Tʋʋma 3 - WẼNNAAM SEBRE 2014

Koams paama maagre

¹ Zaabr lɛɛr a tãab sẽn yaa pʋʋsgã wakat sẽn ta, a Pɩyɛɛr ne a Zã da tũu taab n kẽng wẽnd doogẽ wã.

² La rao a ye sẽn dog ne komsem n da be be. La b ra rɩkda yẽnda daar fãa n wat n zĩndgd-a wẽnd doogã noor ning b sẽn boond tɩ rigno-neerã t'a bõosd neb nins sẽn da kẽed wẽnd doogẽ wã.

³ La raoã sẽn yã a Pɩyɛɛr ne a Zã sẽn dat n kẽ wẽnd doogẽ wã, yẽnda bõos-b lame.

⁴ A Pɩyɛɛr ne a Zã gesa yẽnda n yeel-a t'a ges bãmba.

⁵ La raoã gesa a Pɩyɛɛr ne a zã n tẽed tɩ bãmb na n kõ-a-la bũmbu.

⁶ La a Pɩyɛɛr yeel-a lame yaa: Mam ka tar wanzuri wala sãnem ye, la mam kõta foom bũmb ning mam sẽn tarã, ne a Zeezi Kiris sẽn yi Nazarɛt yʋʋre, yik n kẽne!

⁷ La a Pɩyɛɛr gãda raoã nug-rɩtgo, n kɩt t'a yiki. La wakat-kãng bala koamsã naoã ne a nao-sẽbã lebga kãenkãe.

⁸ La yẽnda yika wʋgʋp n yals yĩngr n sɩng kẽna. La yẽ kẽname n tũ bãmb n kẽ wẽnd doogẽ wã n yɩgd n tiimsd n pẽgd Wẽnnaam.

⁹ Nebã fãa yãnda yẽnda sẽn kẽnd la a pẽgd Wẽnnaamã.

¹⁰ La bãmb bãngame tɩ yaa rao ning sẽn da zĩ wẽnd doogã rignoor ning sẽn boond tɩ neerã n bõosdẽ wã, la b sẽn yã bũmb ning sẽn maan raoã, dabeem yõk-b lame tɩ b yɛɛs wʋsgo.

A Pɩyɛɛr moona koɛɛg wẽnd doogã pʋgẽ

¹¹ La raoã sẽn da pʋgd a Pɩyɛɛr ne a Zã wã, nebã fãa yɛɛsame n zoe n kẽng bãmb nengẽ, zĩig sẽn boond t'a Salmo veranda wã.

¹² A Pɩyɛɛr sẽn yã woto, a yeela nebã yaa: Yãmb Israyɛll nebã, yaa bõe tɩ bõn-kãngã yɛɛs yãmba? La yaa bõe yĩng tɩ yãmb get tõnd a woto wala yaa ne tõnd pãng wala d sõmblem yĩng la d tõog n kɩt rao-kãngã kẽnda?

¹³ Yaa a Abrahaam ne a Izak la a Zakoob Wẽnnaam sẽn yaa tõnd yaab-rãmbã Wẽnnaamã n waoog b tẽn-tʋmd a Zeezi. Yaa bãmb la yãmb sẽn da zãmb n yõk n kɩs a Pilate, t'a Pilat da tags n dat n bas-b tɩ yãmb tõdg yẽnda taoorã.

¹⁴ Yãmb tõdga sõmblem la tɩrlem soabã, n kos tɩ b bas nin-kʋʋdã n kõ-yã.

¹⁵ La y yaool n kɩt tɩ b kʋ vɩɩm-naabã. La Wẽnnaam vʋʋg-b lame tɩ b yi kũum sʋk n vɩ. Tõnd yaa bõn-kãng kaset dãmba.

¹⁶ Yaa ne tẽeb la a Zeezi yʋʋrã n kõ dao‑kãngã yãmb sẽn ne la y miẽ wã pãnga, tõnd sẽn tẽ bãmb yʋʋrã yĩnga. Yaa tẽeb ne a Zeezi n maag rao-kãngã zãng fasɩ yãmb fãa nifẽ.

¹⁷ La moasã, m saam-biisi, mam miime tɩ yaa yãmb ne y nanambsã zɩɩlmã yĩng n kɩt tɩ y maan a Zeezi a woto.

¹⁸ La Wẽnnaam maana a woto n pids bũmb ning b sẽn da pĩnd n togs ne b no-rɛɛsdbã fãa noyã, tɩ bãmb Kirisã na n namsame wã.

¹⁹ Dẽ, tek-y yam n kos sugri tɩ Wẽnnaam tõe n yẽes y yel-wẽnã,

²⁰ woto, Zu-soabã na n kɩtame tɩ yolsg wakat wa. La b na n tʋma a Zeezi, Kirisa bãmb sẽn dag n yãk yãmb yĩngã.

²¹ A Zeezi tog n zĩnda arzãn nanda, hal tɩ Wẽnnaam sẽn da togs bũmb ningã fãa wakat sẽn loogã ne b no-rɛɛs sõamyã noyã manegr wakat ta.

²² A Moyiis rag n yeelame: «Zu-soabã sẽn yaa yãmb Wẽnnaam na n yãka b no-rɛɛs sẽn yaa wa maam yãmb buudã sʋk n kõ-yã. Yãmb na n kelga bũmb nins fãa yẽnda sẽn na n togs yãmbã.

²³ La ned ning sẽn ka kelgd-a Wẽnnaam no-rɛɛs‑kãnga, b na n menes-a-la Wẽnnaam nebã sʋka.»

²⁴ La Wẽnnaam no-rɛɛsdbã fãa sẽn sɩng ne a Sãmwɛll la sẽn pʋgl-b bãmbã me goma ra-kãens yelle.

²⁵ Yãmb yaa Wẽnnaam no-rɛɛsdbã kamba, la kaool ningã Wẽnnaam sẽn maan ne tõnd yaab-rãmbã kamba, Wẽnnaam sẽn yeel a Abrahaam tɩ dũniyã buud fãa na n paama bark bãmb yagensã maasem yĩngã.

²⁶ Yaa yãmb yĩng pipi la Wẽnnaam yãk b tẽn-tʋmd n tʋm-b yãmb nengẽ, tɩ ned kam fãa yãmb sʋkã sã n wẽnemd n bas a yel-wẽnã bɩ b ning-a barka.