Tʋʋma 28 - WẼNNAAM SEBRE 2014

¹ Tõnd sẽn põsã poore, d wʋmame tɩ tẽn-kãng sẽn be koomã sʋkã boondame tɩ Malte.

² Tẽngã neb gesa tõnd yell neer wʋsg ne nimbãan-zoeere. La saagã sẽn da ni tɩ yaa waoodã yĩnga, b widga bugum n deeg tõnd fãa be tɩ d gũbg n woode.

³ A Poll wʋka ra-yãngls n na n ning bugmẽ wã, la bug-waolgã yĩnga, waaf n yi be n gãd a Poll nugã.

⁴ La tẽngã neb sẽn yãnd waafã sẽn luund a Poll nugẽ wã, b goma ne taab n yeele: Hakɩɩka rao-kãngã yaa nin-kʋʋda, bala, baa ne yẽnda sẽn põs ko-kãsengã, wẽnd tɩrlem ka rat n bas-a t'a vɩɩmd ye.

⁵ La a Poll mesga waafã t'a lʋɩ bugmẽ wã la a Poll bũmb ka zab baa bilf ye.

⁶ Nin-kãens ra gũudame n na n yãnd a sẽn mode, wall a Poll sẽn na n lʋɩ n ki zĩig pʋgẽ. La b sẽn gũ n kaoos n mik tɩ bũmb baa fʋɩ ka maan yẽnda wã, b wẽnemdame n yeel t'a Poll yaa wẽnd a yembre.

⁷ Soolem a ye n da pẽ be tɩ yaa tẽn-kãng naabã n so, naabã yʋʋr la a Publyuusi. A reega tõnd ne nonglem n sik a yir rasem a tãabo.

⁸ A Publyuus baaba n da gãe ne yĩn-wɩngre la sãb-noaadga, la a Poll kẽe a nengẽ n tik-a ne a nus n pʋʋs n maag-a.

⁹ Rẽ zugẽ, tẽngã bãad-dãmb a taab me waame, la b fãa paama laafɩ.

¹⁰ B waooga tõnd ne waoog‑kãsenga, la tõnd sẽn wa n na n loogã, b kõo tõnd bũmb nins fãa sẽn tõe n sõng tõnd d so-toakã pʋgẽ.

A Poll taa Rom

¹¹ La kiis a tãab zugẽ, tõnd kẽe Alegsãndiri koom-koglg a yembr yʋʋr sẽn boond tɩ Diyoskuur sẽn dag n zĩnd Malt tẽngã waoodã wẽnde.

¹² Tõnd sẽn ta Sɩrakuus tẽnga d paa be rasem a tãabo.

¹³ La tõnd yii beenẽ n tũ koomã noor n ta Regiyo. La vẽkembeoogo, wĩndga goabg sebgã yikame, la rasem a yiib pʋgẽ, tõnd taa Pʋzolle.

¹⁴ Tõnd yãnda ba-biis tẽn-kãng pʋga, tɩ b kos tõnd tɩ d pa be ne bãmb rasem a yopoe. Yɩɩ woto tɩ tõnd kẽng Rom.

¹⁵ Ba-biisã sẽn be Romma sẽn wʋm tõnd kibare, b waa n sega tõnd hal tẽms sẽn boond tɩ Apiyuus ne Tʋroa-Tavɛrn. A Poll sẽn yãnd-bã, a pʋʋsa Wẽnnaam bark la a keng a pɛlga.

¹⁶ Tõnd sẽn wa n ta Rommã, sodaas koabg naabã rɩka bi-beesã n kɩs sodaasã taoor soaba, la b kõo a Poll lohorem t'a zĩnd toor ne sodaag a yembr sẽn gũud-a.

A Poll moonda koɛɛg Rom

¹⁷ B sẽn ta Rom tɩ rab-tãtẽ, a Poll boola Zʋɩf-rãmbã nin-kãsems tɩ b wa yẽnda nengẽ. La b sẽn tigim taaba, a Poll goma ne bãmb a woto: M saam-biisi, baa ne mam sẽn ka maan bũmb sẽn beegd tõnd buudã, la m ka maan bũmb sẽn kɩɩsd tõnd yaab-rãmbã miningã, b yõka maam Zeruzalɛm n kɩs Rom-dãmbã tɩ b kẽes maam bi-bees roogo.

