Tʋʋma 21 - WẼNNAAM SEBRE 2014

¹ La tõnd sẽn bas bãmba, d kẽe koom-koglg n loog n kẽng tɩrg n ta Kose. La vẽkembeoogo, tõnd taa Roode, n yaool n yi be n kẽng Patara.

² Tõnd yãnda koom-koglg beenẽ sẽn dag n dabd Fenisi, tõnd yaool n kẽe yẽnda n kẽnge.

³ Tõnd sẽn kẽng n kolg Sɩpre, tõnd bas-a-la goabg n kẽng Siiri sẽnẽ n na yeg Tɩɩr n tɩ sig zĩig ning koom-koglgã sẽn tog n sik a zɩɩbã.

⁴ Tõnd yãnda tẽedb beenẽ la tõnd paa ne bãmb rasem a yopoe. La Sɩɩg-sõng wilga bãmb tɩ b yeel a Poll t'a ra kẽng Zeruzalɛm ye.

⁵ La rasem‑kãens loogr zugẽ, tõnd loogame. La b fãa ne b pagbã la b kambã yãaga tõndo, hal n yi tẽnga pʋgẽ. Tõnd yĩgimda koomã noor n pʋʋse.

⁶ Dẽ, tõnd sẽn pʋʋs taab Wẽnd-na-taas n sɛ, tõnd kẽe koom koglgẽ wã, la b lebgame n kuil b yiyã.

⁷ Tõnd sẽn kẽn ne koom-koglgã n sɛ, tõnd yii Tɩɩr n kẽng Tolemayiis n tɩ pʋʋs ba-biisã la d zĩnd ne bãmb beenẽ daar a yembre.

⁸ Vẽkembeoogo, tõnd loogame n ta Sezaare. Tõnd siga koe-moaand a Filip zakẽ. Yẽnda yaa neb a yopoe wã b sẽn da tũus Zeruzalɛmã nin-yende.

⁹ La yẽnda ra tara kom-pugli a naas sẽn nan ka mi rao ye, n yaa Wẽnnaam no-rɛɛsdba.

¹⁰ Tõnd paa Sezaare rasem wʋsgo, la Wẽnnaam no-rɛɛs a yembr yʋʋr sẽn boond t'a Agabuus yii Zʋʋde n wa tõnd nengẽ.

¹¹ Yẽnda rɩka a Poll sẽbdgã n sẽb a nao ne a nus n yeel yaa: Ade, Sɩɩg-sõng yetame tɩ Zʋɩf-rãmbã na n sẽba ned ning sẽn so-a sẽbd‑kãngã wã a woto Zeruzalɛm, n ning-a bu-zẽmsã nusẽ.

¹² Tõnd ne neb nins sẽn be Sezaare wã sẽn wʋm bõn-kãnga, tõnd kosa a Poll t'a ra kẽng Zeruzalɛm ye.

¹³ La a Poll leokame: Yaa bõe n tar yãmb tɩ y yãbd n na n sãam mam sũuri? Bala, mam seglame n sɛ, la ka sẽbrã yĩng bal ye. M seglame me n na n ki Zeruzalɛm Zu-soab a Zeezi yʋʋrã yĩnga.

¹⁴ La yẽnda sẽn ka sak tõnd sẽn datã, d bas-a lame la d yeel tɩ Zu-soabã maan b raabo.

¹⁵ Rasem‑kãens sẽn looge, tõnd segla d teed n kẽng Zeruzalɛm.

¹⁶ Sezaare karen-biis kẽer me yãaga tõndo. B talla tõnd n tɩ ta rao a yembr sẽn yit Sɩpr t'a yʋʋr boond t'a Nazõ yiri. Yẽnda yaa karen-bi-kʋdre. Yaa yẽnda zakẽ la tõnd tog n tɩ zĩndi.

B yõka a Poll wẽnd doogã pʋga

¹⁷ Tõnd sẽn ta Zeruzalɛm, ba-biisã reega tõnd ne sũ-noogo.

¹⁸ Vẽkembeoogo, a Poll kẽnga a Zak yir ne tõndo, la a Zeezi tẽedbã kãsem-dãmb fãa tigma beenẽ.

¹⁹ A Poll sẽn pʋʋs-b n sɛ, a sɩngame n togs bãmb bũmb nins fãa Wẽnnaam sẽn tall yẽnda n maan bu-zẽmsã sʋkã.

²⁰ Bãmb sẽn kelg a Poll goamã, b pẽga Wẽnnaam la b yeel a Poll yaa: Ba biiga, yãmb yãame, Zʋɩf-rãmb tus wʋsg n lebg tẽedbã, la b fãa wɩngda ne a Moyiis tõogã.

²¹ Mik b ra kɩtame tɩ bãmb tẽed tɩ yãmb zãmsda Zʋɩf-rãmb nins fãa sẽn be bu-zẽmsã sʋkã n yet-b tɩ b wẽnemd n bas a Moyiis tõogã, la b ra kẽes b kamba bãongo, la b ra tũ minindã ye.

²² Dẽ wã, d na n maana wãna? Bala, neb wʋsg na n sɩd wʋmame tɩ y waame [la neb kʋʋng na n tigmame.]

