Tʋʋma 20 - WẼNNAAM SEBRE 2014

A Poll kẽnga Masedoan la Gɛrs

¹ La rãmbgã sẽn sigi, a Poll tigma karen-biisã n paas-b raood n yaool n loog n kẽng Masedoan.

² Yẽnda pɩʋʋga zĩig‑zĩig soolem‑kãng pʋg n sagl karen-biisã wʋsgo, n yaool n kẽng Gɛrs tẽnga.

³ La a Poll zĩnda Gɛrs soolem kiis a tãabo. La yẽnda rag n dat n kẽe koom-koglg n kẽng Siiri, la Zʋɩf-rãmbã sẽn soos n sed n dat yõk-a wã yĩnga, yẽnda yãka yam n na n lebg n tũ Masedoan sore.

⁴ Neb nins sẽn yãag a Poll n ta Aazi soolmã, yaa Beere rao a Piruus biig a Sopatɛɛre, ne a Aristark la a Sekõnduus sẽn yit Tesalonik ne a Gayuus sẽn yit Dɛrb tẽnga, la a Tɩmote ne a Tisik la a Torfim sẽn dog Aazi soolmẽ wã.

⁵ Nin-kãens renga taoor n tɩ gũ tõnd Torwaas soolem.

⁶ La bur sẽn ka rã-bɩll tigrã loogr poore, tõnd mensã kẽe koom-koglg Filip tẽnga. La sẽn kaoos rasem a nu, tõnd tɩ bʋʋga bãmb Torwaase, la d zĩnda be rasem a yopoe.

A Poll bee Torwaas

⁷ Dimaas daar zaabre, tõnd dag n tigmame n na n dɩ tẽegr buri. A Poll sẽn da tog n loog vẽkembeoogã, yẽnda moona koɛɛgã ne karen-biisã n gom n kaoos halɩ n ta yʋn-sʋka.

⁸ Yĩngr doog ning pʋg tõnd sẽn da tigmã, fɩtl-dãmb wʋsg n dag n be be.

⁹ La bi-bɩɩg a yembr yʋʋr sẽn boond t'a Etikuus n dag n zao fẽnetr zugu. La a Poll sẽn dag n moond koɛɛgã tɩ kaoosdẽ wã wakate, a gũsa sõamã. La gõeemã sẽn dɩk-a wã yĩnga, a yii yĩngr ro-tomdem a tãabẽ soabã n lʋɩ tẽnga. La b rɩk-a lame n mik t'a kiime.

¹⁰ La a Poll sigame n zõond a Etikuus zug n dɩk-a a nusẽ n yeel yaa: Da maan-y yɩɩr ye, a vɩɩme.

¹¹ La a Poll sẽn lebg n dʋ, a Kaoo burã n dɩ. La a gomame yɛs n kaoos hal tɩ beoogã vẽege, n yaool n looge.

¹² La b yãaga bi-bɩɩgã vɩɩga. La a yɩɩ belsg kãseng bãmb fãa yĩnga.

A Poll yii Torwaas n dabd Mile soolem

¹³ Tõnd denga taoor n kẽ koom-koglg n kẽng Asoose, yaa be la tõnd dag n tog n tɩ seg a Poll n dɩke, yẽnda n da yãk yam a woto n na n kẽn ne nao n kẽng be.

¹⁴ La a Poll sẽn seg tõnd Asoose, a kẽe koom-koglgã ne tõnd n kẽng Mitilɛn.

¹⁵ Tõnd yika be ne koom-koglgã n looge, la vẽkembeoogo, tõnd taa tẽng b sẽn boond tɩ Siyo taoore, la daar ning sẽn pʋgdã, tõnd taa Samoose, la daar ning sẽn pʋglã wã, tõnd siga Mile.

¹⁶ A Poll dag n sɩd yãka yam n na n loog Efɛɛs n da sig beenẽ, sẽn na n yɩl n da sãam weer Aazi soolmẽ wã ye. Bala, yẽnda rag n yãgdame n datẽ tɩ sã n tõe, bɩ a zĩnd Zeruzalɛm Pãntekotã daare.

A Poll goma ne kaorengã kãsem-dãmbã

¹⁷ A Poll zĩnda Mile n tʋm koɛɛg tɩ b tɩ bool a Zeezi Kiris tẽedbã kãsem-dãmbã sẽn be Efɛɛsã tɩ b wa.

