Tʋʋma 27 - WẼNNAAM SEBRE 2014

A Poll kẽe koom-koglg n na n kẽng Rom

¹ La b sẽn yãk yam tɩ tõnd na n kẽ koom-koglg n kẽng Itali, b rɩka a Poll ne bi-bees a taaba, n kɩs soda-sull ning b sẽn boond tɩ rĩmã sodaasã, sodaas koabg naab a yembr yʋʋr sẽn boond t'a Zulyuusi.

² Tõnd kẽe koom-koglg sẽn yi Adarmit n dabd Aazi soolem tẽmsã sẽn be koomã noor sẽnẽ n looge. La Masedoan dao a ye sẽn yi Tesalonik t'a yʋʋr boond t'a Aristark n da be ne tõndo.

³ La vẽkembeoogo, tõnd taa Sɩdõ. La a Zulyuus maana a Poll neer n kõ-a lohorem t'a kẽng n tɩ ges a Zo-rãmb n paam tɩ b sõng-a.

⁴ Tõnd sẽn yi be, d basa Sɩpr goabga, sebgã sẽn da segd tõndã yĩnga.

⁵ Tõnd sẽn pɩʋʋg ko-kãsengã sẽn pẽ Siliisi ne Paamfili wã, tõnd taa Miira sẽn be Liisi soolmẽ wã.

⁶ La beenẽ, sodaas koabg naabã yãnda koom-koglg sẽn yi Alegsãndri n dabd Itali, la yẽnda kɩtame tɩ tõnd kẽ koom-kogl-kãngã.

⁷ Tõnd kẽna bãanem-bãanem n kaoos rasem wʋsgo, la d namsa wʋsg n kolg Niid tẽnga noore. La sebgã sẽn ka sak tɩ tõnd ta be wã, tõnd yega Kɛrɛt tẽngã n kẽng Salmone sẽnẽ.

⁸ Tõnd namsa wʋsg ne koom-koglgã n yeg Kɛrɛt kɩrenga, n ta zĩig a yembr sẽn boond tɩ Koom-koglg yalsg zĩ-neerã sẽn pẽ Laaze tẽnga.

⁹ Wakat wʋsg loogame la koom-koglgã kẽnd wa n lebga yel-pakre. Bala, no-loeerã wakat zoe n loogame.

¹⁰ Yaa woto yĩng n kɩt t'a Poll keoog-b n yeel yaa: Raopa, mam neeme tɩ so-toak-kãngã na n yɩɩ wẽnga, koom-koglgã ne a zɩɩbã na n yɩɩ bõne, la sẽn yɩɩda, sã n ka gũusi tõnd mensã na n kii a pʋgẽ.

¹¹ La sodaas koabg naabã ra kɩsa sɩd ne ned ning sẽn get koom-koglgã kẽnd yellã ne koom-koglgã taoor soab n yɩɩd a Poll goamã.

¹² La koom-koglgã yalsg zĩig ra ka sõama tɩ pa be waood wẽnd ye, yaa woto yĩng tɩ neb wʋsg yãk yam n yeel tɩ b yi be n mao tɩ sã n tõe bɩ b ta Fenigs sẽn yaa koom-koglg yalsg zĩig sẽn be Kɛrɛt n pakd n teesd wĩndgã goabg la a rɩtgã, n zĩnd be waoodã wẽnde.

Sebg yika ko-kãsengã zugu

¹³ Sob-fʋl-fʋl yii wĩndgã goabg n sɩng n fʋʋsdẽ, la bãmb tagsame tɩ b ra tõe n maana b sẽn dat n maan bũmb ningã. B yika ne koom-koglgã n kẽng n yeg Kɛrɛt n tũ a kɩrengã.

¹⁴ La sẽn yɩ bilfu, sob-kãseng b sẽn boond tɩ Erakilõ yika koomã sẽn gũbg tẽng ninga wã tãmsã sẽnẽ.

¹⁵ La a sẽn wẽ koglgã t'a ka tõe n kẽng taoorã, tõnd basame tɩ sebgã peeg koglgã.

¹⁶ Tõnd kolga tẽn-bil a yembr sẽn be koomã sʋk tɩ b boond tɩ Kooda. Dẽ, tõnd namsa wʋsg n tõog n yalsg koom-kogl-bilã.

¹⁷ La b sẽn zẽk kogl-bilã n kẽes koom-koglgã pʋg n sɛ, b yaool n sẽba koom-koglgã ne wĩyã. La b sẽn zoet tɩ koom-koglgã na n wa tɩ sud bĩisrã sẽn be Libi yegendã, b sika koom-koglgã pɛɛla n bas tɩ sebgã peeg koglgã.

¹⁸ La sebgã namsa tõnd wʋsgo, dẽ vẽkembeoogo, b loba koglgã zɩɩb koomã pʋgẽ.

¹⁹ La rasem a tãabẽ daarã, bãmb mens sɩngame n wʋk koglgã teed kẽer n lob koomẽ wã.

²⁰ La kaoosa rasem wʋsg tɩ wĩndgã, wala ãdsã ka puk ye, la sebgã ra ketẽ n tara pãnga hal tɩ tõnd wa n ka leb n tẽed tɩ d na n põsame ye.

²¹ Neb nins sẽn da be koom-koglgã pʋgã maana rasem wʋsg n ka rɩ bũmb ye. Dẽ, a Poll yikame n yals b sʋk n yeel yaa: M saam-biisi, yãmb sã n dag n sakẽ mam goamã n ka yi n bas Kɛrɛt tẽngã, tõnd da ka na n paam bõn a woto la to-kãngã ye.

