Tʋʋma 26 - WẼNNAAM SEBRE 2014

¹ A Agirpa yeela a Poll tɩ b kõt-a-la noor t'a gom n yiis a meng yellẽ wã. Dẽ, a Poll tẽega a nug n yeel yaa:

² Rĩm a Agirpa, mam sũur yaa noogo, m sẽn paam dũndã n na n gom yãmb taoor n togs bũmb nins fãa Zʋɩf-rãmbã sẽn dõt maamã wɛɛngẽ.

³ Bala, yãmb mii Zʋɩf-rãmbã minindã ne b nokoɛɛmã zãnga. Rẽ wã, mam kot-y lame tɩ y kelg maam ne sũ-mare.

A Poll wilgda a yel-manesem a sẽn yaa Fariizẽ

⁴ Zʋɩf-rãmbã fãa mii mam vɩɩmã sẽn yɩ bũmb ninga, hal mam sẽn yaa bi-bilf wakate, b mii mam sẽn zĩnd m nebã sʋka, la Zeruzalɛm hal sɩngrẽ wã sẽn yɩ to-to.

⁵ Bãmb mii maam hal daar zãra, b sã n dat n togs sɩda. Mam yaa Fariizẽ neb nins sẽn sakd tõnd wẽn-tũudmã n yɩɩd neb a taabã ned a yembre.

⁶ La moasã, b bʋʋda ne maam, mam sẽn tẽed kãabg ning Wẽnnaam sẽn dag n kãab tõnd yaab-rãmbã yĩnga.

⁷ La tõnd buud piig la a yiibã me pʋʋsda Wẽnnaam wĩntoog la yʋng n ka basdẽ, n gũud kãab-kãng pidsgu. Rĩm a Agirpa, yaa tẽeb pidsg gũudum‑kãng yĩng n kɩt tɩ Zʋɩf-rãmbã rõd maam.

⁸ Bõe yĩng tɩ yãmb Zʋɩf-rãmbã tagsdẽ tɩ yaa toog ne Wẽnnaam tɩ b vʋʋg kũum?

A Poll togsdame tɩ yẽnda ra namsda Kiris tẽedbã

⁹ Mam meng da tagsame tɩ m tog n zaba ne m pãng tɛka n kɩɩs Nazarɛt dao a Zeezi yʋʋrã.

¹⁰ La mam maana bõn-kãng Zeruzalɛm. La mam sẽn paam noor maan-kʋʋdbã kãsem-dãmb nengẽ, mam menga kẽesa Wẽnnaam nin-tũusds wʋsg bi-bees roogo. La b sã n da rat n kʋ-ba, mam ningda m nugu.

¹¹ Wakat kẽere, mam kɩtdame tɩ b sɩbg-b karen-dot pʋse, n da rat n modg-b tɩ b kɩɩs b tẽebã. Mam sũurã puuga wʋsg ne bãmb hal tɩ m kẽng tẽn-zẽms pʋs n tɩ nams-ba.

A Poll goma yẽnda sẽn tek yam n kos sugrã yelle

¹² Yaa woto yĩnga, tɩ maan-kʋʋdbã kãsem-dãmb kõ maam noor n tʋm maam tɩ m kẽng Damaase.

¹³ Rĩm a Agirpa, mam sẽn be sorẽ, wĩnto-sʋk sasa, mam yãnda vẽenem sẽn yi arzãn n yãgd n yɩɩd wĩntoog vẽenem, n wa n bui maam ne m tũud-n-taasã.

¹⁴ Tõnd fãa lʋɩɩ tẽnga, la mam wʋma koɛɛg sẽn da yet maam ne Ebre-rãmbã goam yaa: «Solle, Solle, yaa bõe tɩ fo namsd maam? Yaa toog ne foom, fo sẽn zãgsda yĩnga.»

¹⁵ Mam sokame tɩ Zu-soabã yãmb yaa ãnda? La Zu-soabã leokame yaa: «Mam yaa a Zeezi, fo sẽn namsd a soabã.

