Tʋʋma 5 - WẼNNAAM SEBRE 2014

A Ananiyaas ne a Safɩɩra

¹ La rao a yembr yʋʋr sẽn boond t'a Hananiyaas ne a pag a Safɩɩra me koosa b pʋʋgo.

² La a Ananiyaas ne a pagã seda ne taab n yãk ligdã n bĩng b mens yĩnga. La a rɩk sẽn kellã n tɩ kɩs tẽn-tʋmdbã.

³ La a Pɩyɛɛr sok-a lame yaa: Ananiyaase, yaa bõe tɩ Sʋtãanã soog fo sũurã halɩ n kɩt tɩ f yag zĩrẽ ne Sɩɩg-sõng n yãk pʋʋgã ligd fo sẽn koosã?

⁴ Fo sẽn dag n nan ka koos pʋʋgã, a ka foom n so la? La fo sẽn koos-a wã ligdã ka fo rẽnd sɩda? La yɩɩ a wãn tɩ fo tags f sũurẽ tɩ maan bõn-kãnga? Fo ka yag zĩrẽ wã ne ninsaalb ye, la yaa ne Wẽnnaam la f yag yã.

⁵ A Ananiyaas sẽn wʋm gom-kãense, a lʋɩɩ tẽng n ki. La rabeem kãseng yõka neb nins fãa sẽn wʋm yel-kãnga

⁶ La kom-bɩɩsã yikame n dɩk-a n vil ne pɛɛl n tɩ mume.

⁷ La sẽn kaoos bilf n kolg lɛɛr a tãabo, a Ananiyaas pagã me kẽeme la yẽnda ka bãng bũmb ning sẽn da maanã ye.

⁸ A Pɩyɛɛr sok-a lame yaa: Togs maam yãmb sã n koosa y pʋʋgã a woto tɛka. La a leokame tɩ n-yẽe, tɩ yaa woto tɛka.

⁹ Dẽ, a Pɩyɛɛr yeela yẽnda yaa: Yɩɩ a wãn tɩ yãmb sed ne taab n na n mak Zu-soabã Sɩɩga? Gese, neb nins sẽn mum fo sɩdã bee rignoorẽ, la bãmb na n dɩka foom me n looge.

¹⁰ La wakat-kãng bala, yẽnda lʋɩɩ tẽng a Pɩyɛɛr taoor n ki. La kom-bɩɩsã kẽeme n mik t'a Safɩɩra kiime. La b rɩk-a lame n tɩ mum n yegl a sɩdã.

¹¹ Rabeem kãseng yõka tẽedbã fãa ne neb nins fãa sẽn wʋm bõn-kãensã.

Bõn-bãn ne bõn-yɛɛsds wʋsg maaname

¹² Tẽn-tʋmdbã maana bãn la bõn-yɛɛsds wʋsg nebã sʋka. Tẽedbã fãa tigma taab zĩig ning b sẽn boond t'a Salmo zãndã.

¹³ La neb a taabã sʋk ned ba a yembr da ka saagd n dat n naag-b ye. La nebã rag n pẽgda tẽedbã wʋsgo.

¹⁴ Raop la pagb wʋsg sẽn da tẽed Zu-soabã tara paasg daar fãa.

¹⁵ B rag n tallda bãad-dãmb ne gãas wala pãnday n wat n gãnegd-b soayã zut tɩ daar ninga, a Pɩyɛɛr sã n wa n loogdẽ, bɩ a maasmã tõe n bui bãad-dãmb kẽere.

¹⁶ La neb wʋsg-wʋsg yii tẽms sẽn yeg Zeruzalɛm n tall bãad-dãmb la neb zĩn-dẽgd sẽn namsd n wa. La bãmb fãa paama maagre.

A Pɩyɛɛr ne a Zã paama namsgo

¹⁷ La maan-kʋʋdbã kãsem ne neb nins fãa sẽn da be ne yẽnda wã, sẽn dat n togs tɩ Saduusẽ-dãmbã, yik n pida ne sũ-kiiri.

¹⁸ Bãmb yõga tẽn-tʋmdbã n kẽes bi-bees roogẽ.

¹⁹ La Zu-soabã malɛɛk waa ne yʋng n pak bi-bees roogã kʋɩleng n yiis tẽn-tʋmdbã n yeel-b yaa:

²⁰ Kẽng-y n tɩ yals-y wẽnd doogã pʋg n togs nebã vɩɩm‑kãngã koɛɛgã fãa.

²¹ La bãmb sẽn wʋm woto, bãmb kẽe wẽnd doogẽ wã yibeoog pĩnd n sɩng n zãmsd nebã. La maan-kʋʋdbã kãsem ne neb nins sẽn da be ne yẽnda wã waame n tigim kaorengã yɛl-bʋ-kaoodbã la Israyɛll kãsem-dãmbã, La b tʋmame tɩ b tall tẽn-tʋmdbã sẽn be bi-bees roogẽ wã n wa.

