Tʋʋma 13 - WẼNNAAM SEBRE 2014

B tʋma a Barnabaas ne a Solle

¹ Wẽnnaam no-rɛɛsdb la karen-saam-dãmb n dag n be a Zeezi tẽedbã sẽn be Ãntiyoosã sʋka. Yaa a Barnabaas ne a Sɩmyõ b sẽn boond t'a Nizɛɛr ne a Lisiyuus sẽn yit Sirɛn la a Manayɛn sẽn wub rĩm a Erood ba wã zakẽ, ne a Solle.

² Bãmb sẽn dag n maand Zu-soabã tʋʋmd la b loet noore, Sɩɩg-sõng yeel-b lame tɩ b yãk a Barnabaas ne a Soll n welg-b toore, tɩ b maan tʋʋmd ning b sẽn bool-b tɩ b maanã.

³ Dẽ, bãmb loee noor n pʋʋs la b yaool n tik a Barnabaas ne Soll ne b nus n pʋʋs b yĩng n bas-b tɩ b kẽnge.

A Barnabaas ne a Soll moona koe-noog Sɩpr

⁴ La Sɩɩg-sõng sẽn tʋm a Barnabaas ne a Solle, b kẽnga Seleesi, la b kẽe koom-koglg be n kẽng Sɩpre.

⁵ Bãmb sẽn ta tẽng sẽn boond tɩ Salamin, b sɩng n moona Wẽnnaam koɛɛgã Zʋɩf-rãmbã karen-dot pʋse. A Zã-Mark ra bee ne bãmb n sõngd-ba.

⁶ Bãmb pɩʋʋga tẽng ning koomã sẽn gũbgã fãa hal n ta tẽng sẽn boond tɩ Pafoose, la b yãnda bag a yembr be sẽn yaa zãmb-no-rɛɛsa, yẽnda yaa Zʋɩf t'a yʋʋr boond t'a Baar-Zeezi sẽn dat n togs t'a Zeezi biiga.

⁷ Yẽnda ra bee ne tẽn-kãng Gʋvɛrneer a Sergiyuus Poluus sẽn dag n yaa ned sẽn tar yam wʋsgã. Gʋvɛrneerã kɩtame tɩ b bool a Barnabaas ne a Solle, bala a rag n dat n wʋma Wẽnnaam goamã.

⁸ La a Elimaas sẽn yaa bagã yʋʋr ne Gɛrk goamã kɩɩsa a Barnabaas ne a Soll n baood n sãam Gʋvɛrneerã tẽebo.

⁹ Dẽ, a Soll b sẽn boond me t'a Poll pida ne Sɩɩg-sõng n ges bagã,

¹⁰ n yeel-a yaa: «Sɩlem-wẽng soaba, fo pida ne wẽnem sʋtãan biiga, f yaa tɩrlem fãa bɛyã. F ka na n bas Zu-soab so-tɩrsã sãoongo?

¹¹ Moasã, gese, Zu-soabã na n wẽe foom tɩ f lebg zoanga, n kaoos wakat bilfu, la fo kõn n leb n yãnd wĩntoogã vẽenem ye. La tao-tao bala, a Elimaas ninã sɩnga mumbu, la lebga lik bida ne yẽnda. Yẽnda wẽnemda zĩig fãa n baood ned sẽn na n gãd a nug n tɛ-a.

¹² Dẽ, guvɛrneerã sẽn yã bũmb ning sẽn maanã, a tẽeme. Bala, Zu-soabã zãmsgã wɛɛngẽ wã yɛɛsa yẽnda.»

A Poll moona koɛɛg Ãntiyoos sẽn be Pisidi soolem

¹³ A Poll ne a tũud-n-taasã kẽe koom-koglg Pafoos n yi be n kẽng Pɛrz sẽn be Pamfili soolmã. A Zã-Mark basa bãmb be n lebg n leb Zeruzalɛm.

¹⁴ A Poll dãmb yii Pɛrz n kell n kẽng n ta Ãntiyoos sẽn be Pisidi soolem. La Zʋɩf-rãmbã vʋʋsg daare, a Poll dãmb kẽ karen-doogẽ wã n zĩndi.

¹⁵ La b sẽn karem tõogã ne Wẽnnaam no-rɛɛsdbã sɛbã n sɛ, karen-doogã nanambs tʋma neb tɩ b yeel a Poll dãmb yaa: Ba-biisi, yãmb sã n tara koɛɛg n na n gom ne nebã n paas-b raoodo, yãmb tõe n gomame moasã.