²³ Woto yĩnga, bɩ y maan bũmb ning tõnd sẽn na n yeel-y wã. Tõnd tara raop a naas sẽn maan pʋleng ne Wẽnnaam.

²⁴ Peeg-y-ba, n naag ne-b n sak miningã n yɩlg y mense, la y yao yaoodã, tɩ b põng b zutã. Dẽ, nebã fãa na n bãngame tɩ bũmb nins fãa b sẽn wʋm tɩ b gomd yãmb wɛɛngẽ wã ka sɩd ye, la tɩ yãmb meng sakda a Moyiis tõogã.

²⁵ Sã n yaa ne bu-zẽms nins sẽn lebg Kiris tẽedbã, tõnd gʋls-b lame n yeel-b tɩ b ra wãb rũms nemd b sẽn maan maoong n kõ wẽn-naandse, la b ra rɩ zɩɩm, la b ra wãb rũng sẽn sãrg nemdo, la b ra maan wɩɩbd ye.

²⁶ Vẽkembeoogo, a Poll peega nin-bãmbã b naasã n naag ne-b n yɩlg-b mense, n yaool n kẽ wẽnd doogẽ wã n togs nebã bãmb yɩlgrã rayã sẽn na n baas wakat ninga, la wakat ning bãmb ned kam fãa sẽn na n wa ne a kũun tɩ b maan maoongã.

A Poll rabda Rom tẽnga

²⁷ Rasem a yopoe wã sẽn kolg pidsgu, Zʋɩf-rãmbã sẽn yit Aazi soolmã sẽn yãnd a Poll wẽnd doogã pʋgẽ, b rãmba neb kʋʋngã gilli, n yõk a Polle,

²⁸ n kelemd n yetẽ yaa: Israyɛll nebã, wa n sõng-y-do! Ad rao ning sẽn zãmsd nebã fãa zĩig fãa tɩ b kɩɩs Israyɛll buudã, la b kɩɩs a Moyiis tõogã la zĩ-kãngã, la a kɩtame meng tɩ Gɛrk-rãmb kẽ wẽnd doogẽ wã n kɩt tɩ zĩ-sõng-kãnga rẽgme.

²⁹ Bala b rag n yãnda Efɛɛs rao a Torfim t'a tũud a Poll tẽngã pʋgẽ, la b tagsdame t'a Poll tall-a lame n kẽ wẽnd doogẽ wã.

³⁰ Tẽngã fãa rãmbame, la neb yii zĩig fãa n zoe n wa. B yõka a Poll n tɛ-a n yiis wẽnd doogẽ wã, la b pag kʋɩlemsã tao-tao.

³¹ La b sẽn dat n kʋ a Pollã, b wa n togsa sodaas tusr naabã tɩ Zeruzalɛm fãa rãmbame.

³² Wakat-kãng bala, yẽnda yãka sodaase, la sodaas koabg nanambse, n zoe n kẽng nebã nengẽ. Nebã sẽn yã sodaas tusr naabã ne sodaasã, b basa a Poll pãbre.

³³ Dẽ, sodaas tusr naabã kolgame n yõka a Poll n kɩt tɩ b balg-a ne bãens a yiibu. La a yaool n sok a Poll sẽn yaa ned ninga, la a sẽn maan bũmb ninga.

³⁴ La neb kʋʋngã sʋka, kẽer kelemdame n yet tɩ woto, tɩ kẽer yet bũmb a to. Dẽ, bʋrgã sẽn yaa wʋsg tɩ sodaas tusr naabã ka tõe n bãng sẽn yaa sɩdã, a yeelame tɩ b tall a Poll n kẽng gãosgẽ wã.

³⁵ La a Poll sẽn ta rʋʋdgã, yɩɩ tɩlɛ tɩ sodaasã tebg yẽnda, neb kʋʋngã sẽn maood n dat n maan a Poll pãngã yĩnga.

³⁶ Bala, b fãa ra pʋgdame n kelemdẽ n yetẽ tɩ b kʋ-a.

A Poll gomd n na n yiisa a menga

³⁷ La wakat ning b sẽn tar a Poll n kẽed gãosgẽ wã, a Poll yeela sodaas tusr naabã yaa: M tara noor tɩ yeel-y bũmbu? La sodaas tusr naabã sok-a lame yaa: Fo mii Gɛrk goamã?

³⁸ Rẽnd fo ka Ezɩpt ned ning sẽn dag n wa-a ne rãmbg pĩndã, n peeg nin-kʋʋdb tus a naas tɩ b tũ-f n kẽ weoogã wɛ?

³⁹ A Poll leokame yaa: Mam yaa Zʋɩfe, m doga Tars sẽn be Silisi soolem, m yaa tẽn-kãseng neda. M bõosd-y lame tɩ y kõ maam noor tɩ m gom ne nebã.

⁴⁰ La sodaas tusr naabã kõ-a-la noore, la a Poll yik n yalsa rʋʋdgã zug n zẽk a nug n zãas nebã, la bʋrgã sɛɛme, tɩ lebg sɩddd... Dẽ, yẽnda goma ne bãmb ne Ebre-rãmbã goamã.