¹⁸ La Rom-dãmbã sẽn kelg maam, b rag n dat n bas-m lame, bala b ka yã mam sẽn maan bũmb n tog ne kʋʋb ye.

¹⁹ La Zʋɩf-rãmbã zãgsame, dẽ, yɩɩ tɩlɛ ne maam tɩ m kos n na n kẽng rĩm a Sezaar nengẽ. La yaool n ka bũmb la m tar n dat n dõd m buudã ye.

²⁰ Yaa woto yĩng n kɩt tɩ m dat n yãnd-yã n gom ne-yã, bala, yaa Israyɛll nebã tẽeb pidsg gũudum poorẽ la b balg maam ne bãn-kãensã.

²¹ Zʋɩf-rãmbã nin-kãsems yeela a Poll yaa: Tõnd ka reeg sebr baa a yembr sẽn yi Zʋʋde soolem n gomd ne tõnd yãmb yell ye, la ba-biig baa a yembr ka yi be n wa togs tõndo, wall a gom yãmb sẽn maan tɩ ka zems ye.

²² La tõnd datẽ lame n kelg yãmb sẽn na n yeel tɩ bũmb ninga, bala tõnd miime tɩ zĩiga fãa, nebã kɩɩsda kaoreng ning yãmb sẽn tũudã.

²³ Bãmb yãka daar n kõ a Polle, la badaare bãmb wʋsg waa n yãnda a Poll a gãagã zĩigẽ, la yẽnda goma ne bãmb yibeoog hal tɩ ta zaabre, yẽnda rɩka a Moyiis tõogã ne Wẽnnaam no-rɛɛsdba sɛb n moon bãmb Wẽnnaam soolmã koɛɛg n na n wilg-b t'a Zeezi koɛɛgã yaa sɩda.

²⁴ Neb kẽer tẽe bũmb ning yẽnda sẽn da yetã la neb kẽer kɩɩsame n ka tẽ ye.

²⁵ La bãmb sẽn ka zems taab n yik n na n loogã, a Poll yeel-b-la gom‑kãensã bal n paase: Sɩɩg-sõng sɩd tara bʋʋm la a sẽn da gom ne y yaab-rãmbã n yeel

²⁶ Wẽnnaam no-rɛɛs a Ezayi tɩ: «Kẽng nin-bãmbã nengẽ n tɩ yeel-b yaa: ‹Yãmb nong bɩ kelg sõama, y kõn tol n wʋm a võor ye. Yãmb nong bɩ y ges sõama, y kõn tol n yãnd ye.

²⁷ Bala, nin-kãensã sũyã riglmame, b yẽda b tʋba, la b mum b nini, sẽn na n yɩlẽ tɩ b nin da yã ye, tɩ b tʋb ra wʋm ye, tɩ b ra tags n wʋm a võor ye. La b ra tek yam n kos sugri, sẽn na yɩl tɩ mam maag-b ye.› »

²⁸ A Poll leb n yeelame yaa: «Dẽ wã yĩnga, bãng-y tɩ b tʋma Wẽnnaam fãagr koɛɛgã bu-zẽmsã tẽngẽ, la b na n kelg-a lame.»

²⁹ [A Poll sẽn yeel a woto n sɛ, Zʋɩf-rãmbã loogdame la b wẽed nokoeemd wʋsg ne taaba.]

³⁰ A Poll zĩnda be yʋʋm a yiib tõre, la a yaood roogã ligdi. La yẽnda ra reegda neb nins fãa sẽn da wat yẽ nengẽ wã ro-kãng pʋga.

³¹ Yẽnda ra moonda Wẽnnaam soolem koɛɛgã, la a zãmsd nebã a Zeezi Kiris koɛɛgã ne pɛl-kɛgenga, tɩ gɩdgr kaẽ ye.