Sõadga 33 - WẼNNAAM SEBRE 2014

Ezɩpt yiibã kẽna, la a sigb zĩisi

¹ A Moyiisi, ne a Aarõ sẽn yiis Israyɛll nebã Ezɩpt soolmã pʋgẽ wã, kẽn la b sigb zĩis la woto.

² A Moyiis gʋlsa b kẽna, la b sigbã zĩis ball-balle, wa Sẽn-Ka-Saab sẽn dag n yeel yẽnda wã. Bãmb sẽn kẽna la b yalsgã zĩis yɩɩ woto.

³ Yʋʋmdã pipi kiuugã rasem piig la a nu wã daare, Pak tigrã yɩ tɩ zaamẽ, Israyɛll nebã yii a Ramsɛɛs tẽngã pʋg ne lohorem, Ezɩpt nebã fãa nifẽ.

⁴ La wakat-kãng tɩ Ezɩpt nebã da mumda b kom-dẽemsã sẽn ki wã. Sẽn-Ka-Saab sɩbga Ezɩpt nebã woto n na n kao b wẽnnaam-dãmbã bʋʋdo.

⁵ Dẽ, Israyɛll nebã yii Ramsɛɛse, la bãmb tɩ siga sukote.

⁶ Bãmb yii Sukot n tɩ sig Etam sẽn be hal weoogã kɩrengã

⁷ La bãmb yii Etam, n wẽnemd n kẽng Pi-Ayɩrot sẽn tees Ball-Sefõ wã, la bãmb tɩ siga Migdoll taoore.

⁸ Bãmb yika Pi-Ayɩrot n pɩʋʋg ko-kãsengã n tees weoogã sẽnẽ, bãmb kẽna dasm a tãab kẽnd Etam weoogã pʋgẽ, la bãmb tɩ siga Maara.

⁹ Bãmb yika Maara n ta Elim, b yãnda ko-bundum zĩis piig la a yiib la koms tɩɩs pis-yopoe, la yaa beenẽ la b sig yã.

¹⁰ Bãmb sẽn leb n yik Elimã b tɩ pẽnega mogr miuugã n sigi.

¹¹ La bãmb leb n yika ko-kãsengã sɛɛgẽ n kẽng tɩ sig Sĩn weoogã pʋga.

¹² Bãmb yika Sĩn weoogã pʋg n tɩ sig Dofka.

¹³ N yika Dofka n tɩ sig Aluusi.

¹⁴ N yi Aluus n kẽng Refidim, la be, nebã ka paam koom n na yũ ye.

¹⁵ Dẽ, bãmb yii Refidim, n tɩ sig Sɩnayi weoogã pʋga.

¹⁶ La bãmb yii Sɩnayi weoogẽ wã n tɩ sig Kibrot-Hataava.

¹⁷ Bãmb leb n yii Kibrot-Hataava n tɩ sig Hatserote.

¹⁸ Bãmb yii Hatserot n tɩ sig Ritma.

¹⁹ La bãmb yii Ritma n tɩ sig Rimo-Perɛts

²⁰ N yi Rimo-Perɛts n tɩ sig Libna.

²¹ N yi Libna n tɩ sig Risa.

²² N yi Risa n tɩ sig Kehelata.

²³ N yi Kehelata n tɩ sig Sefɛɛr tãngã.

²⁴ La bãmb yii Sefɛɛr tãngã n kẽng Araada,

²⁵ n yi Araada n kẽng Makelote,

²⁶ n yi Makelot n kẽng Tahat

²⁷ n yi Tahat n kẽng Teera,

²⁸ n yi Teera n kẽng Mitka,

²⁹ n yi Mitka n kẽng Asemona,

³⁰ n yi Asemona n kẽng Moserote.

³¹ Bãmb yii Moserot n kẽng Bene-Yakã

³² n yi Bene-Yaakã n kẽng Hoor-Gɩdgaade

³³ n yi Hoor-Gɩdgaad n kẽng Zotbata.

