Tʋʋma 23 - WẼNNAAM SEBRE 2014

¹ A Poll gesa kaoreng yɛl-bʋ-bʋʋdbã n yeel yaa: M saam-biisi, mam kẽna Wẽnnaam taoor ne sũur kaset sẽn yaa sõama hal tɩ ta rũndã.

² La maan-kʋʋd kãsem a Hananiyaas yeelame tɩ neb nins sẽn pẽ a Pollã wẽ a noorã.

³ Dẽ, a Poll yeela yẽnda yaa: Pʋ-libsim soaba, Wẽnnaam na n wẽe yãmba. Yãmb zĩndame n na n kao mam bʋʋd wa sẽn zems ne tõogo, la y kɩɩs tõogã n yet tɩ b wẽ maam.

⁴ Neb nins sẽn da be be wã yeela a Poll tɩ Wẽnnaam maan-kʋʋd kãsem la yẽnda tʋʋsda.

⁵ La a Poll yeelame yaa: M saam-biisi, mam da ka mi tɩ yaa maan-kʋʋd kãsem ye. Bala, Wẽnnaam gʋls-sõamyã yeelame tɩ: «Ra gom f tẽngã neb naab wẽng ye.»

⁶ La a Poll sẽn mi tɩ nebã sẽn tigmã kẽer yaa Saduusẽ-dãmba, tɩ kẽer yaa Fariizẽ-dãmbã, a zẽka a koɛɛg kaoreng yɛl-bʋ-bʋʋdbã sʋk n yeele: «M saam-biisi, mam yaa Fariizẽ, la m yaa Fariizẽ biiga. Yaa mam sẽn tẽed tɩ kũum vʋʋgr beemẽ wã yĩng n kɩt tɩ b bʋʋd mam bʋʋdo.

⁷ La a Poll sẽn yeel gom-kãnga, Fariizẽ-dãmbã ne Saduusẽ-dãmbã sɩngame n wẽed nokoɛɛm ne taaba, la nebã welga taaba.

⁸ Sɩd me, Saduusẽ-dãmbã yetame tɩ kũum vʋʋgre, wall malɛɛka, wall Sɩɩg ka be ye. Tɩ Fariizẽ-dãmbã yaool n yetẽ tɩ bõn-kãens fãa beeme.

⁹ La bʋr-kãseng yikame, la tõog karen-saam-dãmb kẽer sẽn be Fariizẽ-dãmbã sullẽ wã yikame n kɩɩs ne pãng n yeel tɩ bãmb ka yã bõn-wẽng ne rao-kãngã ye, la tɩ tõeeme tɩ yaa sɩɩg wall malɛɛk n gom ne-a.

¹⁰ La nokoeemdã sẽn lebgd wʋsgã, tɩ sodaas tusr naabã zoet rabeem tɩ nebã na n wa tɛ a Poll n tõsã, a yeela sodaasã tɩ b sig nebã sʋk n tall a Poll n wa gãosgã pʋga.

¹¹ La yʋng ning sẽn pʋgdã, Zu-soabã vẽnega b meng ne a Poll n yeel-a yaa: ‹keng f pɛlga, bala, yaa tɩlɛ tɩ f kɩs mam kaset Rom tẽng me wala fo sẽn kɩs mam kaset Zeruzalɛmã.› »

B baooda weer n dat n kʋ a Poll

¹² La beoogã sẽn vẽege, Zʋɩf-rãmbã yẽsa ne taab n yãk yam n wẽen tɩ b ka na n dɩ wall b yũ, sã n ka tɩ b kʋ a Polle.

¹³ Neb nins sẽn yẽs ne taab n wẽena sõor yɩɩda pis-naase.

¹⁴ Bãmb kẽng n tɩ yãnda maan-kʋʋdbã kãsem-dãmb ne kãsem-dãmbã n yeel-b yaa: Tõnd wẽename tɩ d ka na n lemb dɩɩbo, sã n ka tɩ d paam n kʋʋ a Polle.

¹⁵ Dẽ yĩngã, bɩ yãmb ne kaoreng yɛl-bʋ-bʋʋdbã fãa kos sodaas tusr naabã tɩ b wa ne a Poll y nengẽ, wa y rat n baoo n bãnga yẽnda yellã n paase. La rẽ tɩ tõnd mensã seglame n na n kʋ-a t'a nan ka ta ka ye.

¹⁶ La a Poll tão biig wʋmame tɩ b set n dat n kʋʋ a Polle, la a kẽnga gãosgẽ wã n tɩ kẽ be n togs a Polle.

