Sõadga 32 - WẼNNAAM SEBRE 2014

Rubɛn ne Gaad zĩnda Zʋrdẽ kʋɩlgã rʋʋnde

¹ Rubɛn ne Gaad nebã da tara rũms wʋsgo, la bãmb yãame tɩ Yayezɛɛr ne Galaad tẽngã rag n yaa sõama rũmsã yĩnga.

² Dẽ, Gaade, ne Rubɛn nebã kẽnga a Moyiis ne maan-kʋʋd a Eleyazaare, la Israyɛll nebã nanambsã nengẽ n tɩ yeel yaa:

³ «Atarote, la Dɩbõ, ne Yazɛɛre, la Nimra, la Ɛsbon, ne Elale, la Sebam, ne Nebo, la Beyõ tẽmsã

⁴ Sẽn-Ka-Saab sẽn kɩt tɩ Israyɛll nebã tõogã yaa tẽms sẽn yaa sõama ne rũms gʋʋlgo. La tõnd me la sẽn yaool n tar rũmsã la.»

⁵ Dẽ, bãmb leb n yeela a Moyiis yaa: «Tõnd kotame tɩ y sak kõ-d noor tɩ d soog tẽn-kãngã, la y ra kɩt tɩ d kẽng Zʋrdẽ kʋɩlgã rʋʋnd ye.»

⁶ A Moyiis leoka bãmb yaa: «Na n yɩ a wãn tɩ yãmb saam-biisã na n kẽng zabr zĩigẽ, tɩ yãmb dat n pa ka?

⁷ Bõe yĩng tɩ yãmb dat n boog Israyɛll nebã raood tɩ b ka tõog n kẽ tẽng ning Sẽn-Ka-Saab sẽn kõ-bã pʋgẽ?

⁸ Yãmb ba-rãmbã me maana a woto, wakat ning mam sẽn zĩnd Kadɛɛs-Barneya n tʋm-b tɩ b kẽng n tɩ ges Kana tẽngã.

⁹ Bãmb kẽname n tɩ ta Ɛskoll ko-soogã, la bãmb sẽn tɩ ges tẽngã n lebg n wa wã, b booga Israyɛll neb a taabã raoodo, sẽn na n yɩlẽ tɩ b ra kẽng n tɩ kẽ tẽng ning Sẽn-Ka-Saab sẽn dag n kõ bãmbã pʋgẽ ye.»

¹⁰ La baraare, Sẽn-Ka-Saab sũurã puuga ne bãmba, la b wẽename n yeele:

¹¹ «Neb nins fãa sẽn yi-b Ezɩpt tẽngã, sẽn da tar-b yʋʋm pisi, la sẽn yɩɩd dẽ wã, ka na n yãnd tẽng ning mam sẽn dag n wẽen n yeel tɩ m na n kõ a Abrahaam, ne a Izake, la a Zakoobã ye. Bala, b ka sak mam noorã ye.

¹² Yaa a Yefune biig a Kalɛɛb sẽn yaa a Kenaaz roogã nedã, ne a Nun biig a Zozoe bal n sak Sẽn-Ka-Saab noorã zãnga.

¹³ Dẽ, Sẽn-Ka-Saab sũurã puuga ne Israyɛll nebã, tɩ b kɩt tɩ b yeeb weoogã pʋgẽ, yʋʋm pis-naase, hal tɩ zamaan-kãng neb nins sẽn maan sẽn yaa wẽng Sẽn-Ka-Saab nifẽ wã fãa ki weoogã pʋgẽ zãnga.

¹⁴ Tɩ yãmb me rat n dɩk y ba-rãmb naoore, n yɩ nin-kɩɩsdb kamb n kɩt tɩ Sẽn-Ka-Saab sũurã leb n puug ne Israyɛll nebã yɛs n yɩɩd pĩnda!

¹⁵ Bala, yãmb sã n wẽnemd n bas Sẽn-Ka-Saabo, bãmb na n kɩtame tɩ Israyɛll nebã kaoos weoogã pʋgẽ n paase, la y na n kɩt tɩ nin-bãmbã fãa sãame.»

¹⁶ Dẽ, bãmb kolga a Moyiis n yeel yaa: «Tõnd na n tii yãg ka n kẽes d rũmsã, la d me tẽms n kõ d zagsã rãmba.

¹⁷ Dẽ poore, tõnd na yii tao-tao n dɩk d zab-teedã n luɩ Israyɛll nebã taoor n tall-b n tɩ kẽes tẽngẽ wã. La rẽ tɩ tõnd zagsã rãmb bee tẽms d sẽn me n gũbg pʋsẽ, sẽn na tõog n kogl-b tɩ tẽngã nebã ra maan-b bũmb ye.

¹⁸ Dẽ wã, tõnd ka na n lebg n kuil tɩ sã n ka Israyɛll ned kam fãa n wa n paam a zĩig ye.

¹⁹ La tõnd ka na n naag bãmb n deeg pʋɩɩr Zʋrdẽ kʋɩlgã rʋʋnde, bɩ sẽn zʋʋg beenẽ ye. Bala, tõnd na n paam d zĩig ka sẽn yaa Zʋrdẽ kʋɩlgã yaangã.»