³⁴ La bãmb yii Zotbata n kẽng Abrona,

³⁵ n yi Abrona n kẽng Esɩyõ-Gebɛɛre,

³⁶ La bãmb yii Esɩyõ-Gebɛɛr n kẽng Kadɛɛs sẽn be Sĩn weoogẽ wã n tɩ sigi.

³⁷ N yi Kadɛɛs n tɩ sig Hoor tãngã sẽn be Edom tẽngã kɩrengã sɛɛga.

^38-39 Yaa Israyɛll nebã sẽn yi Ezɩpt soolmã pʋgẽ tɩ yʋʋm pis-naasã, kiuug a nu soabã pipi daarã, la Sẽn-Ka-Saab yeela a Aarõ t'a rʋ Hoor tãngã zugu. La yẽnda kii tãngã zug a yʋʋm koabg la pisi la a tãabo.

⁴⁰ La wakat-kãnga, Kana tẽngã naab a ye sẽn be tẽngã nug-rɩtgã, wʋma Israyɛll nebã waoongã.

⁴¹ Bãmb yika Hoor tãngẽ wã n sig Salmona.

⁴² N yi Salmona n tɩ sig Puno

⁴³ La bãmb yii Puno n tɩ sig Obote.

⁴⁴ N yi Obot n tɩ sig Ye-Abarim sẽn be Moaab toadgẽ wã.

⁴⁵ La bãmb yii Ye-Abarim n tɩ sig Dɩbõ-Gaad

⁴⁶ N leb n yi Dɩbõ-Gaad n tɩ sig Almo-Diblatayim.

⁴⁷ La bãmb yii Almo-Diblatayim n tɩ sig Abarim tãmsã sẽn tees Nebo tãngã.

⁴⁸ N yi Abarim tãmsã n tɩ sig Moaab weoogã pʋg Zʋrdẽ kʋɩlgã noor sẽn tees Zeeriko wã.

⁴⁹ Dẽ, bãmb tilga b fu-rotã Zʋrdẽ kʋɩlgã noore. La yaa sẽn sɩng ne Bɛt-Ayesimote, n tɩ tãag Abɛll-Sitim.

Kana tẽngã pʋɩɩb tõodo

⁵⁰ Sẽn-Ka-Saab goma ne a Moyiis a sẽn wa be Moaab weoogã pʋg Zʋrdẽ kʋɩlgã noor sẽn tees Zeeriko wã. La Sẽn-Ka-Saab yeela a Moyiisi

⁵¹ t'a yeel Israyɛll nebã yaa: «Yãmb sã n wa rʋʋg Zʋrdẽ kʋɩlgã n kẽ Kana tẽngã,

⁵² bɩ y rig tẽngã neb fãa, la y sãam b wẽn-naands nins bãmb sẽn pees ne kuga, wall sẽn kud ne kutã, la y sãam b tẽn-kugã.

⁵³ La yãmb na n deega tẽngã n sooga, la y zĩnd a pʋgẽ, bala, maam n kõ yãmb tẽn-kãng tɩ y sooge.

⁵⁴ Yãmb na n maana poeer n pʋɩ tẽngã n kõ buud fãa la roog fãa. Buud ningã neb sõor sẽn waooge, yãmb na n kõ-a la tẽn-bedre, la buud ninga neb sõor sẽn ka waooge, yãmb na n kõ-a tẽn-bila. La ned kam fãa na n paa zĩig ning b sẽn poe n kõ-a wa sẽn zems a buudã pʋɩɩrã.

⁵⁵ La yãmb sã n ka rig tẽngã nebã n yiis tẽngã, y sẽn na n bas b rãmba na n namsa yãmba. Bãmb na n yɩɩ wa gõos sẽn na n kõs yãmb nina, la a sɩ y poayã, la bãmb na n zaba ne yãmb tẽng ning yãmb sẽn na n zĩndã pʋgẽ.

⁵⁶ La sã n yɩ woto, mam sẽn da rat n sɩbg-b to-to wã, moasã, lebgda yãmb la m na n sɩbge.»