽn dag n sẽ a sẽn wa n ket n vɩ wã.

⁴⁰ A Pɩyɛɛr kɩtame tɩ nebã fãa yi. La yẽ yĩgimdame n pʋʋse. Dẽ a wẽnemdame n ges kũumã n yeel-a tɩ: Tabita yiki. La a puka a nini. La a sẽn yãnda a Pɩyɛɛre, a yikame n zĩndi.

⁴¹ La a Pɩyɛɛr gãda a nug n sõng-a t'a yik yĩngri. A Pɩyɛɛr boola nin-sõamyã ne pʋg‑kõapã n wilg-b t'a Dorkaas vʋʋgame.

⁴² Zope tẽnga fãa wʋma bõn-kãnga, la neb wʋsg tẽe Zu-soabã.

⁴³ A Pɩyɛɛr paa Zope n kaoos bilfu, yẽnda siga zap a sɩmo yiri.