²⁰ Dẽ, a Moyiis yeela bãmb yaa. «Yãmb sã n maan wa y sẽn yeelã, n dɩk y zab-teed n zab Sẽn-Ka-Saab zabre,

²¹ la neb nins fãa sẽn be ne yãmbã sã n dɩk b zab-teed n pɩʋʋg Zʋrdẽ kʋɩlgã Sẽn-Ka-Saab taoore, hal n tõog n dig bãmb bɛɛbã zãnga,

²² la yãmb sã n zab n tõog tẽngã n yaool n lebg n kuili, wakat-kãnga, yãmb paama y meng Sẽn-Ka-Saab taoore, la Israyɛll nebã me taoore. La Sẽn-Ka-Saab taoore, soolem-kãngã na n lebga yãmb dẽnda.

²³ La yãmb sã n ka maan a woto, yaa Sẽn-Ka-Saab la y beeg yã. La bɩ y bãng tɩ y yel-wẽnã sɩbgrã na n lʋɩ y zugu.

²⁴ Rẽ wã, bɩ y me tẽms n kõ y zagsã rãmba, la y ti yãg n kẽes y rũm-bãoonegã, la y maan wa yãmb sẽn yeelã.»

²⁵ Dẽ, Gaad ne Rubɛn nebã yeela a Moyiis yaa: «D zu-soaba, tõnd yaa yãmb tʋmtʋmdba, rẽ wã, d na n maana wa y sẽn yeelã.

²⁶ Dẽ, tõnd kambã ne d pagbã, la d rũmsã fãa na n paa Galaad tẽngã pʋga.

²⁷ La tõnd fãa sẽn yaa yãmb tʋmtʋmdbã na n boba d zab-teed n tɩ zab Sẽn-Ka-Saab taoor wa yãmb sẽn yeelã.»

²⁸ Dẽ, a Moyiis kõo maan-kʋʋd a Eleyazaare, ne a Nun biig a Zozoe noore, la ne Israyɛll nebã nanambsã noor nin-bãmb yĩnga.

²⁹ A Moyiis yeel-b lame yaa: «Gaad ne Rubɛn nebã sã n bob b zab-teed n naag yãmb n pɩʋʋg Zʋrdẽ kʋɩlgã n tɩ zab Sẽn-Ka-Saab taoore, tɩ y tõog tẽngã, bɩ y kõ bãmb Galaad tẽngã tɩ yɩ bãmb pʋɩɩre.

³⁰ La bãmb sã n ka bob b zab-teed n naag yãmb n kẽng n tɩ zabe, bɩ b kell n pa yãmb sʋk Kana tẽnga pʋgẽ.»

³¹ Dẽ, Gaad ne Rubɛn nebã leb n yeelame yaa: «Tõnd na n maana wa Sẽn-Ka-Saab sẽn yeelã.

³² Tõnd na n boba d zab-teed n kẽng Kana tẽngã n tɩ zab Sẽn-Ka-Saab taoore, la tõnd dat n paama d zĩig Zʋrdẽ kʋɩlgã rʋʋnd ka.»

³³ Dẽ, a Moyiis rɩka Amoor naab a Sihon soolmã, la Basan naab a Oog soolmã tẽmse, la a wetã, la tẽms nins sẽn yeg-b bãmbã, n kõ Gaad ne Rubɛn buudã, la a Zozɛf biig a Manaase buud pʋɩ-sʋkã.

³⁴ La Gaad yagensã leb n me Dibõ, Atarote, la Arowɛɛr tẽmsã.

³⁵ Atro-sofã, ne Yayezɛɛre, la Yogbeha,

³⁶ Bɛt-Nimra, ne Bɛt-Harã. Bãmb me tẽn-bãmb n gũbgi, la b wẽ yãg n gũbg n na n ning b rũmsã.

³⁷ La a Rubɛn yagensã yik n lebs n mee Ɛsbon, ne Eleyale, la Kiriyatayim tẽmsã.

³⁸ N paas Nebo, ne Ball-Meyon, la sɩbma, la b bao yʋʋr n kõ tẽms kẽer b sẽn me wã sʋka.

³⁹ A Manaase biig a Makɩɩr yagensã yikame n kẽng Galaad soolmã n tɩ zab ne Amoor nebã sẽn da be beenẽ wã n dig-b n deeg b tẽngã,

⁴⁰ Dẽ, a Moyiis dɩka galaad tẽngã n kõ a Manaase biig a Makɩɩr t'a zĩndi.

⁴¹ A Manaase biig a to yʋʋr sẽn boond t'a Yayɩɩre, yagensã kẽng n tɩ zaba ne Amor nebã n deeg b tẽmsã, la bãmb pʋd-b lame t'a Yayɩɩr tẽmse.

⁴² A Noba kẽng n tɩ zaba ne Kena nebã n deegb b tẽngã, la tẽn-bãoonegã. La yẽnda pʋda tẽn-bãmb yʋʋr tɩ Noba wa a mengã yʋʋr sẽn yaa to-to wã.