²² La gũudbã sẽn ta bi-bees roogẽ wã, b ka yãnd tẽn-tʋmdbã be ye. La b lebgame n tɩ yeel yaa:

²³ Tõnd yãnda bi-bees roogã sẽn pag sõama, tɩ gũudbã yas noyẽ wã n gũudẽ. La tõnd sẽn pake d ka yã ned doogã pʋgẽ ye.

²⁴ La bãmb sẽn wʋm gom-kãensã, wẽnd-doog gũudbã kãsem ne maan-kʋʋdbã kãsem-dãmb dag n ka mi b sẽn na n tags bũmb ning tẽn-tʋmdbã wɛɛngẽ ye, la b rag n sokda b mens tɩ yel-kãngã na n yɩɩ a wãna.

²⁵ La ned n wa n yeel-b tɩ neb nins bãmb sẽn dag n kẽes bi-bees roogẽ wã bee wẽnd doogẽ wã n zãmsd nebã.

²⁶ La wẽnd-doog gũudbã kãsem ne gũudbã kẽngame n tɩ tall tẽn-tʋmdbã n wa n ka maan-b pãng ye. Bala, gũudbã rag n yɛɛsdame tɩ nebã na n wa lob bãmb kuga.

²⁷ La b sẽn tall tẽn-tʋmdbã n leb n wa, b kɩtame tɩ b yals kaoreng yɛl-bʋ-bʋʋdbã taoore. La maan-kʋʋdbã kãsem yeel-b lame yaa:

²⁸ Tõnd dag n yeela yãmb tɩ y ra leb n saag n zãms nebã ne yʋ-kãngã ye. La ade, yãmb pidsa Zeruzalɛm ne y zãmsgã. La y rat n dɩk raoã kũum yell n dogl tõnd zutu!

²⁹ A Pɩyɛɛr ne tẽn-tʋmdbã leokame yaa: Tõnd tog n saka Wẽnnaam n yɩɩd ninsaalbã.

³⁰ Tõnd yaab-rãmbã Wẽnnaam vʋʋga a Zeezi yãmb sẽn dag n ka a soab da-pɩkã zug tɩ b ki wã.

³¹ Wẽnnaam zẽka a Zeezi tɩ b be bãmb rɩtgo n yaa rĩmã la fãagda n na n kõ Israyɛll nebã yam tekre la yel-wẽnã sugri.

³² Tõnd yaa bõn-kãens kaset dãmba. La Sɩɩg-sõng Wẽnnaam sẽn kõ neb nins sẽn sak bãmbã me yaa kaset soaba.

³³ La kaoreng yɛl-bʋ-bʋʋdbã sẽn wʋm gom-kãense, b sũyã puugame tɩ b ra baood tẽn-tʋmdbã n dat n kʋ.

³⁴ La tõog karen-saamb a yembr yʋʋr sẽn boond t'a Gamalyɛll n yaa Fariizẽ ned n dag n be b sʋka. La nebã ra waoogda yẽnda la a yika kaoreng yɛl-bʋ-bʋʋdbã taoor n kõ noor tɩ b yiis tẽn-tʋmdbã tɩ yɩ bilfu.

³⁵ La yẽnda yeela nebã yaa: Israyɛll nebã, gũus-y ne bũmb ningã yãmb sẽn dat n maan nin-bãmbã wã.

³⁶ Bala, a Tedaas yika wakat sẽn ka zãra n yetẽ tɩ yẽnda yaa nin-kãsenga. La neb sẽn kolg kobs-naas da tũuda yẽnda. La b kʋ-a lame, la neb nins fãa sẽn da tũud yẽnda wã zoe n sãeegame, la b tũudmã yɩɩ zaalem.

³⁷ La yẽnda sẽn looge, Galɩle dao a Zʋdaas me yika sõdbã wakat n kɩt tɩ neb wʋsg tũ yẽnda. La b kʋʋ yẽ me, la neb nins fãa sẽn da tũud yẽnda wã sãeegame.

³⁸ Dẽ, moasã, mam yeta yãmb tɩ y bas nin-bãmbã tɩ b loog la y ra leb n bao tɩ maan bãmb bũmb ye. Bala, bãmb sẽn maandã, wala b tʋʋmã sã n yaa ninsaalb rẽnda, a na n sãama b toore.

³⁹ La b sã n yita Wẽnnaam nengẽ, yãmb kõn tõog n sãam-b ye. Gũus-y y mens n da wa n zab ne Wẽnnaam ye.

⁴⁰ Bãmb saka a Gamalyɛll goamã. La b leb n boola tẽn-tʋmdbã n kɩt tɩ b pãb-b ne kalwaase n yeel-b tɩ b ra leb n saag n gom ne a Zeezi yʋʋre, La b bas-ba.

⁴¹ Tẽn-tʋmdbã yii kaoreng yɛl-bʋ-bʋʋdbã taoor ne sũ-noogo b sẽn ges tɩ bãmb zemsame tɩ paam namsg a Zeezi yʋʋrã yĩnga.

⁴² Bãmb dag n zãmsda nebã la b moond a Zeezi Kiris koe-noogã wẽnd doogẽ wã la zagsã pʋs daar fãa n ka basdẽ ye.