¹⁶ A Poll yikame n zãas a nug n yeel yaa: «Yãmb Israyɛll nebã, la yãmb dãmb sẽn zoet Wẽnnaamã, kelg-y yã!

¹⁷ Wẽnnaam ning sẽn yaa Israyɛll nin-kãensã Wẽnnaam tũusa tõnd yaab-rãmbã n kɩt tɩ bu-kãng bɩ a sẽn wa n be sãand weoog Ezɩpt tẽngã wakate. La Wẽnnaam yiisa bãmb be ne pãn-kãsenga.

¹⁸ La b sõnga bãmb sẽn kolg yʋʋm pis-naas weoogã pʋga.

¹⁹ La Wẽnnaam sãama buud a yopoe Kana n dɩk b soolmã n kõ b nebã tɩ b sooge.

²⁰ La bõn-kãens fãa kolga yʋʋm kobs-naas la pis-nu. Dẽ poorẽ, Wẽnnaam kõo tõnd yaab-rãmbã bʋ-kaoodba hal tɩ ta Wẽnnaam no-rɛɛs a Sãmwɛll zamaanẽ.

²¹ Rẽ zugẽ, bãmb kosa rĩmã, la Wẽnnaam kõ‑b‑la a Sayull sẽn yaa rao a Kiis biig n yaa Benzame buudã. Yẽnda rɩɩ naamã yʋʋm pis-naase.

²² Wẽnnaam sẽn yiis a Sayull naamẽ wã, b yãka a Davɩɩd t'a yɩ Israyɛll dãmbã rĩmã. La Wẽnnaam kɩsa a Davɩɩd kaset n yeel a woto: ‹Mam yãndame t'a Izayi biig a Davɩɩd yaa rao sẽn ta mam yam. Yẽnda n na n pids mam datmã fãa zãnga.›

²³ Yaa a Davɩɩd yagensã sʋk la Wẽnnaam kɩt t'a Zeezi rog n yɩ fãagd Israyɛll nebã yĩnga, wa sẽn zems bãmb sẽn dag n kãabã.

²⁴ Sẽn deng a Zeezi waoongo, a Zã dag n mooname n yeel Israyɛll nebã fãa tɩ b tek yam n sak lisgu.

²⁵ La a Zã tʋʋmd sẽn wa n kolgd sɛɛbo, a rag n yetame yaa: ‹Yãmb tagsdame tɩ mam yaa ãnda? Mam ka ned ningã yãmb sẽn gũud a soabã ye. La kelg-y-yã: Bãmb na n pʋgla maam n wa, la mam sõmblem pʋs n ka sek tɩ m lok b neooda sẽbds ye.›

²⁶ M ba-biisi, yãmb sẽn yaa a Abrahaam yagensã la neb nins sẽn be yãmb sʋk n zoet Wẽnnaamã, yaa yãmb yĩng la b tʋm fãagrã koe-no-kãngã.

²⁷ Bala, Zeruzalɛm nebã ne b nanambsã ka bãng a Zeezi sẽn yaa ned ning ye. La b ka wʋm Wẽnnaam no-rɛɛsdbã goamã b sẽn karemd vʋʋsg daar fãa wã võor ye. La b kaoo a Zeezi bʋʋd n pids Wẽnnaam no-rɛɛsdbã gom-kãense.

²⁸ Baa b sẽn ka yãnd bũmb ne bãmb sẽn zems kũumã, b kosa a Pilat t'a kɩt tɩ b kʋ a Zeezi.

²⁹ La b sẽn pids bũmb nins fãa gʋls-sõamyã sẽn dag n togs bãmb wɛɛngẽ wã, b sik-b-la da-pɩkã zug n tɩ gãneg yaoogẽ.

³⁰ La Wẽnnaam vʋʋga a Zeezi n bas kũum.

³¹ La neb nins sẽn dag n tũ a Zeezi n yi Galɩle n kẽng Zeruzalɛm yãnda bãmb rasem wʋsgo. La moasã b yaa a Zeezi kaset dãmb Israyɛll nebã sʋka.