¹⁷ Dẽ, a Poll boola sodaas koabg naab a yembr n yeel-a t'a tall bi-bɩ-kãng n kẽng sodaas tusr naabã nengẽ, tɩ bala, a tara koɛɛg n dat n togs-a.

¹⁸ Sodaas koabg naabã peega biigã n kẽng sodaas tusr naabã nengẽ n yeel yaa: Bi-bɛɛg a Poll boola maam n kos-m tɩ m tall bi-bɩ-kãngã n wa y nengẽ t'a tara koɛɛg n dat n togs-yã.

¹⁹ La sodaas tusr naabã gãda bi-bɩ-kãng nug n yi kɛɛng n sok-a tɩ yaa bõe la a tar n dat n togs yẽnda.

²⁰ Bi-bɩɩgã leokame yaa: Zʋɩf-rãmbã lagma taab n dat n kos yãmb tɩ y tall a Poll n wa kaoreng yɛl-bʋ-bʋʋdbã taoor wala b rat n leb n sok n bãnga yẽnda yellã n paase.

²¹ Ra kelg-y-b ye. Bala, bãmb sʋka neb sẽn yɩɩd pis-naas n segend bẽdg a Poll yĩnga, la b yãka yam n wẽen tɩ b ka na n dɩ wala b yũ sã n ka tɩ b kʋ a Polle. Bãmb seglame n sɛ moasã n gũud yãmb sẽn na n yet tɩ bũmb ninga.

²² Sodaas tusr naabã keooga bi-bɩɩgã n yeel-a: Ra togs ned bũmb ning fo sẽn togs maamã ye.

B tʋma a Poll Gʋvɛrneer a Feligs nengẽ

²³ Dẽ poore, sodaas tusr naabã boola sodaas kobs nanambs a yiib n yeel yaa: Segl-y sodaas kobs-yi la wed-rʋʋdb pis-yopoe, ne kãn-tãoodb kobs-yi tɩ yʋngã wakat a wɛ sasa, y na n kẽnga hal Sezaare.

²⁴ La y segl wiid me sẽn na n zombg a Poll n tall-a n kẽng Gʋvɛrneer a Feligs nengẽ tɩ bũmb ra maan-a ye.

²⁵ La yẽnda gʋlsa sebr n yeel a woto:

²⁶ Maam a Kolood Liziyaas n pʋʋsd Gʋvɛrneer sõng a Feligsi.

²⁷ Zʋɩf-rãmbã ra yõka rao-kãngã n da na n kʋ-a, la mam sẽn wʋm tɩ yẽnda yaa Rom nedã, mam waa ne sodaas n fãag-a.

²⁸ La mam sẽn dat n bãng sẽn yaa bũmb ninga yĩng la Zʋɩf-rãmbã rõt yẽnda wã, m tall-a lame n kẽng b kaoreng yɛl-bʋ-bʋʋdbã taoore.

²⁹ La mam mikame tɩ b sẽn dõt yẽnda wã yaa nokoɛɛm sẽn kẽed ne bãmb mens tõoga yell wɛɛngẽ, la rao-kãngã ka maan bũmb sẽn zems tɩ b kʋ-a wall b kẽes-a bi-bees roog ye.

³⁰ Dẽ, mam sẽn wʋm tɩ Zʋɩf-rãmbã setame n dat n kʋ-a wã, mam tʋm-a-la yãmb nengẽ tao-tao la m yeela a rõatbã tɩ b wa yãmb taoor n togs b koɛɛgã. Wẽnd na sõnge.

³¹ La sodaasã peega a Poll ne yʋngã n tall-a hal n ta Ãntipatiris wa b sẽn da yeel bãmbã.

³² La vẽkembeoogo, sodaas nins sẽn kẽn ne naoã lebg n leba gãosgẽ wã n bas wed-rʋʋdbã tɩ b tall a Poll n looge.

³³ Bãmb sẽn ta Sezaare, b kɩsa Gʋvɛrneerã sebrã la b ning a Poll yẽnda nugẽ.

³⁴ Gʋvɛrneerã sẽn karem sebrã n sɛ, a soka a Poll a sẽn yit soolem ninga. La yẽnda sẽn wʋm t'a Poll yita Silisi soolem,

³⁵ A yeelame t'a rõatbã sã n wa n wa, a na kelg-a. La a yeelame tɩ b kẽes a Poll rĩm a Erood na-zakẽ wã n gũ-a.