¹⁸ La b sẽn wa n ta a Poll nengẽ, yẽnda yeel-b lame yaa: Yãmb mii mam yel-manesem sẽn yɩ to-to ne yãmb wakat fãa, sẽn sɩng ne daar ning mam sẽn wa Aazi soolmã pʋgẽ wã.

¹⁹ Mam tʋma Zu-soabã yĩng ne sik-m-menga, la ne nintãm, tood nins mam sẽn paamã, Zʋɩf-rãmbã sẽn da set n dat n kʋ maamã.

²⁰ Yãmb miime tɩ mam ka solg yãmb bũmb nins fãa sẽn na n sõng-y wã ye. Mam togsa yãmb bũmbã fãa la m zãms-y nebã sʋka la rot pʋse.

²¹ Mam kɩsa kaset ne Zʋɩf-rãmbã la Gɛrk-rãmbã n yeel-b tɩ b tek yam n kos Wẽnnaam sugri, la b tẽ tõnd Zu-soab a Zeezi.

²² La moasã, Sɩɩg-sõng sẽn modgd maam tɩ m kẽng Zeruzalɛmã, mam na n kẽngame, la m ka mi bũmb ning sẽn na n tɩ paam maam be ye.

²³ Mam sẽn mi bala, yaa tɩ Sɩɩg-sõng keoogda maam tẽng‑tẽnga, tɩ bi-bees roog la namsg n gũud maam.

²⁴ La mam tagsdame tɩ mam vɩɩmã ka tar yõod ne maam ye. La sẽn pak maam yaa tɩ m wee n tõog n maan m tʋʋmdã hal n ta a tɛka, n tõog n baas tʋʋmd ning Zu-soab a Zeezi sẽn ning mam zugã, n moon Wẽnnaam barkã koe-noogã.

²⁵ Mam zĩnda yãmb sʋk n moon Wẽnnaam soolem koɛɛgã, la mam mii moasã tɩ yãmb ned baa a yembr ka na n leb n yãnd mam neng yɛs ye.

²⁶ Yaa woto yĩng tɩ mam togsd yãmb dũndã, tɩ yãmb ned a yembr sã n sãame, a taalã ka be ne maam ye.

²⁷ Bala, mam togsa yãmb Wẽnnaam daabã fãa n ka solg bũmb ye.

²⁸ Dẽ wã, gũus-y y mense, la y ges piis nins fãa Sɩɩg-sõng sẽn kõ-y tɩ y gũ wã yelle. Rɩlg-y Zu-soabã tẽedbã b sẽn da ne b biigã zɩɩmã.

²⁹ Mam miime tɩ mam loogr poore, neb sẽn wẽnd wa rigd-n-yĩid‑toos n na n wa yãmb sʋk n sãam piisã.

³⁰ La neb n na n yik yãmb sʋkã n zãmsd nebã sẽn ka sɩda, n maan a woto n belg tẽedbã tɩ b tũ-ba.

³¹ Rẽ wã yĩnga, neend-y la y tẽeg tɩ yʋʋm a tãabo, mam sagla yãmb ned kam fãa ne nintãm, wĩntoog ne yʋng n ka bas ye.

³² La moasã, mam basda yãmb Wẽnnaam nugẽ, la m basd-y ne bãmb bark goamã sẽn tar pãng n tõe n paas yãmb daoodo, la a kɩt tɩ yãmb yɩ pʋɩt-n-taas ne Wẽnnaam nebã fãa wã.

³³ Mam ka maan sũ-kiir ne ned ligdi, wall a sãnem, wall a fut ye.

³⁴ Yãmb mens miime tɩ mam tʋma ne m meng nus n na n paam bũmb ning sẽn na sek maam ne neb nins sẽn tũud maamã.

³⁵ Mam wilga yãmb bũmb fãa pʋgẽ tɩ d tog n tʋma a woto n tõog n sõng naong rãmba, la d tẽeg goam nins Zu-soab a Zeezi meng sẽn yeelã: Tɩ kõ bee bark n yɩɩd tɩ reege.

³⁶ A Poll sẽn gom a woto n sɛ, a yĩgimdame n pʋʋs ne bãmb fãa.

³⁷ La b fãa ra yãbda wʋsgo, n mobgd a Poll n mogsd-a, n pʋʋsd-a Wẽnd-na-taase.

³⁸ La b sũyã sẽn sãam ne bũmb ning n yɩɩd yaa a Poll sẽn yeel tɩ b ka na n leb n yãnd-a wã. Rẽ poore, b yãaga yẽnda hal n ta koom koglgẽ wã.