³² La tõnd togsda yãmb koe-no-kãngã, n wilgd yãmb kãabg ningã Wẽnnaam sẽn da kãab tõnd yaab-rãmbã,

³³ moasã, Wẽnnaam pids-a lame n kõ tõnd sẽn yaa bãmb yagensã, n vʋʋg a Zeezi n bas kũum wa sẽn gʋls yɩɩn-sõng a yiib soaba pʋgẽ wã: ‹Rũndã, mam yaa fo ba, la fo yaa mam biiga, maam n dog foom.›

³⁴ Wẽnnaam dag n yeelame tɩ b na n vʋʋg-b lame n bas kũum tɩ b yĩngã ra põog ye. Yaa bũmb ning Wẽnnaam sẽn dag n gomã la a woto: ‹Mam na n kõo yãmb a Davɩɩd bõn-sõamyã. Bũmb nins sẽn yaa sõamã la sɩdã.›

³⁵ Yaa woto yĩng tɩ b leb n yeel zĩig a to yaa: ‹Yãmb kõn bas y sõmblem soabã t'a põog ye.›

³⁶ La a Davɩɩd sẽn maan sẽn tat Wẽnnaam yam bãmb wakatẽ wã, b yaool n kiime n paam b saam-dãmba, la b yĩngã põogame.

³⁷ La Wẽnnaam sẽn vʋʋg ned ning n bas kũumã ka põog ye.

³⁸ Dẽ, ba-biisi, bɩ y bãng tɩ yaa a Zeezi maasem yĩng la b moond yãmb yel-wẽnã sugr kũun koɛɛgã.

³⁹ La ned ning fãa sẽn tẽed bãmba, b basda yẽnda taal ne bũmb ning fãa a Moyiis tõogã sẽn dag n ka tõe n bas taalã.

⁴⁰ Woto yĩnga, bɩ y gũus tɩ Wẽnnaam no-rɛɛsdbã sẽn yeel bũmb ning b sɛbã pʋsã ra paam yãmb ye.

⁴¹ ‹Nin-kɩɩsdba, ges-y-yã, la y yɛɛs n menem, bala, mam na n maana tʋʋmd yãmb belmã wakate. Yaa tʋʋmde, tɩ b sã n dag n yeel yãmba, y kõn tol n tẽ ye.› »

⁴² La a Poll ne a Barnabaas sẽn yi karen-doogẽ wã, nebã kosa bãmb tɩ vʋʋsg daar sẽn watã bɩ b leb n wa n moon koe-kãngã yɛsa.

⁴³ La kaorengã sẽn sɛ, Zʋɩf-rãmb ne neb nins sẽn tẽed Zʋɩf-rãmbã kaorengã wʋsg tũu a Poll ne a Barnabaas tɩ b sõs ne-b n sagl-b tɩ kell n pa Wẽnnaam barkã pʋgẽ.

⁴⁴ La vʋʋsg daar sẽn leb n ta, sẽn kolg tẽngã nebã fãa tigma taab n na n kelg Wẽnnaam goamã.

⁴⁵ Zʋɩf-rãmbã sẽn yã neb kʋʋngã, sũ-kiir yõk-b lame tɩ b kɩɩs a Poll goamã la b tʋ yẽnda.

⁴⁶ A Poll ne a Barnabaas yeela bãmb vẽeneg yaa: Yaa yãmb la b rag n tog n deng n togs Wẽnnaam goamã pipi. La y sẽn zãgs Wẽnnaam goamã, yãmb kao y mens bʋʋd n yet tɩ yãmb ka zems tɩ paam vɩɩm sẽn kõn sɛ wã ye. Rẽ wã tõnd na n kẽnga bu-zẽmsã nengẽ moasã.

⁴⁷ Bala, Zu-soabã yeela tõnd a woto: «Mam yãka foom tɩ f yɩ vẽenem bu-zẽmsã yĩnga, n tall fãagrã n ta hal dũniyã tɛk fãa.»

⁴⁸ La bu-zẽmsã sẽn wʋm woto, b sũyã yɩɩ noogo, la b pẽga Zu-soabã goamã. La neb nins fãa sẽn na n paam vɩɩm sẽn kõn sɛ wã lebga tẽedba.

⁴⁹ La Zu-soabã koɛɛg ra saagda soolem‑kãng fãa.

⁵⁰ La Zʋɩf-rãmbã pirsa nin‑bɛdã pagb sẽn sakd tẽebã yell neerã, la ne tẽnga nin-kãsems tɩ b nams a Poll la a Barnabaas n dig-b tɩ b yi bãmb soolmẽ.

⁵¹ Dẽ a Poll ne a Barnabaas pĩmsa b naoã tom nin-bãmb yĩnga, la b yi n kẽng Ikoniyom.

⁵² La karen-biisã sẽn be Ãntiyoosã ra pida ne sũ-no-kãsenga la ne Sɩɩg-sõngo.