Sõadga 30 - WẼNNAAM SEBRE 2014

Pagb pʋleng tõodo

¹ La a Moyiis togsa Israyɛll nebã tõod nins fãa Sẽn-Ka-Saab sẽn wilg yẽnda wã.

² Dẽ zugẽ, a Moyiis boola buudã kãsem-dãmb n yeel-b yaa: «Ad noy a taab Sẽn-Ka-Saab sẽn kõ:

³ Ned sã n pʋlem t'a na n kõ Sẽn-Ka-Saabo kũuni, bɩ a wẽename t'a na n maana bũmbu, bɩ a ra bas n ka pids ye. Yẽnda tog n modg n pidsa bũmb ning sẽn yi a noorẽ wã.

⁴ La bi-pugl sẽn ket a ba zakẽ sã n maan pʋleng ne Sẽn-Ka-Saabo, wall a wẽename t'a na n maana bũmbu,

⁵ a ba wã sã n bãng t'a maana pʋlengo, n yaool n ka yeel-a tɩ bũmbu, bi-puglã tog n pidsa a pʋlengã.

⁶ La daar ning a ba wã sẽn bãngã, a sã n yeel bi-puglã tɩ yẽnda ka sak pʋlengã a sẽn maanã, bɩ bi-puglã bas a pʋlengã n da pids ye. La Sẽn-Ka-Saab ka na n ning-a taal ye. Bala, yaa a ba wã n gɩdg-a.

⁷ La bi-puglã sã n maan pʋlengo, wall a wẽen n ka yals n tagse, a sã n wa kuil sɩda,

⁸ t'a sɩdã bãnge, n ka yeel-a tɩ bũmb a sẽn bãngã daare, pagã tog n pidsa a pʋlengã.

⁹ La daar ning a sɩdã sẽn bãng pʋlengã, a sã n yeel a pagã tɩ yẽnda ka sake, bɩ pagã bas a pʋlengã n da pids ye. La Sẽn-Ka-Saab ka na n ning-a taal ye.

¹⁰ La pʋg-kõor bɩ pag sẽn ka leb n vɩ ne a sɩd sã n maan pʋlengo, a tog n pids-a lame.

¹¹ La pag sã n vɩ ne a sɩda, n maan pʋleng ne Sẽn-Ka-Saabo, wall a wẽen t'a na n maana bũmbu,

¹² t'a sɩdã bãnge, n ka yeel-a tɩ bũmbu, pagã tog n pidsa a pʋlengã.

¹³ La daar ning a sɩdã sẽn bãngã, a sã n gɩdg a pagã t'a ra pids a pʋlengã, bɩ a ra pids ye. Bala, yaa a sɩdã n gɩdg-a. La Sẽn-Ka-Saab ka na n ning-a taal ye.

¹⁴ Pag sã n maan pʋlengo, wall a wẽen n yeel t'a ka na n maan bũmbu, a sɩdã tara noor tɩ sake, wall a gɩdg-a t'a ra pids a pʋlengã ye.

¹⁵ La a sɩdã sã n bãnge, n ka yeel a pagã tɩ bũmbu, hal tɩ ta vẽkembeoogo, a sɩdã sẽn sĩndã wilgdame t'a saka pʋlengã bɩ wẽenegã pidsgu.

¹⁶ La sɩdã sã n bas tɩ vẽeg beoogo, t'a rat n gɩdg pʋlengã pidsgu, taalã bee raoã zugu.»

¹⁷ Ade, yaa tõ-bãmbã la Sẽn-Ka-Saab kõ a Moyiisi, sẽn kẽed ne pag sẽn vɩ ne a sɩda, wall bi-pugl sẽn ket n vɩ a ba zakẽ wɛɛngẽ.