Sõadga 4 - WẼNNAAM SEBRE 2014

Kehat yagensã tʋʋma

¹ Sẽn-Ka-Saab yeela a Moyiis ne a Aarõ yaa:

^2-3 «Sõdg-y Kehat yagensã sẽn be Leevi buudã neb sʋkã roog-roogo la zak-zaka, n gʋls b yʋyã. Yaa neb yʋʋm sẽn ta pis-tã n tar n dabd pis-nu wã. Neb nins fãa sẽn tõe n maan tʋʋm sɛk roogã pʋgẽ.

⁴ Bãmb tʋʋmd yaa tɩ get teed nins b sẽn welg toor Wẽnnaam tʋʋmdã yĩngã yelle.

⁵ Israyɛll nebã sã n wa na n looge, bɩ a Aarõ ne a kom-dibli wã yak peen-lillã sẽn lill zĩig sẽn welg toor n yɩɩdã sɛk roogã pʋgã, n dɩk-a n pil kaoolã koglgã, kaoolã kug-wals sẽn be a pʋgẽ wã.

⁶ La bãmb na n dɩka gãn-taokã, n lud koglgã zugu, la b rɩk peend sẽn wʋg ne gĩs-kẽeg haoo, n tẽeg n pil a fãa. La b rɩk ra-bɩlmã n tui a tuiidsẽ wã, tɩ b tõe n dɩk-a.

⁷ La bɩ bãmb rɩk peend a to me sẽn wʋg ne gĩs-kẽeg haoo, n tẽeg n lud kaset burã taablã, n yaool n dogl laasã, wũmbli wã, ko-teesã, ne tʋgdã b sẽn tar n ningd reezẽ rãam kũunã yĩngã. La kaset burã ka tog n kong taablã zug ye.

⁸ La bɩ bãmb dɩk peend sẽn wʋg ne gĩs-miuugu, n tẽeg n lud-a. La b rɩk gãn-taokã, n lud a zãngã, n yaool n dɩk ra-bɩlmã n tui taablã tuiidsẽ wã.

⁹ Bɩ b rɩk peen-kẽeg haoo, n pil fɩtl doagendgã ne a fɩtl-dãmbã, la a teed a taabã fãa: Yaa yɩʋʋdã, bug-zẽen-laasã, la kaam tʋgdã.

¹⁰ La bɩ b rɩk gãn-taokã, n lud a fãa, la b yaool n dɩk-a n dogl pãndar zugu.

¹¹ Bɩ b rɩk peen-kẽeg haoo n tẽeg n pil wisd yõogr sãnem tẽn-kugrã, la b lud a zugã ne gãn-taokã, n yaool n dɩk ra-bɩlmã n tui tẽn-kugrã tuiidsẽ wã.

¹² Rẽ fãa zugẽ, bɩ b rɩk teed nins fãa b sẽn tar n tʋmd zĩ-sõngã pʋgẽ wã, n bao peen-kẽeg haoo n vil-ba, n dɩk gãn-taokã n lud-ba, la b yaool n tebg te-bãmb fãa n dogl pãndar zugu.

¹³ Rẽ poore, bɩ b wʋk tompeglmã sẽn be zũud tẽn-kugrã b sẽn yõogd maoong a zugã, la b lebs peen-miuug n tɩʋ tẽn-kugrã zugu.

¹⁴ La bɩ b rɩk maan-kʋʋrã tʋʋmã teed fãa n dogl a zugu: yaa wisd yõogr laasã, kõsdsã, pɛll-dãmba, ne laasã b sẽn tar n kokd zɩɩmã. La b rɩk gãn-taokã n lud b fãa, n yaool n dɩk ra-bɩlmã n tui tẽn-kugrã tuiidsẽ wã, tɩ b tõe n dɩk-a.

¹⁵ La yikr fãa wakate, yaa a Aarõ ne a kom-dibli wã n tog n deng n wa vil zĩ-sõngã teedã ne a te-tũudsã n sɛ, tɩ Kehat yagensã yaool n wa tʋk-ba. Bala, a Kehat yagensã ka tog n sɩɩs zĩ-sõngã teedã meng ye. B sã n sɩɩse, b na n kiime. Yaa a Kehat yagensã n na n tʋkd zĩ-sõngã pʋgẽ teedã.

¹⁶ La yaa maan-kʋʋd a Aarõ biig a Eleyazaar n na n get fɩtl doagendgã kaam yelle, la wisdã sẽn na n yõogã, ne daar fãa bõn-koaadlã kũunã, la nug-tikr kaamã yelle. Yaa yẽnda n na n ges zĩ-sõngã ne a pʋgẽ teedã fãa yelle, sã n yaa teed nins sẽn welg toorã, la te-tũudsã.»

¹⁷ Sẽn-Ka-Saab yeela a Moyiis ne a Aarõ yaa:

¹⁸ «Bɩ y modg t'a Kehat yagensã ra wa menem zãng Leevi buudã sʋk ye.

