Tʋʋma 22 - WẼNNAAM SEBRE 2014

¹ A Poll yeela nebã yaa: M ba-biisi la m ba-rãmba, kelg-y bũmb ning mam sẽn tar moasã n na n togs yãmb n yiis m meng yellẽ wã.

² Bãmb sẽn wʋm t'a Poll gomd ne bãmb ne Ebre-rãmbã goamã, b yalsa sɩddd... n yɩɩd pĩnda. Dẽ, a Poll yeel-b lame:

³ Mam yaa Zʋɩf sẽn dog Tars sẽn be Silisi soolem. La b wuba maam Zeruzalɛm ka la mam zĩnda a Gamalyɛll taoor tɩ b zãms maam tɩ m bãng tõnd yaab-rãmbã tõod neere. Mam me rag n wɩngda ne Wẽnnaam tʋʋmdã wala yãmb fãa sẽn yaa to-to rũndã wã.

⁴ Mam dag n namsa neb nins sẽn dag n tũud so-kãnga wã n kʋ-ba, la m yõg raop la pagb n sẽb n kẽes-b bi-bees roogo.

⁵ Maan-kʋʋdbã kãsem ne kãsem-dãmbã fãa sullã yaa mam kaset dãmba. Mam tol n deega sɛb bãmb nengẽ, ba-biis nins sẽn be Damaasã yĩnga, la m kẽnga be n na n tɩ sẽb tẽedbã sẽn be beenẽ wã n tall-b n wa Zeruzalɛm n kɩt tɩ b sɩbg-ba.

A Poll goma yẽnda sẽn tek yam n kos sugrã yelle

⁶ La mam sẽn waa n be sorẽ n kolgd Damaase, sẽn zems wĩnto-sʋk sasa, tao-tao bala, vẽenem kãseng n yi arzãn n yãg n gũbg maam.

⁷ Mam lʋɩɩ tẽnga, la m wʋma koɛɛg sẽn dag n yet maam yaa: «Solle! Solle! Yaa bõe tɩ fo namsd maam?»

⁸ Mam sokame tɩ Zu-soaba, yãmb yaa ãnda soab tɩ mam namsd-yã? La koɛɛgã yeela maam yaa: «Mam yaa a Zeezi sẽn yit Nazarɛte, soab ning fo sẽn namsdã.»

⁹ Neb nins sẽn dag n be ne maamã yãnda vẽenemã, la b ka wʋm ned ning sẽn dag n gomd-a ne maamã koɛɛgã ye.

¹⁰ Dẽ, mam sokame yaa: «Zu-soaba, bõe la mam tog n maane?» La Zu-soabã yeela maam yaa: «Yik n kẽng Damaas la beenẽ, b na n togsa foom bũmb nins fãa Wẽnnaam sẽn yet foom tɩ f maanã.»

¹¹ La vẽenemã sẽn yãg tɩ mam lebg zoangã yĩnga, mam tũud-n-taasã gãda mam nug n tɛ maam n ta Damaase.

¹² Mik tɩ rao a yembr n dag n be beenẽ t'a yʋʋr boondẽ t'a Hananiyaas n sakd tõodã, la Zʋɩf-rãmbã fãa sẽn da be be wã ra kõta yẽnda kaset sõngo.

¹³ Yẽnda waa mam nengẽ n yeel maam yaa: «M ba-biig a Solle, paam-y nin yɛsa.» La wakat-kãng bala, mam leb n paama m nini, la m yãnd-a lame.

¹⁴ A Hananiyaas yeelame yaa: «Tõnd yaab-rãmbã Wẽnnaam pĩnd n yãka yãmb tɩ y bãng b tʋlsem, tɩ y yã tɩrlem soabã la y wʋm bãmb noor goamã.

¹⁵ Bala, yãmb na n yɩɩ bãmb kaset soaba n togs bũmb nins yãmb sẽn yã la y wʋmã, nebã fãa taoore.

¹⁶ La moasã, yaa bõe tɩ y kaoosdẽ? Yik-y n pʋʋs-y ne Zu-soabã yʋʋre, n deeg koom lisgu, n paam y yel-wẽnã pekre.»

