Tʋʋma 15 - WẼNNAAM SEBRE 2014

¹ Neb kẽer yii Zʋʋde n wa Ãntiyoos n sɩng n zãmsd ba-biisã n yetẽ tɩ b sã n ka kẽ bãong wa sẽn zems a Moyiis tõogã, b ka tõe n paam fãagr ye.

² A Poll ne a Barnabaas kɩɩs-b lame n wẽ nokoeem-kãseng ne-b bõn-kãng wɛɛngẽ. Rẽ, ba-biisã yãka yam t'a Poll ne a Barnabaas ne bãmb sʋkã neb kẽer na n kẽnga tẽn-tʋmdbã ne kãsem-dãmbã nengẽ Zeruzalɛm n tɩ ges yel-kãng yelle.

³ Dẽ, Kiris tẽedbã sẽn be Ãntiyoosã yãag-b lame. A Poll dãmb pɩʋʋga Fenisi la Samaari soolem la b togsda sẽn yɩ to-to tɩ bu-zẽmsã me sak Wẽnnaamã. La bõn-kãng kõo ba-biisã fãa sũ-no-kãsenga.

⁴ La a Poll dãmb sẽn ta Zeruzalɛm, a Zeezi tẽedbã ne tẽn-tʋmdbã ne kãsem-dãmbã reeg-b lame. La a Poll dãmb togs-b‑la bũmb nins fãa Wẽnnaam sẽn tall bãmb n maanã.

⁵ La Fariizẽ-dãmbã neb kẽer sẽn yaa Kiris tẽedbã yikame n yeel tɩ yaa tɩlɛ tɩ b kẽes bu-zẽmsã bãongo, la b kɩt tɩ b sak a Moyiis tõogã.

⁶ Tẽn-tʋmdbã ne kãsem-dãmbã tigma taab n na n ges yel-kãng yelle.

⁷ Bãmb sẽn wẽ nokoɛɛm wʋsg n kaoose, a Pɩyɛɛr yikame n yeel yaa: M ba-biisi, hal pipi wakat bala, Wẽnnaam yãka maam yãmb sʋk tɩ m moon koe-noogã bu-zẽmsã me tɩ b wʋme, la b tẽ.

⁸ La Wẽnnaam sẽn mi ninsaalbã fãa sũyã, b kõ-b‑la Sɩɩg-sõng wa b sẽn dag n kõ tõndã, tɩ yɩ kaset tɩ b sak n deeg-b lame.

⁹ Wẽnnaam ka welg tõnd toor ne bu-zẽmsã ye, bala b sẽn tẽ wã yĩnga, Wẽnnaam yɩlga b sũyã.

¹⁰ Dẽ moasã, yaa bõe tɩ y baood Wẽnnaam noor n zɩlgd karen-biisã zɩɩb tõnd yaab-rãmbã wall tõnd mens sẽn ka tõog n tʋke?

¹¹ La tõnd tẽedame tɩ yaa Zu-soab a Zeezi barkã yĩng n kɩt tɩ tõnd paam fãagr wala bãmb me sẽn paam to-to wã.

¹² Nebã sẽn tigmã fãa sĩndame n kelg a Barnabaas ne a Poll sẽn togsd Wẽnnaam sẽn tall bãmb n maan bõn-bãnã, la bõn-yɛɛsdsã fãa bu-zẽmsã sʋkã.

¹³ Bãmb sẽn gom n sɛ, a Zak gomame n yeel yaa:

¹⁴ M ba-biisi, kelg-y maam. A Sɩmo wilga yãmb Wẽnnaam sẽn geelg bu-zẽmsã to-to n sɩng n yãk neb be n maan b rẽndã.

¹⁵ La bõn-kãng zemsa ne Wẽnnaam no-rɛɛsdbã sẽn gomã. B gʋlsame n yeel yaa:

¹⁶ «Zu-soabã yetame yaa: ‹Rẽ poore, mam na n lebgame n wa mee a Davɩɩd doogã sẽn dag n lʋɩ wã. Mam na n leb n manega yẽnda raboogã n me, la m na n yik-a lame n yalse,

¹⁷ tɩ neb a taabã sẽn ketã bao Zu-soabã. La buud nins fãa sẽn pʋʋsd ne mam yʋʋrã me na n baoo maam.›

¹⁸ Ade, yaa Zu-soabã sẽn wilg bõn-kãens hal yʋʋm zãrã n yeel a woto.»

¹⁹ Yaa woto yĩng n kɩt tɩ mam togsdẽ t'a zemsame tɩ d da bao yell n kõ bu-zẽmsã sẽn sakd Wẽnnaamã ye.

²⁰ La bɩ d gʋls-b n yeel-b tɩ b lak b mens ne wẽn-naandsã maand nemdo, la wɩɩbdo, la b ra wãb rũng sẽn sãrg nemdo, la b ra rɩ zɩɩm ye.