²² La moasã, mam sagenda yãmb tɩ y keng y sũyã tɩ bala, tõnd ned ba a yembr ka na n ki ye, sã n ka koom-koglgã bal n na n sãame.

²³ Bala, Wẽnnaam ning sẽn so maam tɩ mam sakd-a wã malɛɛk waa mam nengẽ yʋngẽ,

²⁴ la a yeela maam yaa: «Polle, ra zoe rabeem ye, yaa tɩlɛ tɩ fo ta rĩm a Sezaar taoore. La gese, Wẽnnaam sẽn yaa sõmblem soab la b maand nimbãan-zoeer ne foomã rɩka neb nins sẽn be koom-koglgã pʋg ne foomã vɩɩm n ning fo nugẽ.»

²⁵ Woto yĩnga, m saam-biisi, keng-y y sũyã, bala, mam tara tẽeb‑kãnga ne Wẽnnaam, tɩ na n yɩɩ wala b sẽn togs maama bala,

²⁶ la tõnd na n tɩ teega tẽng a yembr koom sẽn gũbgi.

²⁷ Dag n yaa yʋnd piig la a naasẽ soab la sobgã ra lengd tõnd ko-kãsengã sẽn boond tɩ Adiryatikã zugu. La sẽn kolg yʋn-sʋka, koom-koglgã pʋgẽ tʋmtʋmdbã tẽeme tɩ b pẽnega tẽnga.

²⁸ Bãmb loee koom zulum bõn-makdgã ne wĩir n los koomẽ wã n mak a zulmã n mik tɩ yaa metr pis-tã la a yopoe. La b sẽn leb n zãag bilfu, b losame yɛsa n mik tɩ zulmã zemsa metr pisi la a nii.

²⁹ Bãmb sẽn yɛɛsd tɩ tõnd koom-koglgã na n wa tɩ wẽ kug yĩnga, b losa kug bɛd a naas sẽn da tar n yalsd koom-koglgã koomã pʋgẽ, tɩ b gãd koglgã. La b ra yãgdame n dat tɩ beoogã vẽeg tao-tao.

³⁰ Koom-koglgã tʋmtʋmdb maana wala b rat n losa kug a taab sẽn yalsd koom-koglgã koomã pʋgẽ, tɩ b gãd koglgã, mik b ra soosdame n dat n sik koom-kogl‑bilã koomẽ wã n zoe.

³¹ A Poll yeela sodaas koabg naabã ne sodaasã yaa: Nin-bãmbã sã n ka pa koom-koglgã pʋga, yãmb kõn tõog n põs ye.

³² Dẽ, sodaasã wãa wĩ nins sẽn da loe kogl-bilã n pase, n bas-a t'a lʋɩ koomẽ wã.

³³ Sẽn deng beoogã vẽegre, a Poll sagla nebã fãa n yeel-b tɩ b rɩ. Yẽnda yeel-b lame yaa: Ade, yaa rasem piig la a naas rũndã la yãmb sẽn gũud sobgã yõkre, n ka sakd n dɩ rɩɩb ye.

³⁴ Rẽ wã, mam kota yãmb tɩ y rɩ, bala, yaa sẽn na n fãag yãmba, la yãmb ned ba a yembr zoobg ka na n menem ye.

³⁵ A Poll sẽn gom a woto n sa, a rɩka bur n yals nebã fãa taoor n pʋʋs Wẽnnaam barka. A sẽn pʋʋs n sa, a kaoo burã n sɩng wãbre.

³⁶ Dẽ, nebã fãa me kenga b pels n dɩ.

³⁷ Tõnd fãa sẽn dag n be koom-koglgã pʋgẽ wã yaa neb kobsi la pis-yopoe la a yoobe.

³⁸ La b sẽn dɩ n tɩge, b loba koodã koomã pʋgẽ n na n boog koom-koglgã zɩɩbo.

Koom-koglg sãoongo

³⁹ La beoogã sẽn vẽege, koom-koglgã tʋmtʋmdbã ka bãng sẽn yaa tẽng ning ye. La b yãnda zĩiga, kʋɩl-koakã sẽn gonge, zĩ-bĩisri, la bãmb yãka yam n dat tɩ sã n tõe, bɩ b tall koom-koglgã n ta beenẽ.

⁴⁰ Bãmb logsa bãens nins sẽn yalsd koglgã n bas tɩ b lʋɩ koomẽ wã, la b kell n logs koglgã wẽnemdedgã wĩ, n yaool n zẽk koglgã taoor peendã, sẽn na yɩl tɩ sebgã tus-ba, la b tees kʋɩl-koakã.

⁴¹ La bãmb tɩ kẽe bĩisr pʋgẽ, ko-wĩis a yiib sʋka, la b basa koglgã t'a pa be. Koglgã taoor kẽe bĩisrẽ wã sõama n ka leb n tõe n serg ye. La ko-pɛmã wẽe koglgã poor ne pãng n wesge.

⁴² La sodaasã da rat n kʋʋ bi-beesã tɩ b ned ba a yembr da wa rug koomã n zoe n põs ye.

⁴³ La sodaas koabg naabã sẽn dat n fãag a Pollã, a ka sak tɩ b maan a woto ye. Yẽnda yeela neb nins sẽn mi rugbã tɩ b reng n lʋɩ koomẽ wã n dug n yi yɩnga,

⁴⁴ la a yeel neb a taabã tɩ b sog ra-pegdã, wall koom-koglgã raado, n dug n yi. La woto, nebã tõog n taa yɩng ne yõore la laafɩ.