B boola a Poll bu-zẽmsã sʋka

¹⁷ La mam lebg n waa Zeruzalɛm, la mam sẽn be wẽnd doogã pʋg n pʋʋsdẽ, mam paama vẽnegre.

¹⁸ La m yãnda Zu-soabã, la b yeela maam tɩ m nang pãng n yi Zeruzalɛm tao-tao, tɩ bala, tẽngã nebã ka na n deeg mam sẽn na n kɩs Zu-soabã kasetã ye.

¹⁹ La mam yeelame: «Zu-soaba, bãmb mens miime tɩ mam da kẽnda karen-dot pʋsẽ, n kɩtdẽ tɩ b kẽesd neb nins sẽn tẽed yãmbã bi-bees roogo, la m kɩtdẽ tɩ b pãbd-ba.

²⁰ La b sẽn na n daag y kaset kɩt a Etɛn zɩɩmã wakate, mam meng ra bee be, mam da yetame tɩ b sẽn maandã yaa sõama, maam n dag n gũud neb nins sẽn kʋʋd a Etɛnnã futu.»

²¹ Dẽ, Zu-soabã yeela maam yaa: «Kẽnge, bala, m na n tʋma foom zĩ-zãrgẽ, bu-zẽmsã nengẽ.»

A Poll bee sodaas tusr naaba taoore

²² Nebã kelga a Poll hal tɩ ta wakat ning yẽnda sẽn gom gom-kãngã wã, la wakat-kãnga, b sɩngame n zẽk b koees n yetẽ: Menes-y nin-kãngã dũniyã zugu! Kʋ-y-yã-a, yẽnda ka tog n vɩɩmd ye.

²³ Bãmb dag n kelemdame, n lobd b fut la b lobd tom yĩngri.

²⁴ Sodaas tusr naabã yeelame tɩ b kẽes a Poll gãosgẽ wã n pãb-a ne kalwaas n sok-a n bãng sẽn yaa bũmb ninga yĩng n kɩt tɩ Zʋɩf-rãmbã kelemd a woto n dõt yẽnda wã.

²⁵ La b sẽn sẽb a Poll ne wĩy n na n pãbe, yẽnda soka sodaas koabg naab ning sẽn da be be wã tɩ rẽ yĩnga, tõogã kõta bãmb noor tɩ b pãb Rom ned ne kalwaas t'a bʋʋd meng nan ka kao?

²⁶ Gom-kãensã yĩnga, sodaas koabg naaba kẽng n tɩ togsa sodaas tusr naabã bõn-kãng n yeel yaa: Yãmb na n maana a wãna? Rao-kãngã, yaa Rom neda.

²⁷ Dẽ, sodaas tusr naabã wa n soka a Poll yaa: Togs maam, fo yaa Rom neda? T'a leok tɩ n-yẽe.

²⁸ Dẽ, sodaas tusr naabã leb n yeelame yaa: Ad mam yaoo ligd wʋsgo, n paam n lebg Rom neda. La a Poll yeelame yaa: La mam yẽ roga ne-a.

²⁹ Tao-tao bala, neb nins sẽn dag n tog n pãb a Poll la b sok-a wã loogame n bas-a. La sodaas tusr naabã sẽn bãng t'a Poll yaa Rom nedã, la yẽnda sẽn da kɩt tɩ b sẽb-a wã yĩnga, rabeem yõk-a lame.

A Poll bee kaoreng yɛl-bʋ-bʋʋdbã taoore

³⁰ La vẽkembeoogo, sodaas tusr naabã sẽn dat n bãng bũmb ninga Zʋɩf-rãmbã sẽn dõt a Pollã tiki-takɩ, yẽnda kɩtame tɩ b lodg a Poll sẽbrã n bas-a. La a yeel maan-kʋʋdbã kãsem-dãmb ne kaoreng yɛl-bʋ-bʋʋdbã fãa tɩ b tigim taaba. Dẽ, a kɩtame tɩ b talla a Poll n wa n yalsg-a bãmb sʋka.