Tʋʋma 17 - WẼNNAAM SEBRE 2014

A Poll ne a Sɩlaas bee Tesalonik

¹ A Poll dãmb tũu Amfipolis ne Apoloni n ta Tesaloniki. Zʋɩf-rãmbã karen-doog n da be be.

² A Poll kẽe karen-doogẽ wã wa a sẽn minim n maandẽ wã, La a sõsa ne bãmb gʋlsg sõamyã wɛɛngẽ, vʋʋsg ray a taab n pʋgl taaba.

³ Yẽnda ra bilgda bãmb la a wilgd-b tɩ Kiris da tog n namsame, la tɩ b na n vʋʋgame n bas kũum. A Poll yeel-b lame yaa: Zeezi ning mam sẽn gomd ne yãmb b yellã, yaa bãmb la Kirisã.

⁴ La Zʋɩf-rãmbã kẽer tẽe a Poll sẽn yeelã, la bãmb ne Gɛrk-rãmb wʋsgo, la pagb wʋsg me nebã sẽn waoogd naaga ne a Poll la a Sɩlaase.

⁵ La sũ-kiir yõka Zʋɩf-rãmbã tɩ b kams ninsaan-faad nebã sʋka, n kɩt tɩ b gũm taaba, n dãmbd tẽngã. B kẽnga a Zaazõ yirã n na n tɩ bao a Poll ne a Sɩlaas n tall-b n kẽng nebã taoore.

⁶ La b sẽn ka yãnd a Poll rãmba, b yõga a Zaazõ ne ba-biis kẽer n tall-b n kẽng tẽn-soaadbã taoore, n kelemd n yetẽ yaa: Nin‑bãmbã, sẽn dãmb-b dũni fãa wã waa ka me, la a Zaazõ reeg-b-la a yiri.

⁷ B fãa tʋʋmã kɩɩsda rĩm a Sezaar noorã, la b yetame tɩ rĩm a to n be: A Zeezi.

⁸ Gom-kãens namsa neb kʋʋngã ne tẽn-soaadbã.

⁹ La b kɩtame t'a Zaazõ ne neb a taabã gãneg yaood tɩ b yaool n bas-b tɩ b looge.

A Poll ne a Sɩlaas bee Beere

¹⁰ Tao-tao bala, ba-biisã kɩtame t'a Poll ne a Sɩlaas loog Beere ne yʋngã. La b sẽn ta beenẽ bala, b kẽe Zʋɩf-rãmbã karen-doogẽ.

¹¹ Zʋɩf-rãmb nins sẽn dag n be Beere wã da tara yam sõng n yɩɩd sẽn be-b Tesalonikã. Bãmb deega Wẽnnaam koɛɛgã ne b sũyã fãa. La daar fãa, bãmb da vɛɛsda gʋls‑sõamyã n dat n bãng bũmb nins b sẽn yet bãmbã sã n yaa sɩda.

¹² Neb wʋsg bãmb sʋkã tẽeme, la Gɛrk-rãmbã sʋk me, pagb wʋsg nebã sẽn nande, ne raop wʋsg tẽeme.

¹³ La Zʋɩf-rãmb nins sẽn be Tesalonikã sẽn bãng t'a Poll da moonda Wẽnnaam koɛɛgã Beere wã me, b waa beenẽ, n pirs nebã, n dãmb-ba.

¹⁴ Dẽ, tao-tao bala, ba-biisã kɩtame t'a Poll zãag n kẽng ko-kãsengã noore. La a Sɩlaas ne a Tɩmote paa Beere.

¹⁵ Neb nins sẽn yãag a Pollã talla yẽnda n ta Atɛn. La a Poll yeel-b lame tɩ b sã n leb bɩ b tɩ yeel a Sɩlaas ne a Tɩmote tɩ b babs-a n wa tao-tao. Dẽ, b lebgame.

A Poll bee Atɛn

¹⁶ A Poll sẽn be Atɛn n gũud a Sɩlaas ne a Tɩmote waoongã, yẽnda sũurã sãama wʋsgo, a sẽn yã tɩ tẽngã pida ne wẽn-naandsã yĩnga.

¹⁷ Dẽ, a Poll dag n sõsda ne Zʋɩf-rãmbã, la ne buud a taabã neb sẽn zoet Wẽnnaamã karen-doogẽ wã. La daar fãa, raagã pʋga, a ra sõsda ne neb nins sẽn wat be wã.