²¹ Bala, hal kʋdem wẽndẽ tɩ ta moasã, b moonda a Moyiis tõogã tẽmsã pʋse, la b karemd-a karen-dotã pʋs vʋʋsg daar fãa.

²² Dẽ, tẽn-tʋmdbã ne kãsem-dãmbã la tẽedbã fãa yãka yam n na n tũus neb kẽer bãmb sʋkã n tʋm-b tɩ b tũ a Poll ne a Barnabaas n kẽng Ãntiyoose. Bãmb yãka a Zʋʋd b sẽn boond t'a Barsabaas la a Sɩlaase. Bãmb b yiibã fãa yaa neb ba-biisã sẽn waoogda.

²³ B kɩs‑b‑la sebrã, la b sẽn gʋlsã yeelame yaa: Tẽn-tʋmdbã ne kãsem-dãmbã, la ba-biisã pʋʋsda ba-biis nins sẽn be bu-zẽmsã sʋk n be Ãntiyoos la Siiri ne Silisi soolmã.

²⁴ Tõnd wʋmame tɩ neb kẽer n yi tõnd nengẽ n wa n dãmbd yãmb la b yuusd yãmb yam ne b goamã. La ka tõnd n kõ-b noor ye.

²⁵ Yaa woto yĩnga, tɩ tõnd tigim taab n yãk yam a yembr n yãk neb n tʋm-b tɩ b na n yãag d zo-nongds a Poll ne a Barnabaas n wa yãmb nengẽ.

²⁶ A Poll dãmb ra gẽnega b yõy tõnd Zu-soab a Zeezi Kiris tʋʋmdã yĩnga.

²⁷ Rẽnda yĩng la d tʋm a Zʋʋd ne a Sɩlaas yãmb nengẽ. La b mens na n togs-y‑la bõn-kãense.

²⁸ Bala, Sɩɩg-sõng ne tõnd me gesame tɩ yaa neere tɩ d da zɩlg-y zɩɩb sã n ka bũmb nins sẽn yaa tɩlɛ wã ye. La yaa tɩ yãmb ka tog n wãb nemd

²⁹ b sẽn maan maoong n kõ wẽn-naands ye. La y ka tog n dɩ rũng sẽn sãrge, la y da rɩ zɩɩm ye, la y ra maan wɩɩbd ye. Yãmb sã n lak y mens ne bõn-kãense, y maana sẽn yaa neere. Wẽnd na sõng yãmba.

³⁰ Dẽ, b basa b sẽn tʋm-b rãmbã tɩ b loog n kẽng Ãntiyoose. La b tigma Kiris tẽedbã fãa beenẽ n kɩs-b sebrã.

³¹ B sẽn kɩt tɩ b karem sebrã n sɛ, b fãa sũyã yɩɩ noogo, b sẽn paas bãmb raoodã yĩnga.

³² A Zʋʋd ne a Sɩlaas mens sẽn dag n yaa Wẽnnaam no-rɛɛsdbã, b goma ne ba-biisã n kaoose, n paas-b raood la pãnga.

³³ La b sẽn pa Ãntiyoos n kaoos bilfu, ba-biisã pʋʋs-b lame tɩ Wẽnd na kuils-b laafɩ, n bas-b tɩ b lebg n leb neb nins sẽn tʋm-b bãmbã nengẽ.

³⁴ [La a Sɩlaas yãka yam n na n pa Ãntiyoose.]

³⁵ La baoosgo, a Poll ne a Barnabaas paa Ãntiyoose. La bãmb ne neb a taab wʋsg ra zãmsda nebã la b moond-b koe-noogã sẽn yaa Zu-soabã goamã.

A Poll ne a Barnabaas welga ne taaba

³⁶ Rasem bilf sẽn paase, a Poll yeela a Barnabaas t'a wa tɩ b leb n kẽng tẽms nins fãa bãmb sẽn dag n moon Zu-soabã koɛɛgã n tɩ ges ba-biisã n bãng b kibar sẽn yaa to-to.

³⁷ A Barnabaas rag n dat n peega a Zã b sẽn boond t'a Mark t'a tũ-ba.

³⁸ La a Poll tagsame tɩ yaa neer tɩ b ra peeg a Zã-Mark ye. Tɩ bala, a rag n lebg n basa bãmb Paamfili soolem n ka leb n yãag-b n maan tʋʋmdã ye.

³⁹ La b kɩɩsa taab wʋsg yel-kãng wɛɛngẽ hal n welg taaba. La a Barnabaas peega a Mark n kẽ koom-koglg n na n kẽng Sɩpre.

⁴⁰ La a Poll yãka a Sɩlaase, la ba-biisã pʋʋsame tɩ Zu-soabã ning-b barka, la b loogame.

⁴¹ A Poll pɩʋʋga Siiri ne Silisi soolem n paas a Zeezi Kiris tẽedbã pãnga.