¹⁶ Yik n yals yĩngri. Mam vẽnega m meng ne foom n na n kɩt tɩ f yɩ mam tʋmtʋmda, la m kaset soab n togs neb a taabã bũmb nins fo sẽn yã rũndã wã, la bũmb nins mam sẽn na n wilg foomã.

¹⁷ Mam yãka foom Zʋɩf-rãmbã ne bu-zẽmsã sʋka, la m tʋmda foom b nengẽ,

¹⁸ tɩ f puk b nina tɩ b wẽnemd n bas likã n wa vẽenemẽ wã la b bas Sʋtãanã n sak Wẽnnaam n paam b yel-wẽnã sugri, la pʋɩɩr ne neb nins sẽn tẽ maam n lebg Wẽnnaam nebã.»

A Poll gomda a tʋʋmdã yelle

¹⁹ Woto wã yĩnga, Rĩm a Agirpa, mam ka kɩɩs vẽnegr ning sẽn yi arzãna ye.

²⁰ La m deng n moona koɛɛgã Damaas nebã nanda, la m yaool n moon-a Zeruzalɛm ne Zʋʋde soolmã fãa pʋga, la bu-zẽmsã n yeel-b tɩ b tek yam n kos sugr n sak Wẽnnaam n maan tʋʋm sẽn wilgd tɩ b sɩd teka yam.

²¹ Yaa bõn-kãng yĩng la Zʋɩf-rãmbã sẽn yõk maam wẽnd doogã pʋg n na n kɩt tɩ b kʋ wã.

²² La Wẽnnaam gũudmã yĩnga, mam ket n vɩɩme hal tɩ ta rũndã, n kɩt kaset nin-talse la nanambs taoore. La mam ka togsd bũmb a to tɩ sã n ka Wẽnnaam no-rɛɛsdbã ne a Moyiis sẽn dag n togsã ye.

²³ B ra togsame tɩ Kiris na n namsame la b na n yɩɩ pipi soab sẽn vʋʋg n bas kũum, la b na n waa ne fãagr vẽenem tõnd buudã ne bu-zẽmsã yĩnga.

A Poll datame t'a Agirpa tẽ

²⁴ La a Poll sẽn gom a woto n na n fãag a mengã, a Festuus zẽka a koɛɛg n yeel-a yaa: Polle! Fo yaa gãeenga. Fo bãngrã sẽn yaa wʋsgã kɩtame tɩ f lebg gãeenga.

²⁵ A Poll yeelame: Festuus sõngo, mam ka gãeeng ye. Mam sẽn gomdã yaa sɩda la mi-m-neng goamã.

²⁶ Rĩm a Agirpa mii bõn-kãense, dẽ mam tõe n goma ne pɛl-kɛgeng bãmb taoore, bala mam mii vẽeneg tɩ bãmb mii b fãa, tɩ bõe bõn-kãens ka solg n maan ye.

²⁷ Rĩm a Agirpa, yãmb tẽeda Wẽnnaam no-rɛɛsdbã sẽn yeel bũmb ninsã? Mam miime tɩ yãmb tẽeda bõn-kãense.

²⁸ A Agirpa yeela a Poll yaa: Fo tagsdame tɩ wakat bilf pʋgẽ, f tõe n kɩtame tɩ mam yɩɩ a Zeezi neda?

²⁹ A Poll leokame yaa: Yaa wakat bilf pʋgẽ woo, wall yaa wakat wʋsg pʋgẽ me, mam pʋʋsda Wẽnnaam tɩ kõn yɩ yãmb y yembr bal ye. La yaa tɩ neb nins fãa sẽn kelgd mam koɛɛgã dũndã wã me, yãmb na lebg wa maam, bãn-kãensã sẽn yãk b toogo.

³⁰ Dẽ, rĩmã ne Gʋvɛrneerã, la a Bereniis ne neb nins sẽn dag n zĩ ne bãmbã yikame.

³¹ B sergame n yẽs ne taab n yeel tɩ rao-kãngã ka maan bũmb sẽn zems ne kũum, wall bi-bees roog kõom ye.

³² La a Agirpa yeela a Festuus tɩ sã n ka a Poll sẽn yeel t'a rata rĩm a Sezaar nengẽ wã, a rag n tõe n paamẽ‑la lohorem.