¹⁸ Epikuryẽ-rãmbã ne Ɛstoyisẽ-rãmbã karen-saam-dãmb kẽer me sɩngame n gom ne a Polle. La kẽer sokame tɩ gom-to-nedã rat n yeelame tɩ bõe? La neb a taab yetame tɩ yaa wa a Poll yaa wẽn-zẽms koe-toagsda, bala, a dag n gomda a Zeezi la kũum vʋʋgr yelle.

¹⁹ La b talla a Poll n kẽng Ayeropaazã kãsem-dãmbã taoor n sok-a yaa: Dẽ yĩnga, fo tõe n togsa tõnd zãms-paalgã fo sẽn tarã võor tɩ d bãnge?

²⁰ Bala, bũmb nins fo sẽn togsd tõndã yaa bõn-sãams ne tõndo, la tõnd dat n bãnga b võore.

²¹ Bala, Atɛn nebã fãa ne sãambã sẽn be bãmb sʋkã da ka rɩkd b weerã n maand bũmb a to tɩ sã n ka tɩ gom, wall tɩ kelg koe-paals ye.

²² A Poll yik n yalsa Ayeropaazã sʋk n yeel yaa: Atɛn nebã, bũmb fãa pʋgẽ, mam mikame tɩ yãmb yaa wẽn-pʋʋsdb meng-menga.

²³ Bala, mam sẽn wa n kẽnd la m get bũmb nins yãmb sẽn pʋʋsdã, mam tol n yãnda tẽn-kugr a yembr tɩ b gʋls a zug tɩ «wẽnnaam ning tõnd sẽn ka mi wã rẽnda.» Wẽnnaam ning yãmb sẽn waoogd n yaool n ka mi-bã, yaa Wẽnnaam‑kãng yell la mam sẽn gomd ne yãmbã.

²⁴ Wẽnnaam ning sẽn naan-a dũni wã ne bũmb nins fãa sẽn be a pʋgẽ wã, bãmb yaa yĩngr la tẽng Zu-soaba, la b ka kẽed pʋʋsg rot ninsaalb nus sẽn me pʋsẽ,

²⁵ la b ka baood me tɩ ninsaalb tʋm ne b nus n sõng-b wa bũmb n paoog-b ye. Bala, yaa bãmb n kõt ninsaalbã vɩɩm, la vʋʋsem, la bũmbã fãa.

²⁶ Wẽnnaam talla nin-yend n kɩt tɩ ninsaalbã buud fãa zĩnd dũni zug tɛk fãa, la b welga wakat n kõ ninsaalbã, la b ning b soolmã tods n kõ-ba.

²⁷ Wẽnnaam maana bõn-kãngã, sẽn na n yɩlẽ tɩ ninsaalbã bao bãmba, la tɩ b sẽn maood n dat n yãnd Wẽnnaamã, bɩ tõe tɩ b yãnd-ba. Bala, Wẽnnaam ka zãr ne tõnd ned ba a yembr ye,

²⁸ bala, yaa bãmb pʋg la d tar vɩɩm, la d tõe n kẽne la d beẽ. Yaa wala yãmb yʋʋmbã kẽer sẽn dag n yeel me tɩ tõnd yaa Wẽnnaam kambã.

²⁹ Rẽ wã yĩnga, tõnd sẽn yaa Wẽnnaam kambã, d ka tog n tags tɩ Wẽnnaam wẽnda sãnem, wala wanzuri, wala kugr sẽn peese wa sẽn zems ninsaalb minim la b tagsg ye.

³⁰ Nebã sẽn ka mi b sẽn maandã wakate, Wẽnnaam ka maand bũmb ye, La moasã, b yeta nebã fãa sẽn be zĩig fãa tɩ b tek yam n kos sugri.

³¹ Bala, Wẽnnaam yãka raare, tɩ rao ning bãmb sẽn yãkã na n kao dũniyã fãa bʋʋd ne tɩrlem. La Wẽnnaam kõo nebã fãa bãnde, n vʋʋg rao-kãng n bas kũum n wilg tɩ yaa sɩda.

³² La b sẽn wʋm a Poll sẽn gomd kũum vʋʋgr yellã, kẽer yaala yẽnda, la kẽer yeelame tɩ b na n leb n kelga a Poll koe-kãngã nindaare.

³³ Dẽ, a Poll yii bãmb sʋka.

³⁴ La baoosgo neb kẽer lagma a Poll n tẽ. A Deniis sẽn yaa bʋ-kaoodbã sʋk ned a yembr dag n naaga be, ne pag a yembr yʋʋr sẽn boond t'a Damaris n leb n paas neb a taaba.