¹⁹ Ad yãmb sẽn na n maan bũmb ning tɩ Kehat yagensã ra wa ki zĩ-sõngã teed yell gesg pʋgẽ ye: Bɩ foom a Aarõ ne f kom-dibli wã tall bãmb ned kam fãa n kẽng a zĩigẽ, n tɩ wilg-a a tʋʋmde, la teoog ning a sẽn tog n tʋke.

²⁰ Woto, bãmb ka na n tol n saag n kẽ n ges teed nins sẽn welg toorã, bala, yaa rẽnda n tõe n wa ne b kũum.»

²¹ Sẽn-Ka-Saab yeela a Moyiis yaa:

²² «Bɩ f sõdg a Gɛrsõ yagensã me zak-zaka, la roog-roogo, n gʋls b yʋyã.

²³ Fo na n sõda neb nins yʋʋm sẽn ta pis-tã, n tar n dabd yʋʋm pis-nu wã. Yaa bãmb la b na n yãk tɩ b ges sɛk roogã pʋgẽ tʋʋm kẽer yelle.

²⁴ Ad a Gɛrsõ yagensã sẽn tog n maan tʋʋm ninsi:

²⁵ Bãmb n na n tʋkd sɛk roogã fuugu, a fu-pindgã, ne a gãn-luts a yiibã, la sɛk roogã noor peen-lillã.

²⁶ Leb n yaa bãmb n na n tʋkd sɛk roogã zak gũbgr pɛɛlã, ne zakã rignoor peen-lillã sẽn gũbg zĩ-sõngã, ne maoong sẽn yõogd bugum tẽn-kugrã, ne zakã gũbr wĩyã, la ne teed a taabã, la lagd nins b sẽn tar n maand b tʋʋmdã.

²⁷ Tʋʋm nins a Gɛrsõ yagensã sẽn tog n maana, yaa a Aarõ ne a kom-dibli wã n tog n wilg bãmb b tʋʋmde. Yaa teedã tʋkre, ne tʋʋm nins fãa b sẽn tog n maanã.

²⁸ Gɛrsõ yagensã tʋʋm na n yɩɩ woto sɛk roogã pʋgẽ. La yaa maan-kʋʋd a Aarõ biig a Itamaar n na n yɩ bãmb tʋʋmã taoor soaba.»

Meraari yagensã tʋʋma

²⁹ Sẽn-Ka-Saab yeela a Moyiis yaa: «Bɩ f sõd a Meraari buudã nebã roog-roogo, la zak-zaka.

³⁰ Bɩ f sõd raop nins yʋʋm sẽn ta pis-tã n tar n dabd pis-nu wã. B na n kõo bãmb tʋʋm kẽer sɛk roogã zak pʋgẽ.

³¹ Ad tʋʋm nins bãmb sẽn tog n maan sɛk roogã zak pʋgẽ: Bãmb n na n tʋkd sɛk roogã ra-pegdã, a ra-paadsã, a ra-lugdsã ne b tebendsã,

³² la ra-lugds nins fãa sẽn gũbg sɛk roogã zakã, ne b tebendsã, la b biili wã, ne wĩyã, la ne teed nins fãa bãmb sẽn tar n maand a tʋʋmdã. Bɩ maan-kʋʋdbã wilg bãmb ned kam fãa teed nins a sẽn tog n tʋke.

³³ Tʋʋmd ning a Meraari yagensã sẽn maand sɛk roogã zak pʋgẽ wã la woto. La yaa maan-kʋʋd a Aarõ biig a Itamaar n yaa bãmb taoor soaba.»

^34-49 A Moyiisi, a Aarõ, ne Israyɛll kãsem-dãmbã sõda Leevi buudã neb fãa sẽn yaa Kehat ne Gɛrsõ la Meraari yagensã. La yaa neb nins yʋʋm sẽn ta pis-tã n tar n dabd pis-nu wã. B sõda bãmb roog-roogo, la zak-zaka, la yaa nin-bãmb n tog n maan tʋʋm kẽer sɛk roogã zak pʋgẽ. Yaa Sẽn-Ka-Saab n yeel a Moyiis t'a kɩt tɩ b sõd nebã. Dẽ, Leevi buudã neb sõor la woto: Kehat yagensã yaa neb tus a yi la kobs-yopoe la pis-nu. Gɛrsõ yagensã yaa neb tus a yi la kobs-yoob la pis-tã. Meraari yagensã yaa neb tus a tã la kobs-yi. Dẽ, Leevi buudã neb fãa sõor yaa tus a nii la kobs-nu la pis-nii. B sõda bãmb wa Sẽn-Ka-Saab sẽn dag n yeel a Moyiisã, la b wilga ned kam fãa a tʋʋmde, la a sẽn tog n tʋk bũmb ninga.